କନକ ବ୍ୟୁରୋ: ମଣ୍ଡିରେ ଥମୁ ନାହିଁ ଦଲାଲ ରାଜ । ଆଉ ଦଲାଲ ରାଜକୁ ରୋକିବା ଲାଗି ମାଲାକନଗିରି ଜିଲ୍ଲାରେ ଧାନ ମଣ୍ଡିକୁ ସପ୍ତାହେ ପାଇଁ ବନ୍ଦ କରିଦେଇଛି ଜିଲ୍ଲା ପ୍ରଶାସନ । କିଛି ଚାଷୀଙ୍କୁ ଆଳ କରି ଦଲାଲମାନେ ମଣ୍ଡିରେ ଧାନ ବିକ୍ରି କରି ବିଶୃଙ୍ଖଳା ସୃଷ୍ଟି କରୁଥିବାରୁ ଏଭଳି ନିଷ୍ପତି ନିଆଯାଇଛି । ଯୋଗାଣ ବିଭାଗ ଅଧିକାରୀ ପ୍ରକୃତ ଚାଷୀଙ୍କ ଘର ଘର ବୁଲି ସର୍ଭେ କରିବା ପରେ ବଳକା ଧାନ କିଣାଯିବ ବୋଲି ଜଣାପଡିଛି । ତେବେ ସପ୍ତାହକ ପାଇଁ ଧାନ ମଣ୍ଡି ବନ୍ଦ ଯୋଗୁ ମଣ୍ଡିରେ ଧାନ ଗଚ୍ଛିତ ଥିବା ବେଳେ ଚାଷୀ ହଟହଟା ହେଉଥିବା ଦେଖିବାକୁ ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ସରକାରୀ ମଣ୍ଡିରେ ଧାନ ବିକିବା ଲାଗି କଟକଣା ଥିଲେ ହେଁ କିଛି ଚାଷୀଙ୍କୁ ଅସ୍ତ୍ର କରି ସରକାରୀ ମଣ୍ଡିରେ ଧାନ ବିକ୍ରି କରୁଛନ୍ତି ଦଲାଲ । କିଛି ଦିନ ତଳେ ମାଲକାନଗିରି ଜିଲ୍ଲାର ପିଟାଗେଟା, ନିଳାକାମ୍ବେରୁ, ଖଇରପୁଟ, ଗୋବିନ୍ଦପାଲି, କାମବେଡା ମଣ୍ଡିରେ ଚଢାଉ କରି ଦଲାଲଙ୍କ ଠାରୁ ପ୍ରାୟ ୨୧୫ କ୍ୱିଂଟାଲ ଧାନ ଜବତ କରିଥିଲା ଯୋଗାଣ ବିଭାଗ । ଏହାପରେ ସପ୍ତାହେ ପାଇଁ ଧାନ ମଣ୍ଡିକୁ ବନ୍ଦ କରି ଦେଇଛି ଜିଲ୍ଲା ଯୋଗାଣ ବିଭାଗ । ଦଲାଲଙ୍କୁ ରୋକିବା ପାଇଁ ପ୍ରଶାସନର ଏପରି ନିଷ୍ପତି ଯୋଗୁ ହଟହଟା ହେଉଛନ୍ତି ପ୍ରକୃତ ଚାଷୀ । ମଣ୍ଡିରେ ଧାନ ଗଚ୍ଛିତ ରଖି ନିଜ ପାଳିକୁ ଅନାଇ ବସିଛନ୍ତି ଚାଷୀ ।
ଚଳିତ ଖରିପ ଋତୁରେ ମାଲାକନଗିରି ଜିଲ୍ଲାର ୩୮ହଜାର ୫୦୦ ପଂଜିକୃତ ଚାଷୀଙ୍କ ଠାରୁ ୯ ଲକ୍ଷ ୩୬ ହଜାର କ୍ୱିଂଟାଲ ଧାନ କିଣିବାକୁ ଲକ୍ଷ୍ୟ ରଖାଯାଇଛି । ଗତ ୫ ସପ୍ତାହରେ ପ୍ରାୟ ୧୮ ହଜାର ଚାଷୀଙ୍କ ଠାରୁ ୮ ଲକ୍ଷ ୪୦ ହଜାର କ୍ୱିଂଟାଲ ଧାନ କିଣା ସରିଛି । ଏବେ ଦଲାଲଙ୍କ ଦୌରାତ୍ମ୍ୟ ଯୋଗୁଁ ମଣ୍ଡିକୁ ବନ୍ଦ କରାଯାଇଛି । ଯୋଗାଣ ବିଭାଗ ପକ୍ଷରୁ ବଳକା ୧୮ ହଜାର ଚାଷୀଙ୍କ ଘରକୁ ଘର ବୁଲି ଜମିର ଯାଂଚ କରିବେ ଯୋଗାଣ ଅଧିକାରୀ । ୨୦୦ଟି ଟିମ୍ ଜମି ଓ ଧାନର ପରିମାଣ ଯାଂଚ କରିବା ପରେ ଧାନ କିଣିବ ପ୍ରଶାସନ ।
ମଣ୍ଡି ବ୍ୟବସ୍ଥାରେ ସ୍ୱଚ୍ଛତା ଆଣିବା ସହ ଦଲାଲ ରାଜ ରୋକିବା ଲାଗି ପଦକ୍ଷେପ୍ ଗ୍ରହଣ କରାଯାଇଛି । ତଥାପି କିନ୍ତୁ ମାଲାକନଗିରି ପରି ଉପାନ୍ତ ଅଂଚଳରେ ମଣ୍ଡିରେ ଦଲାଲଙ୍କ ଉପଦ୍ରବ କମ ହେଉନାହିଁ ।