ଆଣ୍ଡାମାନ ସାଗରରେ ପହଞ୍ଚିଲା ମୌସୁମୀ । ୨୭ ମେ’ ସୁଦ୍ଧା କେରଳ ଛୁଇଁବା ସମ୍ଭାବନା । ପଢନ୍ତୁ, କେବେ ଓଡିଶାରେ ପହଞ୍ଚିବ ବୋଲି କହିଲେ ବିଶେଷଜ୍ଞ?
କନକ ବ୍ୟୁରୋ: ଆଣ୍ଡାମାନ ସାଗର ଓ ଏହା ନିକଟ ଦକ୍ଷିଣ-ପୂର୍ବ ବଙ୍ଗୋପସାଗରରେ ପହଞ୍ଚିଛି ଦକ୍ଷିଣ-ପଶ୍ଚିମ ମୌସୁମୀ ବାୟୁ । ଆଇଏମଡିର ଆକଳନ ଅନୁସାରେ ସାଧାରଣତଃ ଆଣ୍ଡାମାନ ସାଗରରେ ମୌସୁମୀ ବାୟୁ ସକ୍ରିୟ ହେବାର ୧୧ଦିନ ପରେ ମେ’ ୨୭ ତାରିଖ ବେଳକୁ କେରଳରେ ମୌସୁମୀ ବାୟୁ ସକ୍ରିୟ ହେବ । ଏଥର ମୌସୁମୀ ସଅଳ ଆସିଥିବାରୁ ଜୁନ୍ ୧୦ରୁ ୧୫ ତାରିଖ ମଧ୍ୟରେ ଏହା ଓଡିଶା ଉପକୂଳରେ ପହଞ୍ଚିବା ନେଇ ଆକଳନ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଭାରତୀୟ ପାଣିପାଗ ବିଭାଗର ସାଇକ୍ଲୋନ ସେଣ୍ଟର ମୁଖ୍ୟ ଆରକେ ଜେନାମଣିଙ୍କ କହିବା ହେଲା ଆଇଏମଡିର ପୂର୍ବ ଆକଳନ ଅନୁଯାୟୀ ଆଜି ଆଣ୍ଡାମାନ ସାଗର ଓ ଏହା ନିକଟ ଦକ୍ଷିଣ-ପୂର୍ବ ବଙ୍ଗୋପସାଗରରେ ପହଞ୍ଚିଛି ଦକ୍ଷିଣ-ପଶ୍ଚିମ ମୌସୁମୀ ବାୟୁ । ସାଧାରଣତଃ ଆଣ୍ଡାମାନ ସାଗରରେ ମୌସୁମୀ ବାୟୁ ସକ୍ରିୟ ହେବାର ୧୧ ଦିନ ପରେ କେରଳରେ ସକ୍ରିୟ ହୁଏ ଦକ୍ଷିଣ-ପଶ୍ଚିମ ମୌସୁମୀ ବାୟୁ । ତେଣୁ ଆଇଏମଡିର ଆକଳନ ଅନୁସାରେ ମେ’ ୨୭ ତାରିଖ ବେଳକୁ କେବଳରେ ମୌସୁମୀ ବାୟୁ ସକ୍ରିୟ ହେବ ।
ଅନ୍ୟପଟେ ଭାରତୀୟ ପାଣିପାଗ ବିଭାଗର ମହାନିର୍ଦ୍ଦେଶକ ମୃତ୍ୟୁଞ୍ଜୟ ମହାପାତ୍ର କହିଛନ୍ତି କେରଳକୁ ମୌସୁମୀ ଛୁଇଁବା ପରେ ଓଡିଶାରେ ଏହା କେବେ ପହଞ୍ଚିବ ସେ ନେଇ ସଠିକ ଆକଳନ କରାଯାଇ ପାରିବ । କିନ୍ତୁ ବିଗତ ବର୍ଷ ଗୁଡିକର ଧାରାରୁ ଜଣାପଡୁଛି ଯେ, କେରଳରେ ପହଞ୍ଚିବାର ୧୦ରୁ ୧୨ ଦିନ ମଧ୍ୟରେ ଓଡିଶାରେ ପହଞ୍ଚିଯାଏ ଦକ୍ଷିଣ-ପଶ୍ଚିମ ମୌସୁମୀ ବାୟୁ । ଏଥର ମୌସୁମୀ ସଅଳ ଆସିଥିବାରୁ ଜୁନ୍ ୧୦ରୁ ୧୫ ତାରିଖ ମଧ୍ୟରେ ଏହା ଓଡିଶା ଉପକୂଳରେ ପହଞ୍ଚିବା ନେଇ ଆକଳନ କରାଯାଇଛି । ତେବେ ମଡେଲ ଜନିତ ତ୍ରୁଟି ଯୋଗୁଁ ୪ ଦିନ ଆଗ-ପଛ ହୋଇପାରେ ।
ଚଳିତ ବର୍ଷ ସ୍ୱାଭାବିକ ରହିବ ମୌସୁମୀ ବର୍ଷା । ଭାରତୀୟ ପାଣିପାଗ ବିଭାଗ ଏପରି ଆକଳନ କରିଛି । ଯଦି ଆକଳନ ସତ ହୁଏ ତା ହେଲେ ତୃତୀୟ ବର୍ଷ ପାଇଁ ଦେଶରେ କ୍ରମାଗତ ସ୍ୱାଭାବିକ ବର୍ଷା ହେବାକୁ ଯାଉଛି । ଆଇଏମଡି କହିଛି ସମଗ୍ର ଦେଶରେ ମୌସୁମୀର ପ୍ରଭାବ ୯୬ ପ୍ରତିଶତରୁ ୧୦୪ ପ୍ରତିଶତ ବର୍ଷା ହେବାର ସମ୍ଭାବନା ରହିଛି ।
ଲଙ୍ଗ ପିରିୟଡ ଆଭରେଜ ଅନୁସାରେ ଦେଶରେ ୯୯ ପ୍ରତିଶତ ବର୍ଷା ହେବାର ଯଥେଷ୍ଟ ସମ୍ଭାବନା ରହିଛି । ଯଦି ଏହାଠାରୁ ୫ ପ୍ରତିଶତ ଅଧିକ କିମ୍ବା କମ୍ ବର୍ଷା ହେବ ତାହେଲେ ଏହା ସ୍ୱାଭାବିତ ବର୍ଷା ବୋଲି ବିବେଚନା କରାଯିବ ।
୨୦୨୧ରେ ଦେଶରେ ଜୁନରୁ ସେପ୍ଟେମ୍ବର ମଧ୍ୟରେ ସ୍ୱାଭାବିକ ବର୍ଷା ରେକର୍ଡ କରାଯାଇଥିଲା । ୨୦୧୯ରୁ ୨୦୨୦ ମଧ୍ୟରେ ମଧ୍ୟ ସ୍ୱାଭାବିକ ଠାରୁ ଅଧିକ ବର୍ଷା ରେକର୍ଡ ହୋଇଥିଲା । ଚଳିତଥର ମୌସୁମୀ ଋତୁରେ ଉତ୍ତର-ପଶ୍ଚିମ ଓଡିଶାରେ ବର୍ଷାର ପ୍ରଭାବ ରହିବ । ଏହି ଅଞ୍ଚଳରେ ମୌସୁମୀ ବର୍ଷା ସ୍ୱାଭାବିକଠାରୁ ଅଧିକ ରହିପାରେ ବୋଲି ଆକଳନ କରିଛି ଭାରତୀୟ ପାଣିପାଗ ବିଭାଗ । ତେବେ ୨୦୧୫ ମସିହାକୁ ଛାଡିଦେଲେ ମୌସୁମୀକୁ ନେଇ ଆଇଏମଡିର ଆକଳନ ଠିକ ହୋଇଆସିଛି ।