ରାସ୍ତାରେ ମରି ପଡିଛନ୍ତି ବୁଲା କୁକୁର, କିଛି କୁକୁର ଅସୁସ୍ଥ । କେହି ବିଷ ଦେଇଥିବା ସନ୍ଦେହ । ଭୁବନେଶ୍ୱର ଚନ୍ଦ୍ରଶେଖରପୁରରୁ ଆସିଲା ଅଭାବନୀୟ ଚିତ୍ର ।
କନକ ବ୍ୟୁରୋ: ରାସ୍ତାରେ ଯିବାବେଳେ ଗୋଡାଉ ଥିଲେ ବି, ସୁରକ୍ଷା ଦୃଷ୍ଟିକୋଣରୁ ଗୁରୁତ୍ୱପୂର୍ଣ୍ଣ ଭୂମିକା ତୁଲାଇଥାନ୍ତି ବୁଲା କୁକୁର । ଯେତେବେଳେ ରାତିରେ ସମସ୍ତେ ଶୋଇ ଯାଆନ୍ତି, ସେତେବେଳେ ପ୍ରହରୀ ସାଜନ୍ତି ଏହି ବୁଲା କୁକୁର । କାହାକୁ ଗଳି ଭିତରକୁ ପୁରାଇ ଦିଅନ୍ତି ନାହିଁ । ଯଦି କେହି ଭୁଲରେ ବି ଆସିଯାଏ ଭୁକିଥାନ୍ତି, ନଚେତ ଗୋଡାଇଥାନ୍ତି । କିନ୍ତୁ ଏହି ବୁଲା କୁକୁରଙ୍କର କେହି ମାଲିକ ନଥିବାରୁ ଓ ରାସ୍ତାରେ ଯିବା ସମୟରେ କାହାକୁ ଗୋଡାଉ ଥିବାରୁ ସେମାନେ କିଛି ହୃଦୟହୀନ ମଣିଷର ଆକ୍ରୋଶର ଶିକାର ହୋଇଥାନ୍ତି । ସେମତି ଏକ ଘଟଣା ଦେଖିବାକୁ ମିଳିଛି ଚନ୍ଦ୍ରଶେଖରପୁର ଅଞ୍ଚଳରେ ।
Kanak News is now on WhatsApp
Join and get latest news updates delivered to you via WhatsApp
କିଏ ମାରିଲା? କାହିଁକି ମାରିଲା? କେମିତି ମାରିଲା? କଥା କହିପାରୁନଥିବାରୁ ଏହି ବୁଲା କୁକୁରଙ୍କୁ କିଏ ମାରିଲା ତାହା କେହି ଜାଣି ପାରୁନାହାନ୍ତି । କିନ୍ତୁ ରାସ୍ତା ଉପରେ ପଡିଥିବା କୁକୁରଙ୍କୁ ଦେଖିବା ପରେ ଅନୁମାନ କରାଯାଉଛି, କେହି ହୃଦୟହୀନ ମଣିଷ ସେମାନଙ୍କୁ ବିଷ ଦେଇ ମାରି ଦେଇଛି । ସ୍ଥାନୀୟ ଲୋକଙ୍କ କହିବା ଅନୁସାରେ, ସବୁଦିନ ଭଳି ଗତ ରାତିରେ କୁକୁରମାନେ ଆଉ ଭୁକି ନଥିଲେ । ସକାଳୁ ସକାଳୁ କାହା ଦୁଆରକୁ ଖାଇବାକୁ ବି ଆସି ନଥିଲେ । ଯେଉଁମାନେ ବୁଲା କୁକୁରଙ୍କୁ ଖାଇବାକୁ ଦିଅନ୍ତି ସେମାନେ ଡାକିଥିଲେ ବି ଉଠିନଥିଲେ । କିଛି କୁକୁର ଧକଉ ଥିବାର ଦେଖିବା ପରେ, ସେମାନେ ପାଣି ଛାଟିଥିଲେ । ହେଲେ ବଞ୍ଚାଇ ପାରିନଥିଲେ । କିନ୍ତୁ କିଏ ମାରିଲା ସେ ନେଇ ମୈତ୍ରୀବିହାର ଥାନାରେ ଏତଲା ଦେଇଛନ୍ତି ସ୍ଥାନୀୟ ଲୋକେ ।
ଏକା ଥରରେ ଏତେ କୁକୁର ମରିପଡିଥିବା ଖବର ପାଇବା ପରେ, ମୃତଦେହକୁ ଆସି ଉଦ୍ଧାର କରିଛନ୍ତି ପିପୁଲ୍ସ ଫର ଆନିମଲର ସଦସ୍ୟ । ଆଉ ଯିଏ ଏଭଳି କାର୍ଯ୍ୟ କରିଛନ୍ତି ତାଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ଦାବି କରିଛନ୍ତି ।
ଏସବୁ ଭିତରେ ବ୍ରହ୍ମପୁରରୁ ଆସିଛି ବୁଲା କୁକୁରଙ୍କ ଉତ୍ପାତର ଏକ ଭିଡିଓ । ସକାଳୁ ସକାଳୁ ଦୁଇ ଜଣ ମହିଳା ଏକ ସ୍କୁଟିରେ ତାଙ୍କ ପିଲାକୁ ସ୍କୁଲକୁ ଛାଡିବାକୁ ଯାଉଥିଲେ । ଏହି ସମୟରେ କିଛି କୁକୁର ସେହି ସ୍କୁଟିକୁ ପିଛା କରିଥିଲେ । ଯାହା ଫଳରେ ସ୍କୁଟିକୁ ରାସ୍ତା ପାଶ୍ୱର୍ରେ ଥିବା ଏକ କାରକୁ ଧକ୍କା ଦେଇଥିଲେ । ଆଉ ସ୍କୁଟିରେ ବସିଥିବା ଦୁଇ ମହିଳା ଓ ଶିଶୁ ଓଲଟି ତଳେ ପଡ଼ିଥିଲେ । ଦୁଇ ମହିଳା ଓ ଶିଶୁ ଆହତ ହୋଇଥିବା ଜଣାପଡ଼ିଛି ।