କନକ ବ୍ୟୁରୋ : ଶିବସେନାରେ ଗତ କିଛି ଦିନ ଧରି ଚାଲିଥିବା ସଙ୍କଟ ଭିତରେ ନୂଆ ମୋଡ ଆସିଛି । ବର୍ତ୍ତମାନ ଶିବସେନାର ସାଂସଦ ଚାହୁଁଛନ୍ତି ଦଳର ଅଧ୍ୟକ୍ଷ ଉଦ୍ଧବ ଠାକରେ ଭାଜପା ସହ ସମ୍ପର୍କ ଯୋଡିବା ପାଇଁ ଚେଷ୍ଟା କରନ୍ତୁ । ସାଂସଦ ରାହୁଲ ଶିବାଲେ ପୂର୍ବତନ ମୁଖ୍ୟମନ୍ତ୍ରୀଙ୍କୁ ଚିଠି ଲେଖି ଏଭଳି କହିଛନ୍ତି । ଆଗାମୀ ଜୁଲାଇ ୧୮ରେ ହେବାକୁ ଥିବା ରାଷ୍ଟ୍ରପତି ନିର୍ବାଚନରେ ଦଳର ସବୁ ସାଂସଦ ବିଜେପିର ପ୍ରାର୍ଥୀ ଦ୍ରୌପଦୀ ମୁର୍ମୁଙ୍କୁ ସମର୍ଥନ ଦେବାକୁ ଉଦ୍ଧବ କୁହନ୍ତୁ ବୋଲି ସେ ଅନୁରୋଧ କରିଛନ୍ତି । ତେବେ ଅନୌପଚାରିକ ଭାବେ ସୂଚନା ମିଳିଛି ଏହି ଚିଠି ପରେ ଉଦ୍ଧବ ଏନଡିଏ ପ୍ରତ୍ୟାଶୀଙ୍କୁ ଭୋଟ ଦେବା ପାଇଁ କହିପାରନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏକନାଥ ସିନ୍ଦେଙ୍କ ବିଦ୍ରୋହ ପରେ ୧୮ଜଣ ସାଂସଦଙ୍କ ମଧ୍ୟରୁ ୧୬ ଜଣ ସାଂସଦ ଉଦ୍ଧବଙ୍କ ସହ ସାକ୍ଷାତ କରିବା ସହ ତାଙ୍କ ସହ ଥିବା କହିଥିଲେ । ଏମାନଙ୍କ ମଧ୍ୟରୁ କିଛି ସାଂସଦ ୨୦୨୪ରେ ହେବାକୁ ଥିବା ଲୋକସଭା ନିର୍ବାଚନରେ ଦଳର ପଦକ୍ଷେପ ସହ କେଉଁଭଳି ବିଜୟ ହାସଲ କରାଯାଇପାରିବ ସେନେଇ ରାସ୍ତା ବାହାରକରିବାକୁ ଚାହୁଁଛନ୍ତି । ସାଂସଦ ରାହୁଲ ମଙ୍ଗଳବାର ଉଦ୍ଧବଙ୍କ ସହ ସାକ୍ଷାତ ବେଳେ ଗୋଟିଏ ଦାବିପତ୍ର ଦେଇଛନ୍ତି । ଏଥିରେ ମୁର୍ମୁଙ୍କୁ ସମର୍ଥନ ଦେବା ପାଇଁ ସେ ଅନୁରୋଧ କରିଛନ୍ତି । ରାହୁଲ ଏଥିରେ ଲେଖିଛନ୍ତି ଦ୍ରୌପଦୀ ଜଣେ ଆଦିବାସୀ ମହିଳା, ସାମାଜିକ କ୍ଷେତ୍ରରେ ମଧ୍ୟ ତାଙ୍କର ଉଲ୍ଲେଖନୀୟ ଅବଦାନ ରହିଛି । ରାଜନୀତିରେ ଆସିବା ପୂର୍ବରୁ ସେ ଶିକ୍ଷକ ଥିଲେ । ଝାଡଖଣ୍ଡର ପ୍ରଥମ ମହିଳା ରାଜ୍ୟପାଳ ଭାବେ ସେ କାମ ମଧ୍ୟ କରିସାରିଛନ୍ତି ।
ରାହୁଲ ଶିବାଲେ ଆହୁରି ମଧ୍ୟ ଲେଖିଛନ୍ତି ଯେ ଦଳର ପ୍ରତିଷ୍ଠାତା ବାଲା ସାହେବ ଠାକରେ ବିଜେପି ସହ ମେଣ୍ଟ ସରକାରରେ ଥାଇ ମଧ୍ୟ ପୂର୍ବରୁ ହୋଇଥିବା ରାଷ୍ଟ୍ରପତି ନିର୍ବାଚନରେ ପ୍ରତିଭା ଦେବୀ ସିଂହ ପାଟିଲଙ୍କୁ ସମର୍ଥନ କରିଥିଲେ । ପ୍ରତିଭା ମହାରାଷ୍ଟ୍ରର ହୋଇଥିବା କାରଣରୁ ସେ ଏଭଳି କରିଥିଲେ । କେବଳ ଏତିକି ନୁହେଁ ଶିବସେନା ପ୍ରଣବ ମୁଖାର୍ଜୀଙ୍କୁ ମଧ୍ୟ ସମର୍ଥନ ଦେଇଥିଲେ । ତେଣୁ ଏସବୁକୁ ଧ୍ୟାନ ଦେବା ସହ ମହିଳା ଆଦିବାସୀ ନେତ୍ରୀ ଦ୍ରୌପଦୀଙ୍କ ସାମାଜିକ ଯୋଗଦାନକୁ ଆଖିରେ ରଖି ତାଙ୍କୁ ଦଳ ସମର୍ଥନ ଦେଉ । ଶିବସେନାର ଗୋଟିଏ ଗୋଷ୍ଠୀ ମଧ୍ୟ ଉଦ୍ଧବ ଏହା ଉପରେ ବିଚାର କରନ୍ତୁ ବୋଲି କହିଛନ୍ତି ।