ଅନ୍ଧାରକୁ ଠେଲି ହୋଇଯାଉଛି ୟୁକ୍ରେନ ଫେରନ୍ତା ଡାକ୍ତରୀ ଛାତ୍ରଙ୍କ ଭବିଷ୍ୟତ। ଭୁବନେଶ୍ୱରରେ ଶୋଭାଯାତ୍ରା କରି ସରକାରଙ୍କୁ କଲେ ଅପିଲ୍।
କନକ ବ୍ୟୁରୋ: କଲେଜ ପଢିଲା ବେଳଠୁ ଡାକ୍ତର ହେବାର ସ୍ୱପ୍ନ ଦେଖିଥିଲେ ସତ୍ୟବ୍ରତ । ଭାରତର ଘରୋଇ ଡାକ୍ତରଖାନାରେ ପଢିବା ଖର୍ଚ୍ଚ କୋଟିଏ ଟଙ୍କା ଉପରେ ହେବାରୁ ୟୁକ୍ରେନ ଯାଇ ପଢିବାକୁ ନିଷ୍ପତ୍ତି ନେଲେ । ପ୍ରଥମ ପର୍ଯ୍ୟାୟରେ ଆଡମିଶନ ବେଳକୁ ୧୦ ଲକ୍ଷ ଆବଶ୍ୟକ ପଡିଥିଲା । ମଧ୍ୟବିତ୍ତ ପରିବାରରେ ଏତେ ଟଙ୍କା ଯୋଗାଡ କରିବା ଏତେ ସହଜ ନଥିଲା । ଘରର ରୋଜଗାର କହିଲେ ଚାଷ ବାସ ଓ ବାପାଙ୍କର ଛୋଟିଆ ବ୍ୟବସାୟ । ବ୍ୟାଙ୍କ ଋଣ ସାଙ୍ଗକୁ ହାତ ଉଧାରି କରି ପୁଅ ପାଇଁ ଟଙ୍କା ଯୋଗାଡ କରିଥିଲେ । ସତ୍ୟବ୍ରତଙ୍କ ଭଳି ଅଂକସିତାଙ୍କ ପରିବାର ଲୋକ ବି ଋଣ କରି ଝିଅକୁ ୟୁକ୍ରେନ ପଠାଇଥିଲେ । ଯୁଦ୍ଧ ପରେ ଓଡିଶା ଫେରିଆସିବା ପରେ ଭବିଷ୍ୟତକୁ ନେଇ ସେ ବି ଚିନ୍ତାରେ ପଡିଯାଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ରୁଷ ୟୁକ୍ରେନ ଯୁଦ୍ଧ ସମୟରୁ ଓଡିଶା ଫେରିଆସିଥିବା ଡାକ୍ତରୀ ଛାତ୍ରଛାତ୍ରୀ ଆଗକୁ କଣ କରିବେ ଏହାର ଉତ୍ତର ପାଉନଥିବାବେଲେ ସରକାରଙ୍କ ସହଯୋଗକୁ କରିଛନ୍ତି ଅପେକ୍ଷା । ଏବେ ଏହି ଛାତ୍ରଛାତ୍ରୀମାନେ ଅନଲାଇନରେ କ୍ଲାସ କରିଥିବା ବେଳେ ପ୍ରାକ୍ଟିକାଲ କରିପାରୁନାହାନ୍ତି । ତେଣୁ ଏନେଇ ତାଙ୍କୁ ସହାୟତା କରିବାକୁ ଦାବି କରିଛନ୍ତି । ଏନେଇ ଡାକ୍ତରୀ ଛାତ୍ରଛାତ୍ରୀମାନେ ଭୁବନେଶ୍ୱର ଲୋୟର ପିଏମଜିରେ ଧାରଣା ଦେବା ସହ ଶୋଭାଯାତ୍ରା କରିଛନ୍ତି । ଦୁଇ ଶହରୁ ଅଧିକ ଛାତ୍ରଛାତ୍ରୀ ଏହି ଶୋଭାଯାତ୍ରାରେ ସାମିଲ ହୋଇଥିଲେ । ଏହାସହ ଏନଏମସି ବା ନ୍ୟାସନାଲ ମେଡିକାଲ କମିଶନ ନିୟମ କୋହଳ କରି ସେମାନଙ୍କୁ ଦେଶ ଭିତରେ ଗୋଟିଏ ସମୟ ପାଇଁ ସିଟ୍ ବଢାଇ ଆଡମିଶନ ପାଇଁ ସରକାର ବ୍ୟବସ୍ଥା କରନ୍ତୁ ବୋଲି ମେଡିକାଲ ଛାତ୍ରଛାତ୍ରୀ ଦାବି କରିଛନ୍ତି ।
ପରିସ୍ଥିତି ଏଭଳି ହୋଇଛି କି ଏହି ଛାତ୍ରଛାତ୍ରୀ ନା ୟୁକ୍ରେନ ଫେରିପାରୁଛନ୍ତି ନା ଆଗକୁ ପଢିପାରୁଛନ୍ତି । କେବଳ ଚାହିଁବସିଛନ୍ତି କେନ୍ଦ୍ର ସରକାରଙ୍କ ସାହାଯ୍ୟକୁ । ଯଦି କେନ୍ଦ୍ର ସରକାର ନଶୁଣେ ତେବେ କଣ ହେବ ଭବିଷ୍ୟତ ତାର ଉତ୍ତର ମଧ୍ୟ କାହାରି ପାଖରେ ନାହିାଁ