କନକ ବ୍ୟୁରୋ: ମନରେ ଜୋସ୍, ହାତରେ ତ୍ରିରଙ୍ଗା । ସେନାରେ ସାମିଲ ହେବାର ଇଚ୍ଛା ତାଙ୍କୁ ପାରି କରିଦେଲା ୫୦ ଘଣ୍ଟାରେ ୩୫୦ କିଲୋମିଟର । ଏହା କୌଣସି ସେନାର ଟ୍ରେନିଂ କ୍ୟାମ୍ପ ନୁହେଁ ବରଂ ଏକ ପ୍ରଦର୍ଶନରେ ସାମିଲ ହେବାକୁ ଦୌଡି ଦୌଡି ଯାଉଛନ୍ତି ସେନା ପାଇଁ ଆଶାୟୀ ଥିବା ଜଣେ ଯୁବକ । ବିରୋଧ ପ୍ରଦର୍ଶନର ବିଭିନ୍ନ ଉପାୟ ଆପଣ ଦେଖିଥିବେ । କିଏ ଅନଶନ କରିଥାଏ ତ କିଏ ଧାରଣାରେ ବସେ ତ ଆଉ କିଏ ଘେରାଉ କରିଥାନ୍ତି । ହେଲେ ରାଜସ୍ଥାନ ଜଣେ ଯୁବକ ଏମିତି ବିରୋଧ ପ୍ରଦର୍ଶନ କରିଛନ୍ତି ଯାହାକୁ ନେଇ ଏବେ ଚାରିଆଡେ ଚର୍ଚ୍ଚା ।
Kanak News is now on WhatsApp
Join and get latest news updates delivered to you via WhatsApp
ଭାରତୀୟ ସେନାରେ ସାମିଲ ହେବାକୁ ଇଚ୍ଛୁକ ଥିବା ଜଣେ ଯୁବକ ରାଜସ୍ଥାନର ସିକରରୁ ଦିଲ୍ଲୀରେ ଏକ ପ୍ରଦର୍ଶନରେ ସାମିଲ ହେବାକୁ ୩୫୦ କିଲୋ ମିଟର ଦୌଡିଲେ । ତାଙ୍କୁ ଏହି ରାସ୍ତା ଅତିକ୍ରମ କରିବା ପାଇଁ ୫୦ ଘଣ୍ଟା ସମୟ ଲାଗିଥିଲା । ଏହି ଯୁବକ ଜଣକ ହେଉଛନ୍ତି ସୁରେଶ ମିଞ୍ଚର, ବୟସ ୨୪ ବର୍ଷ । ପିଲା ବେଳୁ ତାଙ୍କ ଭିତରେ ସେନାରେ ସାମିଲ ହେବାର ଜୁନୁନ ରହିଛି । ହେଲେ ଆଜି ଯାଏଁ ସେନା ପରୀକ୍ଷାରେ ସାମିଲ ହୋଇପାରିନାହାନ୍ତି । କାରଣ ୨ ବର୍ଷ ହେବ ସେନା ଚୟନ ପ୍ରକ୍ରିୟା ବନ୍ଦ ରହିଛି । ଏହାକୁ ଆରମ୍ଭ କରିବା ପାଇଁ ବିଭିନ୍ନ ସ୍ଥାନରେ ଦାବି ଜୋର ଧରିଛି । ଆଉ ଏହାରି ଭିତରେ ସୁରେଶ ମିଞ୍ଚର ଯାହା କଲେ ତାହା ସମସ୍ତଙ୍କ ହୃଦୟ ଜିତିନେଲା ।
ସୁରେଶ ମାର୍ଚ୍ଚ ୨୯ ତାରିଖରୁ ନିଜ ଦୌଡା ଆରମ୍ଭ କରିଥିଲେ । ପ୍ରତିଦିନ ସେ ୬୦ରୁ ୭୦ କିଲୋମିଟର ଦୌଡିକି ଅତିକ୍ରମ କରିଥିଲେ । ୨ ଏପ୍ରିଲରେ ସେ ଦିଲ୍ଲୀରେ ପହଞ୍ଚି ସାରିଥିଲେ । ସେନାରେ ଚୟନ ପ୍ରକ୍ରିୟା ବନ୍ଦ ଥିବାରୁ ଇଚ୍ଛୁକ ଯୁବକ ମାନଙ୍କ ବୟସ ବଢିଚାଲିଛି । ଯଦି ଏପରି ହୁଏ ତେବେ ସେମାନଙ୍କ ସେନାରେ ଭର୍ତ୍ତି ହେବାର ସ୍ୱପ୍ନ ଧୂଳିସାତ ହୋଇଯିବ । ତେଣୁ ଏହାକୁ ବିରୋଧ କରି ହେଉଥିବା ପ୍ରଦର୍ଶନରେ ଯୁବକମାନଙ୍କ ଜୋଶ ବଢାଇବା ପାଇଁ ସୁରେଶ ରାଜସ୍ଥାନରୁ ଦୌଡି ଦୌଡି ଏହି ପ୍ରଦର୍ଶନରେ ସାମିଲ ହୋଇଥିଲେ ।
୨ ବର୍ଷ ହେବ ସେନା ଚୟନ ପ୍ରକ୍ରିୟା ବନ୍ଦ ଥିବାରୁ ଏନେଇ ଇଚ୍ଛୁକ ଥିବା ଯୁବକମାନେ ଦିଲ୍ଲୀରେ ଏକାଠି ହୋଇଥିଲେ । ସେମାନଙ୍କର ଦାବି ଥିଲା ସେନା ଚୟନ ପ୍ରକ୍ରିୟା ପୁଣି ଆରମ୍ଭ କରିବାକୁ । ତେବେ ଏହି ଖବର ପାଇବା ପରେ ସୁରେଶ ବି ଏଥିରେ ସାମିଲ ହେବାକୁ ଚାହିଁଥିଲେ । ଆଉ ସେ ପ୍ରଦର୍ଶନ କରୁଥିବା ଯୁବକମାନଙ୍କ ଜୋଶ ବଢାଇବାକୁ ରାଜସ୍ଥାନରୁ ଦୌଡିକି ଯିବାକୁ ନିଷ୍ପତ୍ତି ନେଇଥିଲେ । ଆଉ ଏହା କରି ସେ ସମସ୍ତଙ୍କୁ ଚକିତ କରିଦେଇଥିଲେ ।