କାଳିଆ ଯୋଜନାକୁ ସମାଲୋଚନା ପ୍ରସଙ୍ଗ : ବିରୋଧୀଙ୍କୁ କଡ଼ାକଥା କହିବା ସହ ଉଚିତ ଜବାବ ଦେଲେ କୃଷିମନ୍ତ୍ରୀ ପ୍ରଦୀପ ମହାରଥୀ
କନକ ବ୍ୟୁରୋ : କୃଷି ଋଣ ଛାଡ ନକରି ଚାଷୀଙ୍କ ପାଇଁ ବିକଳ୍ପ ବାଟ ବାହାର କରିଥିବା ରାଜ୍ୟ ସରକାରଙ୍କୁ ବିରୋଧୀଙ୍କ ସମାଲୋଚନା ଜାରି ରହିଛି । ଆଉ ଏହାରି ଭିତରେ ବିରୋଧୀଙ୍କୁ ଖୁବ କଡା କଥା କହିଛନ୍ତି କୃଷିମନ୍ତ୍ରୀ । ପ୍ରଦୀପ ମହାରଥୀ କହିଛନ୍ତି, ୧୯୯୯ ଯାଏଁ କଂଗ୍ରେସ ରାଜ୍ୟରେ କ୍ଷମତାରେ ଥିବା ବେଳେ ସରକାରୀ କର୍ମଚାରୀଙ୍କୁ ଦେବାକୁ ଦରମା ନଥିଲା । ସେହିପରି ବିଜେପିକୁ ମିଥ୍ୟାର ସୌଦାଗର ବୋଲି ସମାଲୋଚନା କରିଛନ୍ତି ମହାରଥୀ । ଧାନର ସର୍ବନିମ୍ନ ସହାୟକ ମୂଲ୍ୟ ବୃଦ୍ଧି ଏବଂ ଓଡିଶାକୁ ସ୍ୱତନ୍ତ୍ର ରାଜ୍ୟ ପାହ୍ୟା ପ୍ରତିଶ୍ରୁତି ଦେଇଥିଲେ ପ୍ରଧାନମନ୍ତ୍ରୀ । ଆଗାମୀ ୨୪ରେ ପ୍ରଧାନମନ୍ତ୍ରୀ ମୋଦି ଓଡିଶା ଆସୁଥିବା ବେଳେ ଏହି ସବୁ ପ୍ରତିଶ୍ରୁତି କୁଆଡେ ଗଲା ବୋଲି ପଚାରିବାକୁ ପରାମର୍ଶ ଦେଇଛନ୍ତି କୃଷିମନ୍ତ୍ରୀ । ଏଥି ସହ ରାଜ୍ୟ ସରକାରଙ୍କ କାଳିଆ ଯୋଜନାରେ ଚାଷୀଙ୍କ ଉନ୍ନତି ପାଇଁ ୫ଟି ଗୁରୁତ୍ୱପୂର୍ଣ୍ଣ ଦିଗକୁ ଦୃଷ୍ଟି ଦିଆଯାଇଥିବା ସେ କହିଛନ୍ତି । ଯାହା ଭିତରେ ବିନା ସୁଧରେ ୫୦ ହଜାର ଟଙ୍କା ପର୍ଯ୍ୟନ୍ତ ଋଣ ସୁବିଧା ରହିଛି ।
Kanak News is now on WhatsApp
Join and get latest news updates delivered to you via WhatsApp
ସେପଟେ କାଳିଆ ଯୋଜନାକୁ ନେଇ ରାଜ୍ୟରେ ଚାଷୀ ଆନ୍ଦୋଳନର ନେତୃତ୍ୱ ନେଉଥିବା ନବ ନିର୍ମାଣ କୃଷକ ସଂଗଠନ ପ୍ରତିକ୍ରିୟା ପ୍ରକାଶ କରିଛି । ସଂଗଠନ କହିଛି କଳାତ୍ମକ ଘୋଷଣା କାଳିଆ । ପ୍ରାଇଜ, ପ୍ରେଷ୍ଟିଜ ଓ ପେନସନ ଦାବିରୁ ଖସିବା ପାଇଁ ସରକାର ଏଭଳି ପୁରୁଣା ଯୋଜନାକୁ ନୂଆ ଜାମା ପିନ୍ଧାଇଛନ୍ତି । ୫୦ହଜାର ଟଙ୍କା ପର୍ଯ୍ୟନ୍ତ ବିନା ସୁଧରେ ଋଣ, ଭାଗଚାଷୀ ଓ ନାମମାତ୍ର ଚାଷୀଙ୍କ ଜୀବିକା ପାଇଁ ପ୍ରୋତ୍ସାହନ ସହ ଅନ୍ୟାନ୍ୟ ସୁବିଧା ପୂର୍ବରୁ ଥିଲା । ତେଣୁ ନୂଆ ଯୋଜନାରେ ଟଙ୍କାଟିଏ ନଦେଇ ସରକାର କେବଳ ଭ୍ରାନ୍ତି ସୃଷ୍ଟି କରିଛନ୍ତି ବୋଲି ସଂଗଠନ ଅଭିଯୋଗ କରିଛି ।
ସେହିପରି ରାଜଭବନ ସମ୍ମୁଖରେ ଧାରଣାରେ ବସିଥିବା କୃଷ୍ଣ ସଗରିଆ ମଧ୍ୟ ଚାଷୀଙ୍କ ପାଇଁ ସରକାରଙ୍କ ଯୋଜନାକୁ ସମାଲୋଚନା କରିଛନ୍ତି । ବିଧାନସଭାରେ ସ୍ଥିର ହୋଇଥିବା ଧାନର ସର୍ବନିମ୍ନ ସହାୟକ ମୂଲ୍ୟ ଦେବା ସହ ତୁରନ୍ତ କୃଷୀ ଋଣ ଛାଡ କରିବାକୁ ଦାବି କରିଛନ୍ତି ।
ବିଜେପି ମଧ୍ୟ ଚାଷୀଙ୍କ ପାଇଁ ଯୋଜନା ଘୋଷଣାରେ ରାଜନୈତିକ ଉଦ୍ଦେଶ୍ୟରେ ଗନ୍ଧ ବାରିଛି । ଦଳର ସାଧାରଣ ସଂପାଦକ ପୃଥୀରାଜ ହରିଚନ୍ଦନ ଅଭିଯୋଗ କରିଛନ୍ତି, ରାଜ୍ୟର ଚାଷୀଙ୍କୁ ନେଇ ସରକାରଙ୍କ ପାଖରେ ହିସାବ ନାହିଁ । ହିତାଧିକାରୀଙ୍କ ସଂଖ୍ୟା ନଥାଇ ଯୋଜନାର କାର୍ଯ୍ୟକାରିତା ନେଇ ପ୍ରଶ୍ନ ଉଠିବା ସ୍ୱାଭାବିକ ବୋଲି ସେ କହିଛନ୍ତି । ସରକାରଙ୍କ ପାଖରେ କେବଳ ଏଫଆଇସିରେ ପଂଜୀକୃତ ଚାଷୀଙ୍କ ତଥ୍ୟ ରହିଛି । ପ୍ରକୃତରେ ରାଜ୍ୟରେ ଚାଷୀଙ୍କ ସଂଖ୍ୟା ଏହାଠାରୁ ଢେର ଅଧିକ ବୋଲି ସେ କହିଛନ୍ତି ।