କନକ ବ୍ୟୁରୋ: ବିଗତ ଦିନରେ ପୂର୍ବ ଭାରତର ବିକାଶ ପାଇଁ ଓଡ଼ିଶା ପ୍ରୟୋଗଶାଳା ପାଲଟିବ ବୋଲି କହିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଏବେକିନ୍ତୁ ମୋଦୀଙ୍କ ପାଇଁ ରାଜନୀତିର ପ୍ରୟୋଗଶାଳା ପାଲଟିଛି ଓଡ଼ିଶା । ରାଜ୍ୟରେ ସରକାର ଦଖଲ ପାଇଁ ବିଜେପି ଯେଉଁ ସମରସଜା କରିଛି, ସେଥିରୁ ଏଭଳି ସଂକେତ ମିଳୁଛି । ତିନିଦିନର ବ୍ୟବଧାନରେ ପୁଣିଥରେ ମୋଦୀ ଓଡ଼ିଶା ଆସୁଛନ୍ତି । ଏକାଧିକ ମନ୍ତ୍ରୀ ଓ ବିଜେପି ମୁଖ୍ୟମନ୍ତ୍ରୀଙ୍କ ଗସ୍ତ କାର୍ଯ୍ୟକ୍ରମ ରହିଛି । ଆଉ ଏହାକୁ କାଉଂଟର କରିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ଭି.କେ ପାଣ୍ଡିଆନଙ୍କ ମାରାଥନ ପ୍ରଚାର ଜାରି ରହିଛି । କହିବାକୁ ଗଲେ ଏଥର ନିର୍ବାଚନରେ ବଡ଼ ଧରଣର ଲଢ଼େଇ ହେଉଛି ।
Kanak News is now on WhatsApp
Join and get latest news updates delivered to you via WhatsApp
୨୦୨୪ ବାଜି ଜିତିବା ପାଇଁ ବିଜେପିର କେନ୍ଦ୍ର ନେତୃତ୍ୱ ଅଂଟା ଭିଡ଼ିବା ପରେ ନୂଆ ମୋଡ଼ ନେଇଛି ରାଜ୍ୟ ରାଜନୀତି । କିଛି ଦିନ ପୂର୍ବରୁ ଲାଗୁଥିଲା, ୪୦୦ ପାର୍ର ନାରା ଦେଇ ରଣନୀତି କରୁଛି ବିଜେପି । ଏବେ କିନ୍ତୁ ସ୍ଥିତି ବଦଳି ଯାଇଛି । କେବଳ କେନ୍ଦ୍ରରେ ନୁହେଁ ଓଡ଼ିଶାରେ ମଧ୍ୟ ସରକାର ଗଢିବା ପାଇଁ ସୁଯୋଗ ରହିଥିବା ଆକଳନ କରୁଛନ୍ତି ବିଜେପିର ଶୀର୍ଷ ନେତୃତ୍ୱ । ଜୁନ ୧୦ରେ ବିଜେପି ସରକାର ଶପଥ ଗ୍ରହଣ କରିବ ବୋଲି ପ୍ରଧାନମନ୍ତ୍ରୀ ଦୃଢ଼ୋକ୍ତି ଦେଖାଇବା ପରେ ଏହା ସ୍ପଷ୍ଟ ହୋଇଯାଇଛି ।
ବ୍ରହ୍ମପୁର ଓ ନବରଙ୍ଗପୁରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ରଣହୁଙ୍କାର ପରେ ରାଜ୍ୟ ବିଜେପି ଶିବିରରେ ଉତ୍ସାହ ଭରିଯାଇଛି । ୧୦ ତାରିଖରେ ପୁଣି ଓଡ଼ିଶା ଗସ୍ତରେ ଆସିବେ ପ୍ରଧାନମନ୍ତ୍ରୀ ।
ଭୁବନେଶ୍ୱରରେ ରୋଡ୍ ସୋ’ କରିବେ ମୋଦୀ
ସନ୍ଧ୍ୟା ୬ଟାରେ ମାଷ୍ଟରକ୍ୟାଂଟିନ୍ ଛକରୁ ବାଣୀବିହାର ପର୍ଯ୍ୟନ୍ତ ଚାଲିବ ମୋଦୀଙ୍କ ରୋଡ୍ ସୋ’
ମାତ୍ର ୩ ଦିନ ବ୍ୟବଧାନରେ ଏହା ହେବ ମୋଦୀଙ୍କ ଦ୍ୱିତୀୟ ଗସ୍ତ । ୧୧ ତାରିଖରେ ପ୍ରଧାନମନ୍ତ୍ରୀଙ୍କ ବଲାଙ୍ଗୀର ଗସ୍ତ କାର୍ଯ୍ୟକ୍ରମ ରହିଛି । ସେଥିପାଇଁ ଜୋରଦାର ପ୍ରସ୍ତୁତି ଆରମ୍ଭ ହୋଇଯାଇଛି ।
ଦୁଇ ଦିନରେ ଆସୁଛନ୍ତି ୨ କେନ୍ଦ୍ରମନ୍ତ୍ରୀ ଓ ୨ ବିଜେପି ମୁଖ୍ୟମନ୍ତ୍ରୀ
ପ୍ରଚାର ପାଇଁ ଓଡ଼ିଶା ଆସିବେ ଡ୍ରିମ୍ ଗାର୍ଲ ହେମା ମାଳିନୀ
ପ୍ରଚାରକୁ ଆହୁରି ଶାଣୀତ କରିବା ପାଇଁ ବିଜେପିର ବଡ଼ ବଡ଼ ନେତା ଆସୁଛନ୍ତି ଓଡ଼ିଶା ।
କାଲି ରାୟଗଡ଼ା ଓ ନବରଙ୍ଗପୁରରେ କେନ୍ଦ୍ରମନ୍ତ୍ରୀ ରାଜନାଥ ସିଂହଙ୍କ ଜନସଭା
୯ ତାରିଖରେ କେନ୍ଦ୍ରମନ୍ତ୍ରୀ ନୀତିନ ଗଡ଼କାରୀଙ୍କ ପୁରୀ ଗସ୍ତ
ନବରଙ୍ଗପୁରରେ ଜନସଭା କରିବେ ଛତିଶଗଡ଼ ମୁଖ୍ୟମନ୍ତ୍ରୀ ବିଷ୍ଣୁଦେବ ସାଏ
ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମାଙ୍କ ଚିତ୍ରକୋଣ୍ଡା ଓ ଖଲ୍ଲିକୋଟ ଗସ୍ତ କାର୍ଯ୍ୟକ୍ରମ
ସେହିପରି ଓଡ଼ିଶାରେ ନିର୍ବାଚନ ପ୍ରଚାର ପାଇଁ ଆସିବେ ଡ୍ରିମ୍ ଗାର୍ଲ ହେମା ମାଳିନୀ । ରାଜ୍ୟ ବିଜେପିର ଷ୍ଟାର ପ୍ରଚାରକ ତାଲିକାରେ ସାଂସଦ ହେମା ମାଳିନୀଙ୍କ ନାଁ ସ୍ଥାନ ପାଇଛି । ଏହା ସହ ଅର୍ଜୁନ ମୁଣ୍ଡା, ବିଷ୍ଣୁଦେବ ସାଏଙ୍କ ନାଁ ମଧ୍ୟ ଷ୍ଟାର ପ୍ରଚାରକ ତାଲିକାରେ ରଖାଯାଇଛି ।
ଗୋଟିଏ ପଟେ କେନ୍ଦ୍ରୀୟ ନେତାଙ୍କୁ ନେଇ ବିଜେପି ପୂରା ଦମ୍ ଲଗାଇ ଦେଇଥିବା ବେଳେ ବିଜେଡିର ଏକ ନମ୍ବର ଷ୍ଟାର ପ୍ରଚାରକ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ୨ ନମ୍ବର ଷ୍ଟାର ପ୍ରଚାରକ କାର୍ତିକ ପାଣ୍ଡିଆନ୍ ବିଭିନ୍ନ ନିର୍ବାଚନ କ୍ଷେତ୍ରକୁ ଘନ ଘନ ଗସ୍ତ କରି ଭୋଟ୍ ଅପିଲ୍ କରୁଛନ୍ତି । ଜନସଭା ଓ ରୋଡ ସୋ’ କରି ବିରୋଧୀଙ୍କୁ ଟାର୍ଗେଟ କରିବା ସହ ସରକାରଙ୍କ ୨୫ ବର୍ଷର ସଫଳତା ସଂପର୍କରେ ବୁଝାଉଛନ୍ତି । ଏପଟେ ବିଜେପି କେନ୍ଦ୍ରୀୟ ନେତୃତ୍ୱଙ୍କ ଗସ୍ତ ଓଡ଼ିଶାରେ କିଛି ପ୍ରଭାବ ପକାଇବ ନାହିଁ ବୋଲି କହିଛି ବିଜେଡି ।
ପୂର୍ବ, ପଶ୍ଚିମ, ଉତ୍ତର, ଦକ୍ଷିଣ ରାଜ୍ୟର ସବୁ ନିର୍ବାଚନମଣ୍ଡଳୀ ଉପରେ ଫୋକସ କରୁଛନ୍ତି ଉଭୟ ବିଜେଡି ଓ ବିଜେପି । ସୂଚନା ଅନୁସାରେ ଓଡ଼ିଶାର ଅଧିକାଂଶ ଲୋକସଭା କ୍ଷେତ୍ରରେ ଜନସଭା କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ।