ଚୋରାବାଲିରେ ୩ ଜଣଙ୍କ ସଲିଳ ସମାଧି: ୮ ଘଂଟାର ଅପରେସନ ପରେ ମୃତଦେହ ଉଦ୍ଧାର
କନକ ବ୍ୟୁରୋ: ଯାଇଥିଲେ ଜନ୍ମଦିନ ପାଳିବାକୁ, ହେଲେ ବାଟରେ ଜଗିଥିଲା ମୃତ୍ୟୁ । ସୁନ୍ଦରଗଡର ଇବ୍ ନଦୀରେ ଗୋଟିଏ ପରିବାରର ତିନି ଜଣ ବୁଡ଼ି ନିଖୋଜ ଘଟଣାରେ ସମସ୍ତଙ୍କ ମୃତଦେହ ଉଦ୍ଧାର କରାଯାଇଛି । ଗାଧେଇବାକୁ ଯାଇଥିବାବେଳେ ନଦୀର ଚୋରାବାଲିରେ ବୁଡି ୩ ଜଣ ନିଖୋଜ ହୋଇଯାଇଥିଲେ । ଆଉ ଆଜି ସକାଳେ ସମସ୍ତଙ୍କ ମୃତଦେହ ଉଦ୍ଧାର କରାଯିବା ପରେ ସ୍ଥାନୀୟ ଅଂଚଳରେ ଶୋକାକୁଳ ପରିବେଶ ସୃଷ୍ଟି ହୋଇଛି । ପ୍ରଶାସନର ଉଦାସୀନତାକୁ ଦାୟୀ କରିଛନ୍ତି ସ୍ଥାନୀୟ ଲୋକେ ।
Kanak News is now on WhatsApp
Join and get latest news updates delivered to you via WhatsApp
ମହମ୍ମଦ ରିଜୱାନ, ମହମ୍ମଦ ଫରାନ, ମହମ୍ମଦ ସାହିଦ ଏମାନେ ସ୍ୱପ୍ନରେ ସୁଦ୍ଧା ଭାବିନଥିଲେ ଇବ୍ ନଦୀର ଚୋରା ବାଲିରେ ତାଙ୍କୁ କାଳ ଅପେକ୍ଷା କରି ରହିଛି । ମହମ୍ମଦ ଫାରାନଙ୍କ ଜନ୍ମଦିନ ପାଳିବାକୁ ପରିବାର ଆସିଥିଲେ ସୁନ୍ଦରଗଡ ସଦର ଥାନା ଅଂଚଳର ସାମିଆନ ନିକଟ ଇବ ନଦୀ କୂଳକୁ । ଭୋଜି ପରେ ଅପରାହ୍ଣରେ ଫାରାନ ଓ ରିଜୱାନ ଖେଳିବା ପାଇଁ ନଦୀକୁ ଓହ୍ଲାଇଥିଲେ । ନଦୀରେ ଖେଳିବା ବେଳେ ଚୋରାବାଲିରେ ଦୁହେଁ ଫସି ଯାଇ ଚିକ୍ରାର କରିଥିଲେ । ପାଟି ଶୁଣି ବଂଚାଇବାକୁ ଆସି ନିଜେ ଚୋରାବାଲିରେ ଫସି ବୁଡି ଯାଇଥିଲେ ମହମ୍ମଦ ସାହିଦ । ଦେଖୁ ଦେଖୁ ୩ ଜଣ ବୁଡି ନିଖୋଜ ହୋଇଯାଇଥିଲେ ।
ଚୋରାବାଲିରେ ୩ ଜଣଙ୍କ ସଲିଳ ସମାଧି
୮ ଘଂଟାର ଅପରେସନ ପରେ ମୃତଦେହ ଉଦ୍ଧାର
ଗୋଟିଏ ପରିବାରର ୩ ଜଣଙ୍କ ସଲିଳ ସମାଧି ଖବର ପାଇ ଘଟଣାସ୍ଥଳରେ ପହଂଚିଥିଲେ ଅଗ୍ନିଶମ ବାହିନୀ । ରାତି ୧୦ଟା ଯାଏଁ ଖୋଜାଖୋଜି କରିବା ପରେ କାର୍ଯ୍ୟକୁ ସ୍ଥଗିତ ରଖାଯାଇଥିଲା । ସକାଳ ୬ଟାରୁ ପୁଣି ଆରମ୍ଭ ହୋଇଥିଲା ଅପରେସନ । ସୁନ୍ଦରଗଡ, ଝାରସୁଗୁଡା, ସମ୍ବଲପୁର ଓ ଭୁବନେଶ୍ୱରର ସ୍ୱତନ୍ତ୍ର ଉଦ୍ଧାରକାରୀ ଦଳ କ୍ୟାମେରା ଓ ବୁଡାଲି ସହାୟତାରେ ଉଦ୍ଧାର ଉଦ୍ୟମ କରିଥିଲେ । ସ୍ଥାନୀୟ ଲୋକଙ୍କ ସହାୟତାରେ ୩ ଜଣଙ୍କ ମୃତଦେହ ଉଦ୍ଧାର କରାଯାଇଛି ।
ସୁନ୍ଦରଗଡ ସଦର ଥାନା ଅଂଚଳର ସାମିଆନା ନିକଟରେ ଇବ ନଦୀର ଚୋରାବାଲିରେ ଫସି ପୂର୍ବରୁ ମଧ୍ୟ ୪ଜଣଙ୍କ ଜୀବନ ଯାଇଛି । ହେଲେ ପ୍ରଶାସନର ଉଦାସୀନତା ଯୋଗୁଁ ଲୋକଙ୍କ ଜୀବନ ଯାଉଥିବା କହିୁ କ୍ଷୋଭ ପ୍ରକାଶ କରିଛନ୍ତି ସ୍ଥାନୀୟ ବାସିନ୍ଦା । ଘଟଣାସ୍ଥଳରେ ସତର୍କ ସୂଚନା ଫଳକ ସହ ବ୍ୟାରିକେଡ ଲଗାଇବା ଏବଂ ଅଂଚଳକୁ ଡେଞ୍ଜର ଜୋନ ଘୋଷଣା କରିବାକୁ ଦାବି କରିଛନ୍ତି ।
ଗୋଟିଏ ପରିବାରର ୩ଜଣ ଇବ ନଦୀରେ ବୁଡି ପ୍ରାଣ ହରାଇବା ଘଟଣାକୁ ନେଇ ଅଂଚଳରେ ଶୋକାକୂଳ ପରିବେଶ ସୃଷ୍ଟି ହୋଇଛି । ଅନ୍ୟପଟେ ପ୍ରଶାସନର ଉଦାସୀନତାକୁ ନେଇ ଅସନ୍ତୋଷ ତେଜିବାରେ ଲାଗିଛି ।