ଦଳୀୟ ଚିହ୍ନକୁ ନେଇ ମୁହାଁମୁହିଁ ଉଦ୍ଧବ-ସିନ୍ଦେ । ଏବେ ନିର୍ବାଚନ କରିବାକୁ ବିଜେପିକୁ ଉଦ୍ଧବଙ୍କ ଚ୍ୟାଲେଞ୍ଜ
କନକ ବ୍ୟୁରୋ : ଶିବସେନାର ନେତା ଭାବେ ମହାରାଷ୍ଟର ନୂଆ ମୁଖ୍ୟମନ୍ତ୍ରୀ ହୋଇଥିବା ଏକନାଥ ସିନ୍ଦେ ଏବଂ ଦଳର ପ୍ରତିଷ୍ଠାତାଙ୍କ ପୁଅ ଉଦ୍ଧବ ଠାକରେଙ୍କ ମଧ୍ୟରେ ଦଳୀୟ ଚିହ୍ନକୁ ନେଇ ବିବାଦ ବଢିବାରେ ଲାଗିଛି । ଆଜି ଦଳୀୟ କର୍ମକର୍ତାଙ୍କ ସହ ଆଲୋଚନା କରିବା ପରେ ଦଳୀୟ ଚିହ୍ନ ’ଧନୁ-ତୀର’ କେହି ନେଇପାରିବେନି ବୋଲି କହିଛନ୍ତି ଉଦ୍ଧବ ଠାକରେ । ଉଦ୍ଧବ ବିଜେପିକୁ ଚ୍ୟାଲେଞ୍ଜ କରି ଏବେ ନିର୍ବାଚନ କରିବାକୁ କହିବା ସହ ଦଳୀୟ ଚିହ୍ନକୁ ନେଇ ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କୁ ଚ୍ୟାଲେଞ୍ଜ କରିଛନ୍ତି । ସେ କହିଛନ୍ତି, ଶିବସେନା ସାଧାରଣ ଲୋକଙ୍କୁ ବିଧାୟକ, ସାଂସଦ, ମନ୍ତ୍ରୀ ବନେଇଥିଲା । ସେମାନଙ୍କ ମଧ୍ୟରୁ କିଛି ଆମକୁ ଛାଡି ଚାଲିଯାଇପାରନ୍ତି, ହେଲେ ସେମାନଙ୍କୁ ବିଧାୟକ, ସାଂସଦ, ମନ୍ତ୍ରୀ ବନାଇଥିବା ଶିବ ସୈନିକ ତାଙ୍କ ସହ ଥିବା ଦାବି କରିଛନ୍ତି ଉଦ୍ଧବ ଠାକରେ ।
Kanak News is now on WhatsApp
Join and get latest news updates delivered to you via WhatsApp
ଏକନାଥ ସିନ୍ଦେ ମୁଖ୍ୟମନ୍ତ୍ରୀ ହେବାକୁ ସପ୍ତାହେ ବିତି ଯାଇଥିଲେ ମଧ୍ୟ ସରକାର ଗଠନ ପାଇଁ ରାଜ୍ୟପାଳ ଦେଇଥିବା ନିଷ୍ପତି ବିରୋଧରେ ପୁଣି ସୁପ୍ରିମକୋର୍ଟ ଯାଇଛନ୍ତି ଉଦ୍ଧବ ଠାକରେ । ଦଳର ୧୬ ବିଧାୟକଙ୍କ ଅଯୋଗ୍ୟ ମାମଲା କୋର୍ଟରେ ଶୁଣାଣି ହେବାକୁ ଥିବା ବେଳେ ସରକାର ଗଠନ ପାଇଁ ରାଜ୍ୟପାଳଙ୍କ ନିର୍ଦ୍ଦେଶ ବେଆଇନ ବୋଲି ପିଟିସନ ଦାଖଲ କରିଛନ୍ତି ଉଦ୍ଧବଙ୍କ ଗୋଷ୍ଠୀ । ଏପେଟେ ଶବସେନାର ତୃଣମୂଳ ସ୍ତରର କର୍ମୀ ସିନ୍ଦେଙ୍କ ସହ ଯୋଗ ଦେଉଥିବା ଦେଖିବାକୁ ମିଳିଛି । ଗୁରୁବାର ଥାନେ ମହାନଗର ନିଗମର ୬୭ କର୍ପୋରେଟର ସିନ୍ଦେଙ୍କ କ୍ୟାମ୍ପରେ ଯୋଗଦେଇଥିବା ବେଳେ ଶୁକ୍ରବାର ନାଭୀ ମୁମ୍ବାଇ ଏବଂ ଅନ୍ୟ କିଛି ନଗର ନିଗର କର୍ପୋରେଟରମାନେ ସିନ୍ଦେଙ୍କ ସହ ଯୋଗ ଦେଇଛନ୍ତି ।
ଆସନ୍ତା ୧୧ ତାରିଖ ବିଧାୟକଙ୍କ ଅଯୋଗ୍ୟ ଘୋଷଣା ମାମଲା ସହ ଶୁକ୍ରବାର ଦାଖଲ ହୋଇଥିବା ନୂଆ ପିଟିସନର ଶୁଣାଣି କରିବାକୁ ସୁପ୍ରମିକୋର୍ଟ ଧାର୍ଯ୍ୟ କରିଥିବା ବେଳେ ଦଳୀୟ ଚିହ୍ନ କାହା ପାଖରେ ରହିବ ତାକୁ ନେଇ ଚର୍ଚ୍ଚା ଜୋର ଧରିଛି ।