କଞ୍ଝୱାଲା ଦୁର୍ଘଟଣା ମାମଲା । ମୃତ ଅଞ୍ଜଳୀଙ୍କ ମା’ଙ୍କୁ ଭେଟିଲେ ଦିଲ୍ଲୀ ମୁଖ୍ୟମନ୍ତ୍ରୀ, ୧୦ ଲକ୍ଷର ସହାୟତା ରାଶି ଘୋଷଣା
କନକ ବ୍ୟୁରୋ : ଦିଲ୍ଲୀ ସୁଲତାନପୁରୀ କଞ୍ଝୱାଲା ନିକଟରେ ନୂଆବର୍ଷ ରାତିରେ ହୋଇଥିବା ସଡକ ଦୁର୍ଘଟଣାକୁ ନେଇ ଏବେ ବି କିଛି ସ୍ପଷ୍ଟଚିତ୍ର ଆସିପାରି ନାହିଁ । ଏବେ ଏହାକୁ ଏକ ଦୁର୍ଘଟଣା ଭାବେ ପୋଲିସ ତଦନ୍ତ ଜାରି ରଖିଛି । ଏସବୁ ଭିତରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଆଜି ମୃତ ଅଞ୍ଜଳୀଙ୍କ ପରିବାର ସହ କଥା ହୋଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଦିଲ୍ଲୀ ମୁଖ୍ୟମନ୍ତ୍ରୀ ଅଞ୍ଜଳୀଙ୍କ ପରିବାରକୁ ସମବେଦନା ଜଣାଇବା ସହ ୧୦ ଲକ୍ଷ ଟଙ୍କାର ଆର୍ଥିକ ସହାୟତା ଘୋଷଣା କରିଛନ୍ତି । କେଜ୍ରିୱାଲ କହିଛନ୍ତି କି, କୌଣସି ପରିସ୍ଥିତିରେ ଅଞ୍ଜଳୀଙ୍କ ପରିବାରକୁ ନ୍ୟାୟ ଦେବାକୁ ଚେଷ୍ଟା କରାଯିବ । ବଡ ବଡ ଓକିଲଙ୍କୁ ଏହି ମାମଲାରେ ନିୟୋଜିତ କରାଯିବ ବୋଲି ସେ କହିବା ସହ ସେ କହିଛନ୍ତି କି ଅଞ୍ଜଳୀଙ୍କ ମା ଏବେ ସମ୍ପୂର୍ଣ୍ଣ ରୋଗଗ୍ରସ୍ତ ଅଛନ୍ତି । ଦିଲ୍ଲୀ ସରକାରଙ୍କ ତରଫରୁ ତାଙ୍କର ଚିକିତ୍ସା ସମ୍ପୂର୍ଣ୍ଣ ମାଗଣାରେ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି ଦିଲ୍ଲୀ ମୁଖ୍ୟମନ୍ତ୍ରୀ ।
ସେପଟେ ଆଜି ଅଞ୍ଜଳୀଙ୍କ ପୋଷ୍ଟମର୍ଟମ୍ ରିପୋର୍ଟ ଆସିଛି । ଏହି ରିପୋର୍ଟ ମୁତାବକ ପୀଡିତାଙ୍କ ସହ କୌଣସି ଯୌନ ଉତ୍ପୀଡନ ହୋଇନାହିଁ । ହେଲେ ତାଙ୍କ ମୃତ ଶରୀରରେ ଅନେକ ଅଘାତ ଚିହ୍ନ ରହିଛି ।
ସୂଚନା ଥାଉକି ଜାନ୍ରୁଆରୀ ପହିଲା ଦିନ ରାତିରେ ଅଞ୍ଜଳୀ ଓ ତାଙ୍କର ଜଣେ ବନ୍ଧୁ ସ୍କୁଟି ସାହାଯ୍ୟରେ ରାସ୍ତାରେ ଯାଉଥିବା ବେଳେ ଏକ କାର ସହ ଦୁର୍ଘଟଣା ହୋଇଥିଲା । ଏଥିରେ ଅଞ୍ଜଳୀ କାର ଭିତରେ ଫଶି ଯାଇଥିଲେ । କାରଟି ଅଞ୍ଜଳୀଙ୍କୁ ପାଖାପାଖି ୧୨ କିଲୋମିଟର ପର୍ଯ୍ୟନ୍ତ ଘୋଷାଡି ଘୋଷାଡି ନେଇଯାଇଥିଲା । ଫଳରେ ଅଞ୍ଜଳୀଙ୍କର ମୃତ୍ୟୁ ହୋଇଥିଲା । ଏହି ଘଟଣାରେ ପୋଲିସ କାର ଚାଳକ ଓ କାରରେ ବସିଥିବା କିଛି ଲୋକଙ୍କୁ ଗିରଫ କରି ତଦନ୍ତ ଚଳାଇଛି ।