କନକ ବ୍ୟୁରୋ: ଡହ ଡହ ଖରାରେ ତରଭୁଜ ଖାଇବାକୁ କିଏ ବା ଭଲ ନ ପାଏ । ଆଉ ଖରା ଦିନ ଆରମ୍ଭରୁ ବଜାରରେ ତରଭୁଜ ମଧ୍ୟ ପର୍ଯ୍ୟାପ୍ତ ପରିମାଣରେ ଉପଲବ୍ଧ ହେଉଛି । ତେବେ ମାଲକାନଗିରି ଜିଲ୍ଲା ତରଭୁଜର ଓଡିଶା ତଥା ଓଡିଶା ବହାରେ ସ୍ୱତନ୍ତ୍ର ପରିଚୟ ରହିଛି । ଆଉ ତରଭୁଜ ଉତ୍ପାଦନ କରି ମାଲକାନଗିରି ଜିଲ୍ଲାର ଚାଷୀକୁଳ ବେଶ ଦୁଇ ପଇସା ରୋଜଗାର କରୁ ଥିବା ସହ ରାଜ୍ୟ ସ୍ତରରେ ମଧ୍ୟ ସୁନାମ ଅର୍ଜନ କରି ପାରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟରେ ଏବେ ପାରଦ ଆସ୍ତେ ଆସ୍ତେ ବଢି ଚାଲିଥିବା ବେଳେ ସହର ତଥା ଗ୍ରାମାଂଚଳରେ ତରଭୁଜର ଚାହିଦା ମଧ୍ୟ ସେଇ ଆନୁପାତରେ ବଢିବାରେ ଲାଗିଛି । ମାଲକାନଗିରି ଜିଲ୍ଲାର ଗାମ୍ଫାକୋଣ୍ଡା ଓ ଏମଭି ୧୧ ଅଂଚଳରେ ପ୍ରଚୁର ପରିମାଣରେ ତରଭୁଜ ଚାଷ ହୋଉଥିବା ବେଳେ ଏଠାକାର ତରଭୁଜର ବେଶ ଚାହିଦା ରହିଛି । କାରଣ ସମ୍ପୁର୍ଣ ଜୈବିକ ପଦ୍ଧତିରେ ତରଭୁଜ ଚାଷ ହୋଉଥିବାରୁ ମାଲକାନଗିରି ଓ ଓଡିଶା ବଜାର ସମେତ ପଡୋଶୀ ରାଜ୍ୟକୁ ରପ୍ତାନୀ ହୁଏ ଏଠାକାର ସୁଆଦିଆ ତରଭୁଜ । ଜିଲ୍ଲାର କାଲିମେଳା ଠାରୁ ଆରମ୍ଭ କରି ବାଲିମେଳା ଯାଏଁ ଜାତୀୟ ରାଜପଥ ଓ ରାଜ୍ୟ ରାଜପଥରେ ମେଳି ହୋଇଛି ତରଭୁଜର ପସରା । ଆଉ ପ୍ରଚଣ୍ଡ ରୌଦ୍ର ତାପରୁ ରକ୍ଷାପାଇବା ପାଇଁ ରାସ୍ତାକଡରେ ଅଟକି ତରଭୁଜର ମଜା ନିଅନ୍ତି ବାଟୋଇ । ତେବେ ଚଳିତ ବର୍ଷ ତରଭୁଜ ଦର କିଛିଟା ଅଧିକ ରହିଛି, କିନ୍ତୁ ଚାହିଦା ସେତେଟା କମି ନାହିଁ ।
ମାଲକାନଗିରି ଏମଭି ୧୧ ଗାଁର ତରୁଭୁଜ ଚାଷୀ କୃଷ୍ଣ ସରକାର । ଚଳିତ ବର୍ଷ ୪ ଏକର ଚାଷ ଜମି ରେ ତରଭୁଜ ଚାଷ କରିଛନ୍ତି । ଏଥି ପାଇଁ କୃଷ୍ଣ ଏକର ପିଛା ୩୦ ରୁ ୩୫ ହଜାର ଖର୍ଚ କରି ଥିବା ବେଳେ ଏବେ କିଲୋ ପିଛା ୮ ଟଙ୍କା ଦର ରେ ବ୍ୟବସାୟୀଙ୍କୁ ତରଭୁଜ ବିକ୍ରୀ କରୁଛନ୍ତି କୃଷ୍ଣ । ଆଉ ଏହି ଦର ଜାରି ରହିଲେ ୮୦ ରୁ ଏକ ଲକ୍ଷ ଟଙ୍କା ରୋଜଗାରର ଲକ୍ଷ୍ୟ ରଖିଛନ୍ତି କୃଷ୍ଣ ।
ବିଶେଷକରି ଛତିଶଗଡ, ଆନ୍ଧ୍ର ଓ ତେଲେଙ୍ଗାନାର ଚାଷୀ ମାନେ ମାଲାକନଗିରିରୁ ତରଭୁଜ କିଣି ନେଉଥିବାରୁ ସ୍ଥାନୀୟ ବଜାରରେ ଏହାର ପ୍ରଭାବ ଦେଖିବାକୁ ମିଳିଛି । ପୂର୍ବରୁ ୧୦ ରୁ ୪୦ ଟଙ୍କା ଦରରେ ବିକ୍ରୀ ହୋଉ ଥିବା ଗୋଟା ତରଭୁଜ ଏବେ ୪୦ ରୁ ୮୦ ଟଙ୍କା ଦରରେ ବିକ୍ରୀ ହୋଉଛି । ତେବେ ସ୍ଥାନୀୟ ବ୍ୟବସାୟ କିନ୍ତୁ କମି ନାହିଁ । ମାଲକାନଗିରି ଜିଲ୍ଲାରେ କେବଳ କାଁ ଭାଁ ସ୍ଥାନରେ ବିପୁଳ ପରିମାଣ ରେ ତରଭୁଜ ଚାଷ ହୁଏ । ତେବେ କୃଷୀ ଓ ଉଦ୍ୟାନ ସମେତ ଜଳସେଚନ ବିଭାଗଙ୍କ ପ୍ରୋତ୍ସାହନ ମିଳିଲେ ଜିଲ୍ଲାରେ ଚାହିଦା ମୁତାବକ ତରଭୁଜ ଉତ୍ପାଦନ ହୋଇ ପାରନ୍ତା ।