ମୋବାଇଲରେ ପଇଠ କରି କାଟିହେବ ପାଉତି । ରାଜ୍ୟ ସରକାର ଆଣିଲେ ମୋବାଇଲ୍ ‘ପାଉତି’ ଆପ୍ । ଅନଲାଇନରେ ମିଳିବ ଜାତିଗତ ପ୍ରମାଣ ପତ୍ର ସହ ଅନେକ ସାର୍ଟିଫିକେଟ୍ ।
କନକ ବ୍ୟୁରୋ: ଏଣିକି ଖଜଣା ଦେବାକୁ ଆଉ ସମସ୍ୟା ହେବନାହିଁ । ମୋବାଇଲରେ ପାଉତି କାଟିପାରିବେ । ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗ ଆରମ୍ଭ କରିଛି ‘ପାଉତି’ ଆପ୍ । ଆଜି ଏହି ଆପ୍କୁ ଉନ୍ମୋଚନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ସେହିପରି ଅନଲାଇନରେ ମିଳିବ ବିଭିନ୍ନ ପ୍ରମାଣ ପତ୍ର । ଇ-ସାର୍ଟିଫିକେଟ୍ ସେବା ଆରମ୍ଭ କରାଯାଇଛି । ଇଡିଷ୍ଟ୍ରିକ୍ଟ ଡଟ୍ ଓଡ଼ିଶା ଡଟ୍ ଜିଓଭି ଡଟ୍ ଇନ୍ ୱେବସାଇଟ୍ ଲଂଚ କରାଯାଇଛି । ଯେକୌଣସି ସ୍ଥାନରୁ ଜାତିଗତ, ବାସିନ୍ଦା ଓ ଆୟ ଆଦି ପ୍ରମାଣ ପତ୍ର ଏହି ୱେବସାଇଟ୍ରୁ ମିଳିପାରିବ । ଏଥିପାଇଁ କୌଣସି ଦେୟ ଦେବାକୁ ପଡ଼ିବ ନାହିଁ ।
Kanak News is now on WhatsApp
Join and get latest news updates delivered to you via WhatsApp
ରାଜସ୍ୱ ସେବା କ୍ଷେତ୍ରରେ ଏକ ବୈପ୍ଳବିକ ପରିବର୍ତ୍ତନର ଲକ୍ଷ୍ୟ ନେଇ ଲୋକସେବା ଭବନରେ ଭିଡ଼ିଓ କନଫରେସିଂ ଜରିଆରେ ଏହି ‘ଆପ୍’ର ଶୁଭାରମ୍ଭ କରିଛନ୍ତି ମୁଖ୍ୟମନ୍ତ୍ରୀ । ଏହି ‘ଆପ୍’ ଜରିଆରେ ଲୋକମାନେ ଘରେ ବସି ମୋବାଇଲ ଜରିଆରେ ଜମିଜମାର ଖଜଣା ପ୍ରଦାନ କରି ପାଉତି ପାଇପାରିବେ । ତେବେ ଫାଇଭ୍-ଟି କାର୍ଯ୍ୟକ୍ରମ ଜରିଆରେ ପ୍ରଶାସନରେ ବ୍ୟାପକ ପରିବର୍ତ୍ତନ ଆଣିବା ପାଇଁ ଏହା ଏକ ଅଭିନବ ପ୍ରୟାସ । ଏପରିକି ସାରା ଦେଶରେ ଏହି ସେବା କାର୍ଯ୍ୟକାରୀ କରିବାରେ ଓଡ଼ିଶା ହେଉଛି ପ୍ରଥମ ରାଜ୍ୟ ।
ସବୁଠାରୁ ବଡ଼କଥା ହେଲା, ବାସ୍ଥାନ, ଆୟ ଓ ଜାତି ତଥା ଅନ୍ୟାନ୍ୟ ସାର୍ଟିଫିକେଟ୍ ସବୁ ହିତାଧିକାରୀଙ୍କ ସ୍ୱ-ଘୋଷିତ ତଥ୍ୟ ଉପରେ ପ୍ରଦାନ କରିବା ପାଇଁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି । ଏହାସହ ଉପରୋକ୍ତ ସମସ୍ତ ସାର୍ଟିଫିକେଟ୍ ଗୁଡ଼ିକ ହିତାଧିକାରୀଙ୍କୁ ସମ୍ପୂର୍ଣ୍ଣ ମାଗଣାରେ ଦିଆଯିବ ବୋଲି ମୁଖ୍ୟମନ୍ତ୍ରୀ ଘୋଷଣା କରିଛନ୍ତି ।