କନକ ବ୍ୟୁରୋ : ଏବେ କିଛିଦିନ ହେବ ‘ଦ କେରଳ ଷ୍ଟୋରୀ’ ସିନେମାକୁ ନେଇ ବେଶ୍ ଚର୍ଚ୍ଚା ଲାଗି ରହିଛି । ଏହି ସିନେମାକୁ ନେଇ ରାଜନୀତି ମଧ୍ୟ ଜୋର ଧରୁଛି । କିଛି ବିଜେପି ଶାସିତ ରାଜ୍ୟ ସରକାର ଏହି ସିନେମା ଉପରୁ ପ୍ରମୋଦ କର ଛାଡ କରିଥିବା ବେଳେ କିଛି ଅଣ ବିଜେପି ଶାସିତ ରାଜ୍ୟ ସରକାର ଏହି ସିନେମାକୁ ସେମାନଙ୍କ ରାଜ୍ୟରେ ବ୍ୟାନ କରିଛନ୍ତି । ଏହି କ୍ରମରେ ମଧ୍ୟ ପ୍ରଦେଶ ଓ ଉତ୍ତର ପ୍ରଦେଶ ସରକାର ଏହି ସିନେମା ଉପରୁ ପ୍ରମୋଦ କର ଛାଡ କରିଥିବା ବେଳେ ତାମିଲନାଡୁ ଓ ପଶ୍ଚିମବଙ୍ଗ ସରକାର ଏହି ସିନେମାକୁ ସେମାନଙ୍କ ରାଜ୍ୟରେ ବ୍ୟାନ କରିଛନ୍ତି । ହେଲେ ଗୁଜରାଟର ଜଣେ ଚା’ ବିକାଳି ଏବେ ଏହି ସିନେମାକୁ ନେଇ କିଛି ନିଆରା ଅଫର ରଖିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଚା’ ଦୋକାନୀ କହିଛନ୍ତି କି ଯେଉଁମାନେ ‘ଦ କେରଳ ଷ୍ଟୋରୀ’ ସିନେମା ଦେଖି ଫେରିବା ପରେ ତାଙ୍କୁ ଏହି ସିନେମାର ଟିକେଟ ଦେଖାଇବେ ସେ ତାଙ୍କୁ ମାଗଣାରେ ଚା’ ଓ କଫି ପିଇବାକୁ ଦେବେ । ଏହାସହ ଏନେଇ ସେ ଦୋକାନ ଆଗରେ ଏକ ପୋଷ୍ଟର ମଧ୍ୟ ଲଗାଇଛନ୍ତି । ଏହି ଅଫର ବାବଦରେ ଶୁଣିବା ପରେ ଅନେକ ଲୋକ ସିନେମା ଦେଖି ସାରିବା ପରେ ହାତରେ ଟିକେଟ ଧରି ଏହି ଚା’ ଦୋକାନରେ ଭିଡ ଲଗାଉଥିବା ଦେଖିବାକୁ ମିଳିଛି । ଏହି ଅଫର ମେ’ମାସ ୧୫ ତାରିଖ ପର୍ଯ୍ୟନ୍ତ ଚାଲିବ ବୋଲି ଦୋକାନୀ ଜଣଙ୍କ କହିଛନ୍ତି ।