କନକ ବ୍ୟୁରୋ: ଚଳିତ ପଂଚାୟତ ନିର୍ବାଚନରେ ଅନେକ ଉଚ୍ଚ ଶିକ୍ଷିତ ଯୁବକ ଯୁବତୀ ସାମିଲ ହୋଇଛନ୍ତି । ଗାଁ ରାଜନୀତିରୁ ଭବିଷ୍ୟତର ସ୍ୱପ୍ନ ଦେଖୁଛନ୍ତି । ହେଲେ ରାୟଗଡା ଜିଲ୍ଲାର ରବି ଶଙ୍କର ଗମାଙ୍ଗ ପୁଲିସ ଚାକିରି ଛାଡି ପଂଚାୟତ ନିର୍ବାଚନରେ ପ୍ରାର୍ଥୀ ହୋଇଛନ୍ତି । ରାମାନାଗୁଡା ବ୍ଲକ ଉକାମ୍ବା ପଂଚାୟତରୁ ସମିତି ସଭ୍ୟ ପ୍ରାର୍ଥୀ ଭାବେ ନିର୍ବାଚନ ମଇଦାନକୁ ଓହ୍ଲାଇଛନ୍ତି ରବି ଶଙ୍କର । ମାଟି ମାଆର ସେବା ଓ ନିଜ ଅଂଚଳର ବିକାଶ ପାଇଁ ପୁଲିସ ଚାକିରିକୁ ପଛ କରିଥିବା ରବି ଶଙ୍କର ଗମାଙ୍ଗଙ୍କୁ ନେଇ ଏବେ ସମଗ୍ର ଜିଲ୍ଲାରେ ଚର୍ଚ୍ଚା ହେଉଛି ।
Kanak News is now on WhatsApp
Join and get latest news updates delivered to you via WhatsApp
୨୦୦୬ରେ ରାଜନୀତି ବିଜ୍ଞାନରେ ସ୍ନାତକତ୍ତୋର ହାସଲ କରିବା ପରେ ୨୦୧୦ରେ ପୁଲିସ ବିଭାଗରେ ଯୋଗ ଦେଇଥିଲେ ରବି ଶଙ୍କର । ୭ ବର୍ଷ ଏସଆଇ ଭାବେ କାମ କରିବା ପରେ ୨୦୧୭ରେ ଓଏସଏପି ବାଟାଲିୟନର ଇନ୍ସପେକ୍ଟର ଭାବେ ପଦୋନ୍ନତି ପାଇଥିଲେ । କିନ୍ତୁ ରାଜନୀତି କରିବା ପାଇଁ ଇଛା ତାଙ୍କୁ ଚାକିରି ଜୀବନକୁ ଦୂରେଇ ଦେଇଛି ।
୨୦୧୮ରେ ଚାକିରି ଛାଡି ବିଜେପିରେ ସାମିଲ ହୋଇଥିବା ବେଳେ ୨୦୧୯ ସାଧାରଣ ନିର୍ବାଚନରେ ଗୁଣୁପୁରରୁ ବିଧାୟାକ ପ୍ରାର୍ଥୀ ଭାବେ ଲଢିବାକୁ ଆଶା ରଖିଥିଲେ । ହେଲେ ସେତେବେଳେ ଦଳ ତାଙ୍କୁ ଟିକେଟ ଦେଇନଥିବାରୁ ଏବେ ପଂଚାୟତ ନିର୍ବାଚନରେ ସମିତି ସଭ୍ୟ ପ୍ରାର୍ଥୀ ହୋଇଛନ୍ତି ରବି ଶଙ୍କର । ଚଳିତ ପଂଚାୟତ ନିର୍ବାଚନରେ ଉକମ୍ବା ପଂଚାୟତରୁ ଜଣେ ଉଚ ଶିକ୍ଷିତ ଯୁବକ ସମିତି ସଭ୍ୟ ପାଇଁ ନାମାଙ୍କନ ଦାଖଲ କରିଥିବାରୁ ଅଂଚଳ ବାସୀ ମଧ୍ୟ ଖୁସି ଜାହିର କରିଛନ୍ତି ।