ବିବାଦରେ ପୂର୍ବତନ ଭାରତୀୟ କ୍ରିକେଟର ବିନୋଦ କାମ୍ବଲୀ । ମଦ ନିଶାରେ ପତ୍ନୀଙ୍କୁ ମାଡ ମାରିଥିବା ଅଭିଯୋଗ ।
କନକ ବ୍ୟୁରୋ: ପୂର୍ବତନ ଭାରତୀୟ କ୍ରିକେଟର ବିନୋଦ କାମ୍ବଲୀଙ୍କ ଅଡୁଆ ବଢିପାରେ । କାହିଁକି ନା ପୁଣିଥରେ ବିବାଦ ସହ ଛନ୍ଦି ହୋଇଛନ୍ତି ଏହି ପୂର୍ବତନ ଭାରତୀୟ କ୍ରିକେଟର । ବିନୋଦ କାମ୍ବଲୀଙ୍କ ପତ୍ନୀ ତାଙ୍କ ସ୍ୱାମୀଙ୍କ ଉପରେ ଥାନାରେ ଅଭିଯୋଗ କରିବା ସହିତ ତାଙ୍କୁ ସେ ମାରପିଟ୍ କରୁଥିବା ଆରୋପ ଲଗାଇଛନ୍ତି । ମୁମ୍ବାଇର ବାନ୍ଦ୍ରା ପୋଲିସ ଷ୍ଟେସନରେ ସେ ଏହି ଅଭିଯୋଗ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ବିନୋଦ କାମ୍ବଲୀଙ୍କ ପତ୍ନୀଙ୍କ କହିବା କଥା, ତାଙ୍କ ସ୍ୱାମୀ ନିଶାରେ ତାଙ୍କ ଉପରକୁ କୁକିଂ ପ୍ୟାନର ହ୍ୟାଣ୍ଡଲ ଫୋପାଡି ଦେଇଥିଲେ । ଯାହା ଫଳରେ ତାଙ୍କ ମୁଣ୍ଡରେ ଆଘାତ ଲାଗିଥିଲା । ତେବେ ଶୁକ୍ରବାର ଦିନ ଦ୍ୱିପହର ୧ରୁ ସାଢେ ୧ଟା ଭିତରେ ଏହି ଘଟଣା ଘଟିଥିବା ସେ ଅଭିଯୋଗରେ ଉଲ୍ଲେଖ କରିଛନ୍ତି । ତେବେ ମଦ ନିଶାରେ ସେ ଏପରି କରିଥିବା ଜଣାପଡିଛି । ବାନ୍ଦ୍ରା ପୋଲିସର ଜଣେ ଅଧିକାରୀଙ୍କ କହିବା ମୁତାବକ, ପୋଲିସ ତାଙ୍କ ଘରେ ପହଞ୍ଚିବା ପୂର୍ବରୁ ବିନୋଦ କାମ୍ବଲୀ ନିଜ ପତ୍ନୀଙ୍କୁ ନେଇ ହସ୍ପିଟାଲ ଯାଇସାରିଥିଲେ । ହସ୍ପିଟାଲରେ ତାଙ୍କର ଚିକିତ୍ସା କରାଯାଇଛି ।
ସୂଚନାଯୋଗ୍ୟ ଯେ, ବିବାଦ ସହ ବିନୋଦ କାମ୍ବଲୀଙ୍କ ପୁରୁଣା ସମ୍ପର୍କ ରହିଆସିଛି । କିଛି ଦିନ ତଳେ ସେ ତାଙ୍କର ଏକ ଇଣ୍ଟରଭ୍ୟୁରେ ଚାକିରି ସମ୍ବନ୍ଧରେ ପ୍ରତିକ୍ରିୟା ରଖିଥିଲେ । ସେ କହିଥିଲେ, ତାଙ୍କ ପାଖରେ ଏବେ କୌଣସି କାମ ନାହିଁ, ବିସିସିଆଇର ପେନସନ ଭରସାରେ ସେ ଏବେ ବଞ୍ଚିଛନ୍ତି ।