ପ୍ରଚାର ସରିବାର ଦିନକ ପୂର୍ବରୁ ମୁଖ୍ୟମନ୍ତ୍ରୀଙ୍କ ଭର୍ଚୁଆଲ୍ କ୍ୟାମ୍ପେନ: କହିଲେ, ମହିଳାଙ୍କୁ ବିଧାୟକ ଭାବେ ଦେଖିବାକୁ ଚାହେଁ
କନକ ବ୍ୟୁରୋ: ଧାମନଗର ଉପନିର୍ବାଚନ ପାଇଁ ଭୋଟ୍ ତାରିଖ ପାଖେଇ ଆସୁଥିବାବେଳେ ସରିସରି ଆସୁଛି ପ୍ରଚାର । ନିର୍ବାଚନୀ ପ୍ରଚାର ଶେଷ ହେବାକୁ ଆଉ ଦିନଟିଏ ବାକି । ଏହା ପୂର୍ବରୁ ଭର୍ଚୁଆଲରେ ପ୍ରଚାର କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ବିଜେଡି ପ୍ରାର୍ଥୀ ଅବନ୍ତୀ ଦାସଙ୍କ ପାଇଁ ପ୍ରଚାର କରିବାକୁ ଧାମନଗରର ୧୩ଟି ସ୍ଥାନରେ ଭର୍ଚୁଆଲ ସଭାର ଆୟୋଜନ କରାଯାଇଥିଲା । ପ୍ରତି ନିର୍ବାଚନୀ ସଭା ପଡିଆରେ ଲଗାଯାଇଥିଲା ବଡବଡ ଏଲଇଡି । ୧୩ଟି ମଂଚ କରାଯାଇଥିବାବେଳେ ପ୍ରତି ସଭାସ୍ଥଳରେ ୩ରୁ ୪ ହଜାର କର୍ମୀଙ୍କୁ ଏକଜୁଟ କରିବା ପାଇଁ ଦଳୀୟ ନେତାମାନଙ୍କୁ ଟାର୍ଗେଟ ଦିଆଯାଇଥିଲା । ମୁଖ୍ୟମନ୍ତ୍ରୀଙ୍କ ମ୍ୟାଜିକ ଦଳୀୟ ପ୍ରାର୍ଥୀ ଅବନ୍ତୀଙ୍କ ପାଇଁ ବରଦାନ ହେବ ବୋଲି ବିଜେଡି ଶିବିର ଆଶାବାଦୀ ।
Kanak News is now on WhatsApp
Join and get latest news updates delivered to you via WhatsApp
ଧାମନଗରରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଦୁଇଦିନ ମାରାଥନ ପ୍ରଚାର କରିଯିବା ପରେ ବିଜେପି ଶିବିର ବେଶ ଉତ୍ସାହିତ ଅଛି । କେନ୍ଦ୍ରମନ୍ତ୍ରୀ ବିଶ୍ୱେଶ୍ୱର ଟୁଡୁଙ୍କ ପ୍ରଚାର ମଧ୍ୟ ବିଜେପି ନେତା ଓ କର୍ମୀଙ୍କ ମନୋବଳକୁ ବଢାଇ ଦେଇଛି । ବାପାଙ୍କ ବିୟୋଗ ପରେ ପ୍ରଥମଥର ନିର୍ବାଚନ ଲଢୁଥିବା ସୂର୍ଯ୍ୟବଂଶୀ ସୂରଜ ମଧ୍ୟ ଗାଁଗାଁ ବୁଲି ପ୍ରଚାର କରୁଛନ୍ତି । କୁହାଯାଉଛି ଧାମନଗରର ପୂର୍ବତନ ବିଧାୟକ ତଥା ବରିଷ୍ଠ ବିଜେପି ନେତା ମନମୋହନ ସାମଲ ଏବେ ବିଜେପି ପ୍ରାର୍ଥୀ ସୂରଜଙ୍କ ପାଇଁ ବଡ ରଣନୀତିକାର ପାଲଟିଛନ୍ତି । ଦିବଙ୍ଗତ ବିଷ୍ଣୁ ସେଠୀଙ୍କ ନିଜସ୍ୱ ସମର୍ଥନ ସହ ମନମୋହନ ସାମଲଙ୍କ ସମର୍ଥନ ସୂରଜଙ୍କ ପଛରେ ରହିଛି । କାଲି ଧାମନଗର ପ୍ରଚାରର ଶେଷଦିନରେ ପୁଣିଥରେ କେନ୍ଦ୍ରମନ୍ତ୍ରୀ ସୂରଜଙ୍କ ପାଇଁ ପ୍ରଚାର କରିବା କାର୍ଯ୍ୟକ୍ରମ ରହିଛି ।
ପ୍ରଥମଥର ପାଇଁ ଉପନିର୍ବାଚନରେ ଖୋଲାଖୋଲି ବିଦ୍ରୋହର ସମ୍ମୁଖୀନ ହୋଇଥିବା ଶାସକ ବିଜେଡିର ରଣକୌଶଳ ଉପରେ ସମସ୍ତଙ୍କ ନଜର ରହିଛି । ବିଜେଡିର ମାଳମାଳ ମନ୍ତ୍ରୀ, ବିଧାୟକ ଓ ନେତା ଗତ ଦୁଇ ସପ୍ତାହ ହେଲାଣି ଧାମନଗରରେ ଡେରା ପକାଇଛନ୍ତି ।
ଧାମନଗର ଭୋଟ୍ ଗଣିତ
– ୨୦୧୯ ନିର୍ବାଚନରେ ବିଜେପି ପ୍ରାର୍ଥୀ ବିଷ୍ଣୁ ସେଠୀଙ୍କୁ ମିଳିଥିଲା ୮୦ ହଜାର ୧୧୧ ଖଣ୍ଡ ଭୋଟ୍
– ସେତେବେଳେ ବିଜେଡି ପ୍ରାର୍ଥୀ ରାଜେନ୍ଦ୍ର ଦାସ ୭୫ ହଜାର ୪୫୯ ଖଣ୍ଡ ଭୋଟ ପାଇଥିଲେ
– କଂଗ୍ରେସ ପ୍ରାର୍ଥୀ ମାତ୍ର ୭ ହଜାର ୨୫୮ ଖଣ୍ଡ ଭୋଟ୍ରେ ସୀମିତ ରହିଥିଲେ
– କିନ୍ତୁ ଗତ ପଂଚାୟତ ନିର୍ବାଚନରେ ଏହି ଏହି ଚିତ୍ର ପୁରା ଓଲଟି ଯାଇଥିଲା
– ସମସ୍ତ ଜୋନ୍ ଓ ଏନଏସିରେ ବିଜେଡି ପ୍ରାୟ ୨୮ ହଜାର ଭୋଟରେ ବିଜେପିଠୁ ଆଗୁଆ ଥିଲା
– ଉପନିର୍ବାଚନରେ ପଂଚାୟତ ଫଳାଫଳ ଦୋହରାଇବାକୁ ବିଜେଡି ଶିବିର ଉଦ୍ୟମ କରୁଛି
ଏଥର କିନ୍ତୁ ବିଜେଡି ରାସ୍ତାରେ କଂଟା ହୋଇଛନ୍ତି ସ୍ୱାଧୀନ ପ୍ରାର୍ଥୀ ରାଜେନ୍ଦ୍ର କୁମାର ଦାସ । ଯଦି ପ୍ରତି ପଂଚାୟତରୁ ରାଜୁ କିଛିକିଛି ବିଜେଡି ଭୋଟ୍ କାଟନ୍ତି ତେବେ ବିଜେପି ପାଇଁ ରାସ୍ତା ପରିଷ୍କାର ହୋଇଯିବ । ବିଷ୍ଣୁ ସେଠୀଙ୍କ ଦେହାନ୍ତ ପରେ ବିଜେପି ପ୍ରାର୍ଥୀ ସୂରଜଙ୍କ ସପକ୍ଷରେ ସମବେଦନାର ଭୋଟ୍ ମଧ୍ୟ ରହିଛି ।