ପରିଚୟ ଦେଇଛି କାଠରେ ତିଆରି କଳାକୃତି । ୨୫ ବର୍ଷ ହେଲା ଏହି କାମକୁ ଆପଣାଇଛନ୍ତି କଳାହାଣ୍ଡିର କାଠ କାରିଗର ବିକ୍ରମ ମହାରଣା
କନକ ବ୍ୟୁରୋ : କୁହାଯାଏ, ମୂର୍ତ୍ତି ବି ଅନେକ କଥା କୁହେ । ନିର୍ଜିବ ବସ୍ତୁକୁ ସୁନ୍ଦରତାର ରୂପ ଦେବା କେବଳ କାରିଗରଙ୍କ ଦ୍ୱାରା ସମ୍ଭବ ହୋଇଥାଏ । ସେହିଭଳି ଜଣେ କାରିଗର ହେଉଛନ୍ତି କଳାହାଣ୍ଡିର କାଠ କାରିଗର ବିକ୍ରମ ମହାରଣା । ଗଣେଶ, ରାଧାକୃ୍ଷ୍ଣ, ଜଗନ୍ନାଥ, ବଳଭଦ୍ର, ସୁଭଦ୍ରା ଓ ଶିବ ଠାକୁରଙ୍କ ଭଳି ଅନେକ ଦେବାଦେବୀଙ୍କ ପ୍ରତିମୂର୍ତ୍ତି ଗଢ଼ୁଛନ୍ତି ଏହି କୁଶଳି କାରିଗର । ଏହା ସହିତ ହାତୀ, ଘୋଡା, ଗାଇ, ବାଛୁରୀ, ପୁରସ୍କାର ପାଇଁ ବ୍ୟବହାର ହେଉଥିବା ଟ୍ରଫି, ମୋବାଇଲ, ଚାବି, କଲମ ଷ୍ଟାଣ୍ଡ ଭଳି ଜିନିଷ ଗଢ଼ିବାରେ ଏମାନେ ବ୍ୟସ୍ତ ଅଛନ୍ତି । ବିକ୍ରମ ଏବଂ ତାଙ୍କ ଭାଇ ବଜରଙ୍ଗ ମହାରଣା ମିଶି ୧୯୯୮ ମସିହାରୁ ଆରମ୍ଭ କରିଛନ୍ତି ଏହି କାର୍ଯ୍ୟ । ଏବେ ନିଜେ ରୋଜଗାର କରିବା ସହ ଅନ୍ୟମାନଙ୍କୁ ରୋଜଗାର କରିବାର କଳା ଶିଖାଇଛନ୍ତି । ପାଖାପାଖି ୪୦ରୁ ଅଧିକ କାରିଗରଙ୍କୁ ପ୍ରଶିକ୍ଷଣ ଦେବା ସହ ରୋଜଗାରର ରାସ୍ତା ଦେଖାଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କାରିଗରଙ୍କ ଦ୍ୱାରା ପ୍ରସ୍ତୁତ ହେଉଥିବା ପ୍ରତିମୂର୍ତ୍ତି ଗୁଡ଼ିକ ସ୍ଥାନୀୟ ବଜାର ସହିତ ବାହାର ରାଜ୍ୟ କଲିକତା, ଦିଲ୍ଲୀ, ରାୟପୁର ଭଳି ସହରକୁ ବିକ୍ରି ପାଇଁ ପଠାଯାଉଛି । ଦେଶ ତଥା ବିଦେଶରେ ବି ଏହି ମୂର୍ତି କଳାର ପ୍ରସିଦ୍ଧି ରହିଛି । ଏହା ସହ ବିଭିନ୍ନ ପ୍ରଦର୍ଶନୀ ମେଳାରେ ପ୍ରଦର୍ଶନ କରି କିଛି ରୋଜଗାର କରନ୍ତି କାରିଗର । ଏହି କଳାକୃତି ପାଇଁ ବିକ୍ରମ ମହାରଣାଙ୍କୁ ଅନେକ ମାନପତ୍ର ଏବଂ ପୁରସ୍କାର ମଧ୍ୟ ମିଳିଛି । ସେହିପରି ବାପାଙ୍କ କାମରେ ଅନୁପ୍ରାଣିତ ହୋଇ ପୁଅ ଶିବାଶିଷ ମଧ୍ୟ ପାଠ ପଢ଼ା ପରେ ଏହି କାମକୁ ଆପଣାଇଛନ୍ତି । କାଠକୁ ଖୋଦେଇ କରି ତାଙ୍କ ବାପାଙ୍କ ଭଳି ସୁନ୍ଦର ସୁନ୍ଦର ପ୍ରତିକଥା କହୁଛି କାଠର ମୂର୍ତ୍ତି ଗଢ଼ୁଛନ୍ତି । ଯାହା ବଜାରରେ ମଧ୍ୟ ବେଶ ଚାହିଦା ରହିଛି ।
ସାରା ଜୀବନ ଏହି କାମକୁ ବୃତି କରିଥିବା କାରିଗରଙ୍କୁ ଯଦି ସରକାରଙ୍କ ପକ୍ଷରୁ କିଛି ପ୍ରୋତ୍ସାହନ କିମ୍ବା ଆଧୁନୀକ ଯନ୍ତ୍ରପାତି ମିଳେ ସେ ଆହୁରି ଲାଭବାନ ହେବେ ବୋଲି ପ୍ରକାଶ କରିଛନ୍ତି ।