ଏତେ ଜଣଙ୍କର ମୃତ୍ୟୁ ହୋଇଛି, ବାସ୍ ସତ ସାମ୍ନାକୁ ଆସୁ ଏହା ଆମେ ଚାହୁଁଛୁ : ମମତା ବାନାର୍ଜୀ
କନକ ବ୍ୟୁରୋ : କଟକ ଏସସିବି ମେଡିକାଲରେ ଟ୍ରେନ୍ ଦୁର୍ଘଟଣାରେ ଆହତ ଯାତ୍ରୀଙ୍କୁ ଭେଟିବା ପରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ନିଜ ପ୍ରତିକ୍ରିୟା ରଖିଛନ୍ତି । ମମତା କହିଛନ୍ତି, ଦୁର୍ଘଟଣାରେ ଅନେକ ଜୀବନ ଚାଲିଯାଇଛି, ତେଣୁ ସତ ସାମ୍ନାକୁ ଆସିବା ନିହାତି ଦରକାର । ଏବେ ଯୁକ୍ତି କରିବାର ସମୟ ନୁହେଁ, ସିବିଆଇ ତଦନ୍ତ କରୁ । କିନ୍ତୁ ସତ ସାମ୍ନାକୁ ଆସୁ ବୋଲି କହିଛନ୍ତି ମମତା ।
Kanak News is now on WhatsApp
Join and get latest news updates delivered to you via WhatsApp
ଏହାସହ ମମତା କହିଛନ୍ତି. ଟ୍ରେନ୍ ଦୁର୍ଘଟଣା ପରେ ଯେଉଁଭଳି ସହଯୋଗ ମିଳିଛି ଓ ଉଦ୍ଧାରକାର୍ଯ୍ୟ କରାଯାଇଛି ସେଥିପାଇଁ ଓଡ଼ିଶା ସରକାର, ସ୍ଥାନୀୟ ପ୍ରଶାସନ ଓ ସ୍ଥାନୀୟ ଲୋକଙ୍କୁ ଧନ୍ୟବାଦ ଜଣାଇଛନ୍ତି । ସେହିଭଳି ଏସସିବିରେ ଗୁରୁତର ଆହତଙ୍କୁ ଚିକିତ୍ସା କରୁଥିବା ଡାକ୍ତରଙ୍କୁ ମଧ୍ୟ ଧନ୍ୟବାଦ ଦେଇଛନ୍ତି ମମତା । ଉଭୟ ଓଡ଼ିଶା ଓ ପଶ୍ଚିମବଙ୍ଗ ସରକାର ମିଳିମିଶି କାମ କରୁଛନ୍ତି । ଆହତଙ୍କୁ ମାଗଣା ଚିକିତ୍ସା ଯୋଗାଇ ଦିଆଯାଉଛି ।
ମମତା କହିଛନ୍ତି, ଓଡ଼ିଶାର ବିଭିନ୍ନ ହସ୍ପିଟାଲରେ ୯୭ ଜଣ ଆହତ ଯାତ୍ରୀ ଚିକିତ୍ସିତ ହେଉଛନ୍ତି । ଏହି ଦୁର୍ଘଟଣାରେ ପଶ୍ଚିମବଙ୍ଗର ୧୦୩ ଜଣଙ୍କର ମୃତଦେହ ଚିହ୍ନଟ କରାଯାଇଛି । ଏବେ ବି ୩୧ ଜଣ ନିଖୋଜ ଥିବା କହିଛନ୍ତି ମମତା । ଯେଉଁମାନେ ରେଳ ଦୁର୍ଘଟଣାରେ ପ୍ରାଣ ହରାଇଛନ୍ତି ସେମାନଙ୍କୁ ୫ ଲକ୍ଷ, ଗୁରୁତର ଆହତଙ୍କୁ ୧ ଲକ୍ଷ, ସାମାନ୍ୟ ଆହତଙ୍କୁ ୨୫ ହଜାର ଏବଂ ଯେଉଁମାନେ ଟ୍ରେନରେ ଯାତ୍ରା କରୁଥିଲେ ସେମାନଙ୍କୁ ୧୦ ହଜାର ଟଙ୍କା ଲେଖାଏଁ ଦେବାକୁ ଘୋଷଣା କରିଛନ୍ତି ମମତା । ପଶ୍ଚିମବଙ୍ଗର ଯାତ୍ରୀଙ୍କୁ ଏହି ଅନୁକମ୍ପାମୂଳକ ସହାୟତା ମିଳିବ ।