ରାହୁଲ ଗାନ୍ଧୀଙ୍କୁ ଭେଟିଲେ ବୋଲି ଚାଲିଗଲା ଚାକିରି, ଚର୍ଚ୍ଚାରେ ମଧ୍ୟପ୍ରଦେଶର ଏହି ଶିକ୍ଷକ
କନକ ବ୍ୟୁରୋ: ରାହୁଲ ଗାନ୍ଧୀଙ୍କୁ ଭେଟିଲେ ବୋଲି ଶିକ୍ଷକଙ୍କୁ ହରାଇବାକୁ ପଡିଲା ଚାକିରି । ଏଭଳି ଅଭାବନୀୟ ଘଟଣା ଘଟିଛି ମଧ୍ୟପ୍ରଦେଶ ବଡବାନୀ ଜିଲ୍ଲାର ପ୍ରାଥମିକ ଶାଲାକୁଜରୀ ବିଦ୍ୟାଳୟର ଶିକ୍ଷକଙ୍କ ସହ । ଏହି ଘଟଣାକୁ ନେଇ ଏବେ ସେ ସାରା ରାଜ୍ୟରେ ଚର୍ଚ୍ଚାର ବିଷୟ ପାଲଟିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଶିକ୍ଷକ ରାଜେଶ କନୋଜେ ନଭେମ୍ବର ୨୪ ତାରିଖରେ ଆଦିବାସୀଙ୍କ ସମସ୍ୟା ନେଇ ପଦଯାତ୍ରାରେ ଥିବା କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ଭେଟିଥିଲେ । ଜଳ, ଜଙ୍ଗଲ, ଜମି କମ୍ପାନୀ ହାତକୁ ଚାଲିଯାଉଛି । ଗରିବ ଆଦିବାସୀଙ୍କୁ ସେମାନଙ୍କର ଅଧିକାରରୁ ବଞ୍ଚିତ କରାଯାଉଛି ଏକଥା ରାହୁଲ ଗାନ୍ଧୀଙ୍କୁ ଜଣାଇଥିଲେ । ପରଦିନ ତାଙ୍କ ଚାକିରି ଆଉ ନାହିଁ । ଶିକ୍ଷାଧିକାରୀ ତାଙ୍କୁ ନିଲମ୍ବନ କରାଯାଇଛି ବୋଲି ନିର୍ଦ୍ଦେଶନାମା ପଠାଇଥିଲେ ।
ନିଲମ୍ବନ ପତ୍ରରେ ଉଲ୍ଲେଖ ଥିଲା ଯେ, ‘ ରାଜନୈତିକ ଦଳର ରାଲିରେ ସାମିଲ ହୋଇ ସେ ରାଜ୍ୟର ସିଭିଲ ସେବା ଆଚରଣ ବିଧି-୧୯୬୫ ନିୟମ-୫କୁ ଉଲଙ୍ଘନ କରିଛନ୍ତି । ଏହି କାରଣରୁ ତାଙ୍କୁ ତତ୍କାଳ ନିଲମ୍ବନ କରାଯାଉଛି’ ।
ଏହି ଘଟଣା ଚାହୁଁଚାହୁଁ ଚାରିଆଡେ ପ୍ରଘଟ ହୋଇଗଲା । ଆଉ ଏହାକୁ ଏହାକୁ ନେଇ ରାଜନୀତି ବି ଉଷ୍ମ ହେବାରେ ଲାଗିଛି । କଂଗ୍ରେସ ବିଧାୟକ ଓ ମଧ୍ୟପ୍ରଦେଶ ପୂର୍ବ ଗୃହମନ୍ତ୍ରୀ ବିଜେପିକୁ ଟାର୍ଗେଟ କରିଛନ୍ତି । ପ୍ରକୃତରେ ରାହୁଲ ଗାନ୍ଧୀଙ୍କ ପଦଯାତ୍ରାରେ ବିଜେପି ତଥା ରାଜ୍ୟ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନ୍ ଭୟଭୀତ ହୋଇପଡିଛନ୍ତି । ତେଣୁ ରାହୁଲଙ୍କୁ ଯିଏ ଭେଟୁଛନ୍ତି ତା’ ଉପରେ ଆକ୍ରୋଶ ରଖୁଛନ୍ତି । ତେବେ ସମୟ ଆସିଲେ ଏହାର ହିସାବନିକାଶ ହେବ ବୋଲି ଉଭୟ କଂଗ୍ରେସ ନେତା କହିଛନ୍ତି । ଅନ୍ୟପଟେ ଶିକ୍ଷକଙ୍କ ବିରୋଧରେ ହୋଇଥିବା ଏପରି କାର୍ଯ୍ୟାନୁଷ୍ଠାନକୁ ନେଇ ସମ୍ପୃକ୍ତ ଶିକ୍ଷାଧିକାରୀ କିଛି କହିବାକୁ ମନା କରିଛନ୍ତି ।