କନକ ବ୍ୟୁରୋ : ଭଦ୍ରକରେ ମର୍ମନ୍ତୁଦ ସଡକ ଦୁର୍ଘଟଣାରେ ଅକାଳରେ ଚାଲିଗଲା ୫ ନିରୀହ ସ୍କୁଲ ଛାତ୍ରଛାତ୍ରୀଙ୍କ ଜୀବନ । ସ୍କୁଲରୁ ଫେରୁଥିବା ସମୟରେ ରାସ୍ତା ପାର କରୁଥିବା ବେଳେ ମାଡି ଆସିଥିଲା ମୃତ୍ୟୁର ଦୂତ । କେହି କିଛି ଭାବିବା ପୂର୍ବରୁ ରାସ୍ତା ଉପରେ ହିଁ ସ୍କୁଲ ପିଲାଙ୍କ ଉପରେ ମାଡି ଯାଇଥିଲା ଟ୍ରକ । ଆଉ ଘଟଣାସ୍ଥଳରେ ହିଁ ୫ ଛାତ୍ରଛାତ୍ରୀଙ୍କ ଜୀବନ ଦୀପ ଲିଭି ଯାଇଛି । ଏକାଧିକ ଛାତ୍ରଛାତ୍ରୀ ଗୁରୁତର ଭାବେ ଆହତ ମଧ୍ୟ ହୋଇଛନ୍ତି । ଯାହା ସାରା ରାଜ୍ୟବାସୀଙ୍କୁ ସ୍ତବ୍ଧ କରିଦେଇଛି । ପୂରା ରାଜ୍ୟରେ ପ୍ରତିଦିନ ଏଭଳି ମର୍ମନ୍ତୁଦ ସଡକ ଦୁର୍ଘଟଣା ଘଟୁଥିଲେ ମଧ୍ୟ ଏହା ପ୍ରତି କାହାର ନିଘା ନାହିଁ । କେବଳ ଏହି ଗୋଟିଏ ଦୁର୍ଘଟଣା ନୁହେଁ ଗତ କିଛି ବର୍ଷ ମଧ୍ୟରେ ଓଡିଶାରେ ସଡକ ଦୁର୍ଘଟଣା ଗୋଟିଏ ମାରାତ୍ମକ ବ୍ୟାଧି ଭାବେ ଉଭା ହେଲାଣି ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟରେ ସଡକ ଦୁର୍ଘଟଣା ଏତେ ମାତ୍ରାରେ ବଢିଛି ଯେ, ଲୋକମାନେ ଘରୁ ବାହାରିବା ପୂର୍ବରୁ ଅନେକ ଥର ଚିନ୍ତା କରିବାକୁ ବାଧ୍ୟ ହେଉଛନ୍ତି । କାରଣ ରାସ୍ତା ମଝିରେ ଜାଲ ବିଛାଇ ବସିଛି ମୃତ୍ୟୁ । ପାଦେ ପାଦେ ମୃତ୍ୟୁର ଭୟ ଘାରୁଛି ଲୋକଙ୍କୁ । ଖାସକରି ଜାତୀୟ ରାଜପଥରେ ଅଧିକ ସଂଖ୍ୟକ ଦୁର୍ଘଟଣା ହେଉଥିବାର ଘଟଣା ସାମ୍ନାକୁ ଆସୁଛି । ଜାତୀୟ ରାଜପଥରେ ଭାରିଯାନ ଚାଳକ ମାନେ ଯେଉଁଭଳି ଭାବେ ଗାଡି ଚଳାଉଛନ୍ତି ତାହା ସାଧାରଣ ଲୋକଙ୍କ ପାଇଁ ଆତଙ୍କ ସୃଷ୍ଟି କରିଛି । ଏକ ରିପୋର୍ଟ ଅନୁଯାୟୀ, ୯୮% ଦୁର୍ଘଟଣା ଡ୍ରାଇଭରଙ୍କ ଭୁଲ ପାଇଁ ଘଟୁଛି । ମଦ ପିଇବା ଦ୍ରୁତ ଗତିରେ ଗାଡି ଚଳାଇବା ଫଳରେ ଏଭଳି ଦୁର୍ଘଟଣା ଘଟୁଛି । ଆଉ ସବୁଠୁ ବଡ କଥା ହେଲା, ଭଲ ଅବସ୍ଥାରେ ଥିବା ଜାତୀୟ ରାଜପଥରେ ଘଟୁଛି ଅଧିକ ସଡକ ଦୁର୍ଘଟଣା । ଓଡ଼ିଶାର ରାଜ୍ୟ ରାଜପଥଗୁଡ଼ିକରେ ୨୪୭ଟି ଏବଂ ଜାତୀୟ ରାଜପଥଗୁଡ଼ିକରେ ୨୫୮ଟି ଦୁର୍ଘଟଣା ପ୍ରବଣ ସ୍ଥାନ ରହିଛି, ଯେଉଁଠି ବାରମ୍ବାର ଦୁର୍ଘଟଣା ଘଟୁଛି। ଏହାସତ୍ତେ୍ୱ ମଧ୍ୟ ଚେତୁ ନାହାନ୍ତି ଡ୍ରାଇଭର । ଯଦି ଗତ କିଛି ବର୍ଷ ମଧ୍ୟରେ ଓଡିଶାରେ ହୋଇଥିବା ବଡ ଦୁର୍ଘଟଣା ଉପରେ ନଜର ପକାଇବା ତେବେ ସବୁ କ୍ଷେତ୍ରରେ ଡ୍ରାଇଭରଙ୍କ ବେପାରୁଆ ଗାଡି ଚାଳନା ଯୋଗୁଁ ଏଭଳି ଦୁର୍ଘଟଣା ହେଉଥିବାର ପ୍ରମାଣ ସାମ୍ନାକୁ ଆସୁଛି ।
ଓଡିଶାରେ ହୋଇଥିବା କିଛି ବଡ ସଡକ ଦୁର୍ଘଟଣା :
ସେପଟେମ୍ବର ୨୦, ୨୦୧୬
– ଢେଙ୍କାନାଳ ଭୁବନରେ ହାଇଭୋଲଟେଜ୍ ତାର ଲାଗି ଜଳିଗଲା ବସ୍
– ବସ୍ରେ ଥିଲେ ୪୦ ଜଣ, ୬ ଜଣଙ୍କର ମୃତ୍ୟୁ
ସେପଟେମ୍ବର ୯, ୨୦୧୬
– ଅନୁଗୁଳ ଆଠମଲ୍ଲିକ ମାଣିତ୍ରୀ ପୋଲ ନିକଟରେ ମର୍ମନ୍ତୁଦ ଦୁର୍ଘଟଣା
– ୫୦ ଫୁଟ ତଳକୁ ବସ୍ ଖସିଲା, ୨୧ ଜଣଙ୍କର ମୃତ୍ୟୁ
ଏପ୍ରିଲ ୨୦୧୬
– ଦେବଗଡ ନିକଟରେ ଓଲଟିଗଲା ଯାତ୍ରା ପାର୍ଟି ବସ
– ୨୭ ଜଣଙ୍କ ଯାତ୍ରା ପାର୍ଟି କଳାକାରଙ୍କ ମୃତ୍ୟୁ
ଜାନୁୟାରୀ ୨୦୧୬
– ଅନୁଗୁଳ ନିକଟ ଚାଇଁପାଳରେ ଛୋଟ ଭ୍ୟାନକୁ ଧକ୍କା ଦେଲା ଟ୍ରକ
– ଘଟଣାରେ ୧୦ ଜଣଙ୍କର ଜୀବନ ଯାଇଥିଲା
ସେପଟେମ୍ବର ୨୦୧୫
– ସୁନ୍ଦରଗଡ ବଣାଇରେ ଓଲଟିଗଲା ମିନିଟ୍ରକ
– ୧୨ କବାଡି ଖେଳାଳିଙ୍କ ମୃତ୍ୟୁ
ଅକଟୋବର ୨୦୧୪
– ନବରଙ୍ଗପୁରରେ ପୃଥକ ପୃଥକ ଦୁଇଟି ମାଲବାହୀ ଗାଡି ଦୁର୍ଘଟଣା
– ୨୦ରୁ ଅଧିକ ଲୋକଙ୍କର ମୃତ୍ୟୁ
ଏପ୍ରିଲ ୨୦୧୩
– ରାୟଗଡାରେ ଓଲଟିପଡିଲା ଟ୍ରାକ୍ଟର
– ଘଟଣାରେ ୨୦ ଜଣଙ୍କର ମୃତ୍ୟୁ ହୋଇଥିଲା
ବର୍ଷ ଦୁର୍ଘଟଣା ସଂଖ୍ୟା ଆହତ ମୃତ୍ୟୁ
– ୨୦୧୨ ୯୨୮୫ ୧୦, ୭୧୫ ୩୭୦୧
– ୨୦୧୩ ୯୬୮୦ ୧୧, ୨୫୪ ୪୦୬୨
– ୨୦୧୪ ୯୬୪୮ ୧୧, ୦୮୭ ୩୯୩୧
– ୨୦୧୫ ୧୦, ୫୪୨ ୧୧, ୮୨୫ ୪୩୦୩