‘ରାମ ବିବାଦ ନୁହଁନ୍ତି ସମାଧାନ … ରାମ ଅଗ୍ନି ନୁହଁନ୍ତି ସେ ସକଳ ଶକ୍ତି’ । ପ୍ରାଣ ପ୍ରତିଷ୍ଠା ପରେ ଏପରି କହିଲେ ମୋଦୀ ।
କନକ ବ୍ୟୁରୋ: ଗର୍ଭ ଗୃହରେ ରାମଲଲ୍ଲାଙ୍କ ପ୍ରାଣ ପ୍ରତିଷ୍ଠା ପରେ ସନ୍ଥ ସଭା ତଥା ସମଗ୍ର ଦେଶବାସୀଙ୍କୁ ସମ୍ବୋଧନ କରିଛନ୍ତି ପ୍ରଧାନମନ୍ତ୍ରୀ ମୋଦୀ । କହିଛନ୍ତି,’ ଯୁଗ ଯୁଗର ପ୍ରତୀକ୍ଷା ପରେ ପ୍ରଭୁ ଶ୍ରୀରାମ ଆସିଛନ୍ତି । ଆମ ରାମଲଲ୍ଲା ଏଣିକି ଆଉ ଟେଣ୍ଟରେ ନୁହେଁ ଭବ୍ୟ ମନ୍ଦିରରେ ରହିବେ । ଅନେକ ତ୍ୟାଗ, ବଳିଦାନ ପରେ ଶ୍ରୀରାମ ଆସିଛନ୍ତି’ । ଏହି ଶୁଭ ମୁହୂର୍ତ୍ତରେ ଦେଶବାସୀଙ୍କୁ ଶୁଭକାମନା ଜଣାଇଛନ୍ତି ମୋଦୀ ।
Kanak News is now on WhatsApp
Join and get latest news updates delivered to you via WhatsApp
ମୋଦୀ ଆହୁରି ମଧ୍ୟ କହିଛନ୍ତି ଯେ, ‘ରାମ ମନ୍ଦିରର ଗର୍ଭ ଗୃହରେ ଈଶ୍ୱରୀୟ ଚେତନାର ମୁଁ ସାକ୍ଷୀ ବନିଛି । ମୋ ଶରୀର ଏବେବି ସେ ଦିବ୍ୟ ଚେତନାରେ ସ୍ପନ୍ଦିତ ହେଉଛି । ମୋର ମନ ପ୍ରାଣ ସେ ମହାର୍ଘ୍ୟ ମୁହୂର୍ତ୍ତରେ ଏବେବି ବୁଡି ରହିଛି । ଦେଶବାସୀଙ୍କୁ ମୁଁ ଅନେକ କିଛି କହିବାକୁ ଚାହୁଁଛି ହେଲେ ମୋ କଣ୍ଠ ରୁଦ୍ଧ ହୋଇଯାଉଛି’ ।
ମୋଦୀ କହିଲେ, ‘ରାମ ନିଆଁ ନୁହଁନ୍ତି ସେ ସକଳ ଶକ୍ତି, ;ସେ ବିବାଦ ନୁହଁନ୍ତି ସେ ସମାଧାନ । ରାମ ହିରୋ ଅଟନ୍ତି । ରାମ କେବଳ ଆମର ନୁହଁନ୍ତି ରାମ ସାରା ବିଶ୍ୱର । ରାମ କେବଳ ବର୍ତ୍ତମାନ ନୁହଁନ୍ତି ସେ ଅନନ୍ତକାଳ । ସମୟ ଥିଲା ଯେତେବେଳେ ଲୋକେ କହୁଥିଲେ, ରାମ ମନ୍ଦିର ହେଲେ ଦେଶରେ ନିଆଁ ଲାଗିଯିବ । ପ୍ରକୃତରେ ସେମାନେ ଭାରତର ସାମାଜିକ ଭାବର ପବିତ୍ରତାକୁ କେବେ ପରଖିପାରିନଥିଲେ । ରାମଲଲ୍ଲାଙ୍କ ଏହି ମନ୍ଦିର ନିର୍ମାଣ, ଭାରତୀୟ ସମାଜର ଶାନ୍ତି, ଧୈର୍ଯ୍ୟ , ସଦଭାବନା ଓ ସମନ୍ୱୟର ପ୍ରତୀକ ଅଟନ୍ତି । ଆମେ ଆଜି ସମସ୍ତେ ଦେଖୁେଉ ରାମ ମନ୍ଦିର ନିର୍ମାଣ ନିଆଁକୁ ନୁହେଁ ବରଂ ଶକ୍ତିର ସଞ୍ଚାର କରୁଛି’ ।
‘ମୋର ପୁରା ବିଶ୍ୱାସ ଆଜି ଯାହା ଘଟିଛି ସାରା ଦେଶ , ବିଶ୍ୱରେ ଥିବା ରାମଭକ୍ତ ତାକୁ ଅନୁଭବ କରିପାରୁଥିବେ । ଏହି ମୁହୂର୍ତ୍ତ ଅଲୌକିକ.. ଏହି ସମୟ ଆମ ସମସ୍ତଙ୍କ ପାଇଁ ଶ୍ରୀରାମଙ୍କ ଅଶୀର୍ବାଦ । ଆଜିଠାରୁ ହଜାରେ ବର୍ଷ ଯାଏଁ ଲୋକେ ଏହି ତାରିଖ, ଏହି କ୍ଷଣର ଚର୍ଚ୍ଚା କରିବେ’ । ମୋଦୀଙ୍କ ଭାଷଣରେ ସାରା ଦେଶକୁ ନୂଆ ଶକ୍ତି ମିଳିଛି ।