ମୃତ୍ୟୁ ଆସେ ଏମିତି….ଚିକିତ୍ସା ପାଇଁ ଯାଉଥିଲେ ଶବ ହୋଇ ଫେରିଲେ । କୋରେଇ ଟ୍ରେନ୍ ଦୁର୍ଘଟଣାରେ ଚାଲିଗଲା ମାଆ ଝିଅଙ୍କ ଜୀବନ ।
କନକ ବ୍ୟୁରୋ: ଏମିତି ବି ଆସେ ମୃତ୍ୟୁ ! ଆଜି ସକାଳେ କଟକ ଯିବା ପାଇଁ ଯାଜପୁର କୋରେଇ ଷ୍ଟେସନରେ ଟିକେଟ୍ କାଟି ପ୍ଲାଟଫର୍ମରେ ଅପେକ୍ଷା କରିଥିଲେ ଟ୍ରେନ୍ ପାଇଁ । ହେଲେ କିଏ ଜାଣିଥିଲା ମୃତ୍ୟୁ ଯେ, ବାଟ ଜଗିଛି । ହଠାତ୍ ମାଲ ଗାଡି ଟ୍ରେନର ୮ଟି ବଗି ଲାଇନ୍ ଚ୍ୟୁତ ହୋଇ ମାଡି ଆସିଲା ପ୍ଲାଟଫର୍ମ ଉପରକୁ, ଆଉ ଦଳିଦେଇଥିଲା ସେଠାରେ ଉପସ୍ଥିତ ଥିବା ଲୋକଙ୍କୁ ।
Kanak News is now on WhatsApp
Join and get latest news updates delivered to you via WhatsApp
ଅବିଜୁଲ ବିବି, ପାର୍ବତୀ ବିନ୍ଧାଣୀ, କଣ୍ଢେଇ ବିନ୍ଧାଣୀ । ଏ ହେଉଛନ୍ତି ଯାଜପୁରର କୋରେଇ ଟ୍ରେନ ଦୁର୍ଘଟଣାରେ ପ୍ରାଣ ହରାଇଥବା ୨ ମହିଳା ଓ ଜଣେ ଝିଅ । ମାଲବାହୀ ଟ୍ରେନ ଦୁର୍ଘଟଣାରେ ଏମାନଙ୍କ ଅକାଳରେ ଚାଲିଯାଇଛି ଜୀବନ । କଟକ ଯିବା ପାଇଁ ପ୍ଲାଟଫର୍ମରେ ଟ୍ରେନକୁ ଅପେକ୍ଷା କରିଥିବାବେଳେ ଦୁର୍ଘଟଣା ଘଟିଥିଲା ଓ ୩ ଜଣଙ୍କ ପ୍ରାଣବାୟୁ ଉଡିଯାଇଥିଲା ।
- ମୃତ୍ୟୁ ଆସେ ଏମିତି..
- ଚିକିତ୍ସା ପାଇଁ ଯାଉଥିଲେ ଶବ ହୋଇ ଫେରିଲେ
ଟ୍ରେନ ଦୁର୍ଘଟଣାରେ ଯାଇଛି ମାଆ ପାର୍ବତୀ ବିନ୍ଧାଣୀ ଓ ଝିଅ କଣ୍ଢେଇ ବିନ୍ଧାଣୀଙ୍କ ଜୀବନ । ପାର୍ବତୀ ବିନ୍ଧାଣୀ ନିଜ ଝିଅ କଣ୍ଢେଇ ବିନ୍ଧାଣୀର ଚିକିତ୍ସା ପାଇଁ କଟକ ବଡ ମେଡିକାଲକୁ ଯିବା ପାଇଁ ନିଜ ଗାଁ କୁଚିଣ୍ଡାରୁ ଭୋରରୁ ବାହାରିଥିଲେ । କିନ୍ତୁ କିଏ ଜାଣିଥିଲା ତାଙ୍କର ଏହି ଯାତ୍ରା ଶେଷ ଯାତ୍ରା ହେବ ବୋଲି । ଏମାନଙ୍କ ସହ କଣ୍ଢେଇଙ୍କ ସ୍ୱାମୀ ବଳରାମ ଓ ଛୋଟ ଶିଶୁ ବିଶ୍ୱଜିତ ବି ଥିଲେ । ସ୍ତ୍ରୀଙ୍କ ପାଇଁ ଚାହା ଆଣିବାକୁ ଯାଇଥିଲେ ବଳରାମ । କିନ୍ତୁ ମାଲଗାଡି ଲାଇନଚ୍ୟୁତ ହୋଇ ପ୍ଲାଟଫର୍ମ ଉପରକୁ ଚଢିଯାଇଥିଲା ଓ ପ୍ରାଣ ହରାଇଥିଲେ ପାର୍ବତୀ ଓ କଣ୍ଢେଇ ।
- ଦୁର୍ଘଟଣାରେ ଆଉ ଏକ ଯନ୍ତ୍ରଣାଦାୟକ ମୃତ୍ୟୁ
- ଔଷଧ ଆଣିବାକୁ ଯାଉଥିଲେ, ପ୍ଲାଟଫର୍ମରେ ଚାଲିଗଲା ଜୀବନ
ଦୁର୍ଘଟଣାରେ ପ୍ରାଣ ହରାଇଥିବା ଅବିଜୁଲ ବିବିଙ୍କ ମୃତ୍ୟୁ ଆହୁରି ଯନ୍ତ୍ରଣାଦାୟକ ଥିଲା । ଅବିଜୁଲଙ୍କ ଘର କୋରେଇ ବ୍ଲକର ଫୈଜଲପୁର ଗାଁରେ । ସେ ତାଙ୍କ ଭିନ୍ନକ୍ଷମ ସ୍ୱାମୀଙ୍କ ପାଇଁ ଔଷଧ ଆଣିବାକୁ କଟକ ଯାଉଥିଲେ । କଟକ ଯିବା ପାଇଁ ଟ୍ରେନକୁ ଅପେକ୍ଷା କରିଥିବାବେଳେ ଦୁର୍ଘଟଣା ଘଟିଥିଲା । ଟ୍ରେନ ପ୍ଲାଟଫର୍ମ ଉପରକୁ ଚଢିଯାଇଥିଲା ଓ ଏହାପରେ ଟିକେଟ କାଉଣ୍ଟର ଏବଂ ୱେଟିଂ ହଲକୁ ମାଡିଯାଇଥିଲା । ଘଟଣାସ୍ଥଳରେ ହିଁ ସେ ପ୍ରାଣ ହରାଇଥିଲେ ।
ଟ୍ରେନ ଦୁର୍ଘଟଣାରେ କିନ୍ତୁ ଅନେକଙ୍କ ଜୀବନ ଅଳ୍ପକେ ବର୍ତ୍ତିଯାଇଛି । ଆହତମାନଙ୍କ ଚିକିତ୍ସା ଚାଲିଛି । ମାଲବାହୀ ଟ୍ରେନ ଦୁର୍ଘଟଣାର କାରଣ ବି ଖୋଜା ଚାଲିଛି ।