କଳାହାଣ୍ଡି ଓ ଗଞ୍ଜାମର ବିଭିନ୍ନ ସ୍ଥାନରେ କାଳବୈଶାଖୀର ତାଣ୍ଡବ: ପ୍ରବଳ ବର୍ଷା ସାଙ୍ଗକୁ ବହିଲା ପବନ, ଭାଙ୍ଗିଲା ବଡ ବଡ ଗଛ ଆଉ ଘର
କନକ ବ୍ୟୁରୋ: କଳାହାଣ୍ଡି କୋକସରାରେ କାଳବୈଶାଖୀ ତାଣ୍ଡବ । କାଳବୈଶାଖୀ ପ୍ରଭାବରେ କୋକସରା ବ୍ଲକରେ ପ୍ରବଳ ବର୍ଷା ସାଙ୍ଗକୁ ପବନ ହୋଇଛି । ପବନ ଓ ବର୍ଷା ଯୋଗୁଁ ଜନଜୀବନ ଅସ୍ତବ୍ୟସ୍ତ ହୋଇପଡିଛି । ପବନ ଯୋଗୁଁ ବିଭିନ୍ନ ଅଂଚଳରେ ବଡ ବଡ ଗଛ ଭାଙ୍ଗି ପଡିଛି । ଗଛଗୁଡିକ ୨୬ନମ୍ବର ଜାତୀୟ ରାଜପଥରେ ପଡ ରହିଛି । ଗଛଗୁଡିକୁ କାଟି ରାସ୍ତା ଅବରୋଧ ହଟାଯାଉଛି । ସେହିପରି ବିଦ୍ୟୁତ୍ ସେବା ବାଧାପ୍ରାପ୍ତ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଗତ କିଛି ଦିନ ଧରି ତତଲା କଡେଇରେ ସିଝୁଥିବା ଗଞ୍ଜାମ ଜିଲ୍ଲାର ବିଭିନ୍ନ ସ୍ଥାନରେ କାଳବୈଶାଖୀ ପ୍ରଭାବରେ ପ୍ରବଳ ପବନ ସହ ବର୍ଷା ଅନୁଭୂତ ହୋଇଛି । ଗତକାଲି ଅପରାହ୍ନ ୨ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ବ୍ରହ୍ମପୁର ସହର ସମେତ ସମଗ୍ର ଜିଲ୍ଲାରେ ବର୍ଷା ହୋଇଛି । ଭଞ୍ଜନଗରରେ ଦୁଇ ଘଂଟା କାଳ କୁଆପଥର ମାଡ ସାଙ୍ଗକୁ ପ୍ରବଳ ପବନ ଓ ବର୍ଷା ଯୋଗୁ ଜନଜୀବନ ଅସ୍ତବ୍ୟସ୍ତ ହୋଇଛି । ବଡ ବଡ ଗଛ ଭାଙ୍ଗି ପଡିବା ଯୋଗୁଁ ରାସ୍ତା ଅବରୋଧ ହେବା ସହ ଘର ଭାଙ୍ଗି ଯାଇଛି । କେତେକ ସ୍ଥାନରେ ଘରର ଚାଳଛପର ଓ ଟିଣ ବି ଉଡିଯାଇଛି । ବିଦ୍ୟୁତ୍ ଓ ଫୋନ ସେବା ଠପ୍ ହୋଇଯାଇଛି ।
ସେପଟେ, ଓଡିଶାରେ ମୌସୁମୀ ଆସିବା ବିଳମ୍ବ ହୋଇପାରେ । ଏଭଳି ଆକଳନ କରିଛି ପାଣିପାଗ ବିଭାଗ । ପୂର୍ବରୁ ଜୁନ୍ ମାସ ପ୍ରଥମ ସପ୍ତାହରେ ମୌସୁମୀ ଆସିବ ବୋଲି ଅନୁମାନ କରାଯାଉଥିବା ବେଳେ ଏବେ ସାମାନ୍ୟ ବିଳମ୍ବ ହେବ ବୋଲି ଆଇଏମଡି ଆକଳନ କରିଛି । ଭାରତୀୟ ପାଣିପାଗ ବିଭାଗର ସୂଚନାର ଅନୁସାରେ ଆସନ୍ତା ୨୪ ଘଂଟା ମଧ୍ୟରେ ଆରବ ମହାସାଗରର ଦକ୍ଷିଣ ଏବଂ ବଙ୍ଗୋପମହାସାଗର ଅଧିକାଂଶ ସ୍ଥାନରେ ମୌସୁମୀ ଆସିବାର ସମ୍ଭାବନା ରହିଛି । ୬ ତାରିଖରେ କେରଳରେ ମୌସୁମୀ ଛୁଇଁବା ସହ ଓଡିଶାରେ ଏହାର ପ୍ରବାହ ଆସନ୍ତା ୧୦ ରୁ ୧୨ ମଧ୍ୟରେ ଆସିବାର ସମ୍ଭାବନା ରହିଛି । ଏହାର ପ୍ରଭାବରେ କେତେକ ସ୍ଥାନରେ ପାକ୍ ମୌସୁମୀ ବର୍ଷା ହେବାର ସମ୍ଭାବନା ରହିଛି । ସେହିପରି ଆଜି ରାଜ୍ୟର କେତେକ ସ୍ଥାନରେ କାଳବୈଶାଖୀ ହେବାର ସମ୍ଭାବନା ଅଛି । ଏହାର ପ୍ରଭାବରେ ବାଲେଶ୍ୱର, ଭଦ୍ରକ, କେନ୍ଦୁଝର, ଗଞ୍ଜାମ, ଗଜପତି, ମୟୁରଭଂଜ, କଳାହାଣ୍ଡି, କନ୍ଧମାଳ ଆଦି ସ୍ଥାନରେ ବର୍ଷା ହେବାର ସମ୍ଭାବନା ରହିଛି ।