ଗାଙ୍ଗୁଲି ଧରିବେ ଦଳର ମଙ୍ଗ, ବିଶ୍ୱ ଏକାଦଶକୁ ଭେଟିବ ଭାରତୀୟ ଦଳ । ଜାଣନ୍ତୁ କେବେ ହେବ ମ୍ୟାଚ୍?
କନକ ବ୍ୟୁରୋ : ମୈଦାନକୁ କମବ୍ୟାକ୍ କରିବେ ବେଙ୍ଗଲ ଟାଇଗର । ପୁଣିଥରେ ଦାଦା ଧରିବେ ଦଳର ମଙ୍ଗ । ଲମ୍ବା ଲମ୍ବା ଛକା ମାରି ପୁଣିଥରେ ଜିଣିବେ ଦର୍ଶକଙ୍କ ମନ । ସ୍ୱାଧୀନତାର ୭୫ ବର୍ଷ ପୂର୍ତ୍ତି ଉପଲକ୍ଷେ ଦେଶ ଅମୃତ ମହୋତ୍ସବ ପାଳନ କରିବ । ଆଉ ଏହି ସମୟରେ ଏକ ବଡ ମ୍ୟାଚର ଆୟୋଜନ ହେବାକୁ ଯାଉଛି । ଯେଉଁଥିରେ ପୂର୍ବତନ ଭାରତୀୟ ଖେଳାଳୀଙ୍କ ଟିମ୍ ସହ ବିଶ୍ୱର ବଛା ବଛା ଖେଳାଳୀଙ୍କୁ ନେଇ ଗଠିତ ଟିମର ମୁକାବିଲା ହେବ । ଆଉ ଭାରତୀୟ ଟିମର ମଙ୍ଗ ଧରିବେ ଖୋଦ୍ ପୂର୍ବତନ ଅଧିନାୟକ ସୌରଭ ଗାଙ୍ଗୁଲି ।
Kanak News is now on WhatsApp
Join and get latest news updates delivered to you via WhatsApp
ଆଜାଦୀ କି ଅମୃତ ମହୋତ୍ସବ ଉପଲକ୍ଷେ ଏହି ମ୍ୟାଚ୍ ଆସନ୍ତା ସେପ୍ଟେମ୍ବର ୧୫ରେ ଐତିହାସିକ ଇଡେନ ଗାର୍ଡେନ୍ସରେ ଖେଳାଯିବ । ଏହା ଏକ ପ୍ରଦର୍ଶନୀ ମ୍ୟାଚ୍, ଯାହା ପୂର୍ବତନ ଖେଳାଳୀଙ୍କୁ ନେଇ ଖେଳାଯିବ । ଇଣ୍ଡିଆ ମହାରାଜାର ନେତୃତ୍ୱ ସୌରଭ ଗାଙ୍ଗୁଲିଙ୍କ ହାତରେ ରହିଥିବା ବେଳେ ୱାର୍ଲ୍ଡ ଜାଏଣ୍ଟସର ମଙ୍ଗ ଧରିବେ ଇଅନ ମୋର୍ଗାନ ।
ଇଣ୍ଡିଆ ମହାରାଜା ପକ୍ଷରୁ ସୌରଭ ଗାଙ୍ଗୁଲିଙ୍କ ସମେତ ବୀରେନ୍ଦ୍ର ସେହୱାଗ, ମହମ୍ମଦ କୈଫ, ୟୁସୁଫ ପଠାନ, ଇରଫାନ ପଠାନ, ପାର୍ଥିବ ପଟେଲ, ହରଭଜନ ସିଂ, ପ୍ରଜ୍ଞାନ ଓଝା, ଶ୍ରୀସନ୍ଥଙ୍କ ଭଳି ଷ୍ଟାର କ୍ରିକେଟର ମୈଦାନକୁ ଓହ୍ଲାଇବେ । ସେହିଭଳି ୱାର୍ଲ୍ଡ ଜାଏଣ୍ଟସ ପକ୍ଷରୁ ଇଅନ ମୋର୍ଗାନଙ୍କ ସମେତ ସିମନ୍ସ, ଗିବ୍ସ, କାଲିସ, ଜୟସୂରିୟା,ଜଣ୍ଟି ରୋଡସ, ମୁରଲୀଧରନ, ଷ୍ଟେନ, ମିଚେଲ ଜନସନ, ବ୍ରେଟ ଲିଙ୍କ ଭଳି ଖେଳାଳୀଙ୍କୁ ପୁଣିଥରେ ପଡିଆରେ ଦେଖିବାକୁ ମିଳିବ ।
ଏହି ମ୍ୟାଚକୁ ନେଇ ଭାରତୀୟ କ୍ରିକେଟ ଦଳର ପୂର୍ବତନ କୋଚ୍ ରବି ଶାସ୍ତ୍ରୀ କହିଛନ୍ତି ଭାରତ ଏବେ ସ୍ୱାଧୀନତାର ୭୫ ବର୍ଷ ଉତ୍ସବ ପାଳନ କରୁଛି । ତେଣୁ ଏହି ମ୍ୟାଚକୁ ଆଜାଦୀ କି ଅମୃତ ମହୋତ୍ସବକୁ ସମର୍ପିତ କରାଯାଇଛି । ଏହି ସ୍ୱତନ୍ତ୍ର ମ୍ୟାଚ ପରେ ଲିଜେଣ୍ଡସ ଲିଗ୍ ଆରମ୍ଭ ହେବ । ୧୬ ସେପ୍ଟେମ୍ବରରୁ ଏହି ମ୍ୟାଚ୍ ଆରମ୍ଭ ହୋଇ ୨୨ ଦିନ ଧରି ଚାଲିବ । ଖୁବଶୀଘ୍ର ଟିମ୍ ଘୋଷଣା କରାଯିବ ।