୫୩ ବର୍ଷରେ ଚାଲିଗଲେ କେକେ । ଯୁବବର୍ଗଙ୍କୁ ଆସୁଛି କାର୍ଡିଆକ୍ ଆରେଷ୍ଟ । କାରଣ କହିଲେ ବିଶେଷଜ୍ଞ ପଢନ୍ତୁ…
କନକ ବ୍ୟୁରୋ : ପ୍ରସିଦ୍ଧ ଗାୟକ କେକେଙ୍କ ପରଲୋକ ସମସ୍ତଙ୍କୁ ସବ୍ଧ କରିଛି । କୋଲକାତାରେ ଲାଇଭ ଚାଲିଥିବା ବେଳେ ତାଙ୍କ ଦେହ ହଠାତ୍ ଖରାପ ହୋଇପଡିଥିଲା । ସେଠାରୁ ତାଙ୍କୁ ସଙ୍ଗେ ସଙ୍ଗେ ମେଡିକାଲ ନିଆଯାଇଥିଲା । ତେବେ ସେ ଡାକ୍ତରଖାନା ପହଞ୍ଚିବା ପୂର୍ବରୁ ତାଙ୍କର ଦେହାନ୍ତ ହୋଇସାରିଥିଲା । କେକେଙ୍କ ମୃତ୍ୟୁର ପ୍ରକୃତ କାରଣ ପୋଷ୍ଟମର୍ଟମ ରିପୋର୍ଟ ଆସିବା ପରେ ସ୍ପଷ୍ଟ ହେବ । ତେବେ ଡାକ୍ତରଙ୍କ କହିବା ଅନୁସାରେ ତାଙ୍କୁ କାର୍ଡିଆକ ଆରେଷ୍ଟ ଆସିବା ପରେ ତାଙ୍କର ଦେହାନ୍ତ ହୋଇଥିଲା । କାର୍ଡିଆକ ଆରେଷ୍ଟ ହେବା ପରେ ହୃତପିଣ୍ଡ କାମ କରିବା ବନ୍ଦ କରିଦେଇଥାଏ । ୫୩ ବର୍ଷ ବୟସରେ କେକେ ପୂରା ଫିଟ୍ ଦେଖାଯାଉଥିଲେ । ତେବେ ତାଙ୍କର କାର୍ଡିଆକ ଆରେଷ୍ଟରେ ମୃତ୍ୟୁଖବର ସମସ୍ତଙ୍କୁ ଚକିତ କରିଦେଇଛି । ସୋ ବେଳେ କେକେ ଅନେକ ଥର ଝାଳ ପୋଛୁଥିବା ଦେଖାଯାଇଥିଲା । ଅନେକ ଥର ସେ ବ୍ୟସ୍ତବିବ୍ରତ ଥିବା ମଧ୍ୟ ନଜର ଆସିଥିଲେ । ହସପିଟାଲ ନିଆଯିବା ସମୟର ଭିଡିଓ ବର୍ତ୍ତମାନ ଭାଇରାଲ ହେବାରେ ଲାଗିଛି।
Kanak News is now on WhatsApp
Join and get latest news updates delivered to you via WhatsApp
ଯୁବଗୋଷ୍ଠୀ ହେଉଛନ୍ତି ହୃତଘାତର ଶିକାର
କେକେଙ୍କ ପୂର୍ବରୁ ମଧ୍ୟ ଅନେକ ସେଲିବ୍ରିଟି କମ ବୟସରେ ହୃତଘାତର ଶିକାର ହୋଇଛନ୍ତି । ଗତବର୍ଷ ଅକ୍ଟୋବର ୨୯ରେ ଦକ୍ଷିଣ ଭାରତୀୟ ଅଭିନେତା ପୁନିତ ରାଜକୁମାରଙ୍କ ମୃତ୍ୟୁ ହୃତଘାତରେ ହୋଇଥିଲା । ମୃତ୍ୟୁବେଳକୁ ତାଙ୍କୁ ମାତ୍ର ୪୬ ବର୍ଷ ହେଉଥିଲା । ସେହିଭଳି ଅଭିନେତା ସିଦ୍ଧାର୍ଥ ଶୁକ୍ଳାଙ୍କ ମଧ୍ୟ ହୃତଘାତରେ ଦେହାନ୍ତ ହୋଇଥିଲା । ମୃତ୍ୟୁବେଳକୁ ତାଙ୍କୁ ମାତ୍ର ୪୦ ବର୍ଷ ବୟସ ହେଉଥିଲା । ସେତେବେଳେ କେହି ବିଶ୍ୱାସ କରିନଥିଲେ ଏତେ ଫିଟ ଦେଖାଯାଉଥିବା ଏହି ଷ୍ଟାର ମାନେ ଏଭଳି ହୃତଘାତରେ ଚାଲିଯିବେ । ତେବେ ସ୍ୱାସ୍ଥ୍ୟ ବିଶାରଦଙ୍କ କହିବାକଥା ଯେ ଆମେ ସୁସ୍ଥ ଦେଖାଯିବାର ଅର୍ଥ ନୁହେଁ ଯେ ଆମ ହୃତପିଣ୍ଡ ସୁସ୍ଥ ।
କାହିଁକି ଅଚାନକ ଆସୁଛି କାର୍ଡିଆକ ଆରେଷ୍ଟ
ଅଚାନକ କାର୍ଡିଆକ ଆରେଷ୍ଟରେ ହୃତପିଣ୍ଡ କାମ କରିବା ବନ୍ଦ କରିଦେଇଥାଏ । ନିଶ୍ୱାସ ନେବାରେ କଷ୍ଟ ହୋଇଥାଏ । ଅନେକ ସମୟରେ ବେହୋସ ମଧ୍ୟ ହୋଇଯାଇଥାନ୍ତି । ଆମ ହୃତପିଣ୍ଡରେ ଦେଖାଯାଉଥିବା ଇଲେକଟ୍ରିକାଲ ତରଙ୍ଗରେ ଗଡବଡ ହେବା ପରେ ଏଭଳି ସ୍ଥିତି ଦେଖାଯାଇଥାଏ । ଏହା ହେବା ଦ୍ୱାରା ହୃଦୟର ଯେଉଁ କ୍ରିୟା ରହିଥାଏ ସେଥିରେ ବାଧା ସୃଷ୍ଟି ହୋଇଥାଏ । ହୃତପିଣ୍ଡକୁ ରକ୍ତ ଯିବା ବନ୍ଦ ହୋଇଯାଇଥାଏ । କାର୍ଡିଆକ ଆରେଷ୍ଟ ହୃତଘାତରୁ ଅଲଗା ହୋଇଥାଏ । ହୃତଘାତରେ ହୃତପିଣ୍ଡର ଗୋଟିଏ ପାଖକୁ ରକ୍ତ ଯିବା ବନ୍ଦ ହୋଇଯାଇଥାଏ । ତେବେ କାର୍ଡିଆକ ଆରେଷ୍ଟରେ ଅଚାନକ ହୃତପିଣ୍ଡ କାମ କରିବା ବନ୍ଦ କରିଦେଇଥାଏ ।
କାର୍ଡିଆକ ଆରେଷ୍ଟର ଲକ୍ଷଣ
କାର୍ଡିଆକ ଆରେଷ୍ଟର ଅନେକ ଲକ୍ଷଣ ରହିଛି । ଯେପରି ଅଚାନକ ତଳେ ପଡିଯିବା , ପଲ୍ସ ଚାଲିବା ବନ୍ଦ ହୋଇଯିବା, ନିଶ୍ୱାସ ନେବାରେ କଷ୍ଟ ଅନୁଭବ କରିବା, ଅତ୍ୟନ୍ତ ବ୍ୟସ୍ତ ବିବ୍ରତ ଲାଗିବା, ଦୁର୍ବଳ ଲାଗିବା, ଛାତିରେ କଷ୍ଟ ଅନୁଭବ କରି ଏହା ସ୍ୱାଭାବିକ ଠାରୁ କମ ଚାଲିବା । ତେବେ ଅଚାନକ କାର୍ଡିଆକ ଆରେଷ୍ଟରେ ଆହୁରି ଅନେକ ଲକ୍ଷଣ ନଜର ଆସିଥାଏ । ବିଶେଷଜ୍ଞଙ୍କ କାର୍ଡିଆକ ଆରେଷ୍ଟ ଓ ହୃତଘାତ ସହ ଜଡିତ ଅନେକ କଥା କହିଛନ୍ତି । ୩୦ରୁ ୪୦ ବର୍ଷ ବୟସରୁ ଏହି ସବୁ ଅସୁବିଧା ଦେଖିବାକୁ ମିଳୁଛି । ତେବେ ଏଥିପାଇଁ ଅନେକ କାରଣ ରହିଛି ଯେମିତି
୧. ସିଗାରେଟ ଟାଣିବା
୨. ଖରାପ କୋଲେଷ୍ଟ୍ରୋଲ
୩. ଉଚ୍ଚ ରକ୍ତଚାପ
୪. ମଧୁମେୟ
୫. ମାନସିକ ଓ ସମାଜିକ ଚିନ୍ତା
୬. ବ୍ୟାୟମ ନକରିବା
୭. ମୋଟାପଣ
୮. ଫଳ ଓ ପନିପରିବା ନଖାଇବା
୯. ମଦ୍ୟପାନ କରିବା
ଏହି ୯ଟି ବଡ କାରଣ ଯାହା ୯୦ ପ୍ରତିଶତ ହୃତଘାତ ହେଉବା ଅବା କାର୍ଡିଆକ ଆରେଷ୍ଟର ପ୍ରମୁଖ କାରଣ । ଏଥିରେ ଦୁଇ ବା ଦୁଇରୁ ଅଧିକ କାରଣ ରହିଛି ଯାହା ହୃତଘାତ ଓ କାର୍ଡିଆକ ଆରେଷ୍ଟର ସଙ୍କଟ ବଢାଇଦେଇଛି ।
ହୃତଜନିତ ସମସ୍ୟା ନେଇ କଣ କରିବେ?
ବିଶେଷଜ୍ଞ କହିଛନ୍ତି, ପ୍ରତ୍ୟେକ ବ୍ୟକ୍ତି ବାର୍ଷିକ ଚେକଅପ କରିବା ଦରକାର । ନିଜର ରକ୍ତଚାପ, ସୁଗାର ସ୍ତର, କୋଲେଷ୍ଟ୍ରୋଲ ସ୍ତରର ନିୟମିତ ଯାଞ୍ଚ କରିବା ଦରକାର । ଯଦି ଏହା ଅଧିକ ରହିଛି ତେବେ ଶୀଘ୍ର ଏହାର ଚିକିତ୍ସା କରିନେବା ଦରକାର । ରକ୍ତଚାପ ସ୍ତର ୧୩୦-୮୦ରୁ କମ ରହିବା ଭଲ । ସେହିଭଳି ସୁଗର, କୋଲେଷ୍ଟ୍ରୋଲ ଯେତେକମ ରହିଲେ ତାହା ସ୍ୱାସ୍ଥ୍ୟପାଇଁ ଭଲ । ରୋଗରୁ ବର୍ତ୍ତିବା ପାଇଁ ନିୟମିତ ଭାବେ ବ୍ୟାୟାମ କରିବା ଦରକାର । ସେ ସାଇକେଲ ଚଲାଇବା ହେଉ ଅବା ଦୌଡିବା ହେଉ । ପ୍ରତ୍ୟେକ ୩୦ରୁ ୪୦ ମିନିଟର ବ୍ୟାୟାମ ଦେହକୁ ଆବଶ୍ୟକ ରହିଛି । ତେବେ ଅଧିକ ବ୍ୟାୟାମ ମଧ୍ୟ ଦେହ ପାଇଁ କ୍ଷତି କାରକ । ଯଦି ମାସରେ ଥରେ ବ୍ୟାୟାମ କରୁଛି ତେବେ ତାହା ଜମା ଭଲ ନୁହେଁ ।