ବାଘୁଣୀ ପାଇଁ ବ୍ୟାପକ ସୁରକ୍ଷା । କଡା ସୁରକ୍ଷା ଭିତରେ ସାତକୋଶିଆ ଅଭିମୁଖେ ବାହାରିଲେ ଟ୍ରାଙ୍କୁଲାଇଜ୍ ଟିମ୍ : ଆଜି ସୁନ୍ଦରୀକୁ ନିଶ୍ଚେତକ ଦେଇ କରିପାରନ୍ତି ଅଚେତ
କନକ ବ୍ୟୁରୋ : ବାଘୁଣୀ ପାଇଁ ଅନୁଗୋଳରେ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ସ୍ଥାନୀୟ ଲୋକଙ୍କ ବିରୋଧର ଆଶଙ୍କା କରି କଡା ସୁରକ୍ଷା ଭିତରେ ସାତକୋଶିଆ ଜଙ୍ଗଲ ଅଭିମୁଖେ ବାହାରିଛନ୍ତି ନିଶ୍ଚେତକ ଦଳ । ସେମାନେ ସାତକୋଶିଆରେ ଆଜି ସୁନ୍ଦରୀକୁ ନିଶ୍ଚେତକ ଦେଇ ଅଚେତ କରିପାରନ୍ତି । ଟ୍ରାଙ୍କୁଲାଇଜ୍ କରିବା ପାଇଁ ଓୟୁଏଟି ଓ ନନ୍ଦନକାନନର ବଶେଷଜ୍ଞ ଦଳ ଯାଇଛନ୍ତି । ସେମାନଙ୍କ ସହ ଶିମିଳିପାଳରୁ ଆସିଥିବା ବିଶେଷଜ୍ଞ ଦଳ ମଧ୍ୟ ଯାଇଛନ୍ତି । ଗତକାଲି ରାତି ସୁଧା ସାତକୋଶିଆର କୁମୁରି ଅଂଚଳରେ ବାଘୁଣି ଥିବା ସୂଚନା ମିଳିଥିଲା । ଏବେ ବି ସେହି ଅଂଚଳରେ ବାଘୁଣୀ ରହିଥିବା ଅନୁମାନ କରାଯାଉଛି । କୁମୁରି ଅଂଚଳରେ ହିଁ ବିଶେଷଜ୍ଞ ଟିମ୍ ବାଘୁଣୀ ସୁନ୍ଦରୀକୁ ଠାବ କରିବା ପାଇଁ ଉଦ୍ୟମ କରିବେ ।
Kanak News is now on WhatsApp
Join and get latest news updates delivered to you via WhatsApp
ସେପଟେ ସ୍ଥାନୀୟ ଲୋକଙ୍କ ବିରୋଧ କାରଣରୁ କଡା ସୁରକ୍ଷା ବ୍ୟବସ୍ଥା ଭିତରେ ବିଶେଷଜ୍ଞ ଟିମକୁ କୁମୁରି ଗାଁକୁ ନିଆଯାଉଛି । ତେବେ ଗୋଟିଏ ପରେ ଗୋଟିଏ ଶିକାର କରିବାରେ ଲାଗିଛି ସୁନ୍ଦରୀ । ଗତ ରବିବାର ଦିନ ସୁନ୍ଦରୀ ଏକ ମଣିଷ ଖାଇବା ପରେ ଗତକାଲି ଏକ ବଳଦ ଶିକାର କରିଥିଲା । ତେବେ ପୂର୍ବରୁ ମଧ୍ୟ ଜଣେ ସ୍ତ୍ରୀ ଲେ।କଙ୍କୁ ଜୀବନରେ ମାରିଦେଇଥିବା ନେଇ ସ୍ଥାନୀୟ ଲୋକ ଅଭିଯୋଗ ଆଣିଥିଲେ । ତେବେ ବାରମ୍ବାର ଏପରି ଆକ୍ରମଣ ଫଳରେ ଲୋକମାନେ ଆତଙ୍କିତ ହୋଇ ପଡିଛନ୍ତି । ଏପରିକି କାଲି ଟାଇଁସି ଗ୍ରାମରେ ଲୋକମାନେ ବାହାରକୁ ବାହାରି ନଥିବା ଜଣାପଡିଛି । ଏହାସହ ସ୍ଥାନୀୟ ବିଧାୟକ ମଧ୍ୟ ବାଘୁଣୀକୁ ସ୍ଥାନାନ୍ତରଣ କରିବା ପାଇଁ କହିଥିବା ଜଣାପଡିଛି ।