ବ୍ରିଟେନରେ କିଙ୍ଗ ଚାର୍ଲସ ତୃତୀୟଙ୍କ ରାଜ୍ୟାଭିଷେକ, ବହୁମୂଲ୍ୟ ମୁକୁଟ ପିନ୍ଧି ରୀତିନିତି ସହ ଅଭିଷିକ୍ତ ହେଲେ ଚାଲର୍ସ
କନକ ବ୍ୟୁରୋ : ବ୍ରିଟେନରେ ଚାର୍ଲସ୍ ତୃତୀୟଙ୍କ ରାଜ୍ୟାଭିଷେକ । ବ୍ରିଟେନ ରାଜା ଚାର୍ଲସ ତୃତୀୟଙ୍କ ପାରମ୍ପରିକ ରୀତିନୀତି ଅନୁଯାୟୀ ସ୍ୱତନ୍ତ୍ର ଉତ୍ସବରେ ରାଜ୍ୟାଭିଷେକ ହୋଇଛି । ସମାରୋହରେ ଚାର୍ଲସ୍ ରାଜକୀୟ ମୁକୁଟ ପରିଧାନ କରିଛନ୍ତି । ଉତ୍ସବର ମୁଖ୍ୟ ଆକର୍ଷଣ ରାଜା ଚାର୍ଲସ୍ ଓ ତାଙ୍କ ପତ୍ନୀ ରାଣୀ କାମିଲା ପ୍ରଥମେ ବଙ୍କିମହାମ ରାଜପ୍ରସାଦରୁ ୱେଷ୍ଟମିନିଷ୍ଟର ଆବେ ପହଂଚିଥିଲେ । ଉଭୟଙ୍କୁ ଭେଟିବାକୁ ରାସ୍ତାରେ ହଜାର ହଜାର ବ୍ରିଟେନବାସୀ ଜମାହୋଇଥିଲେ । ଆର୍କବିଶପ ଅଫ୍ କାଂଟବେରୀ ୱେଷ୍ଟମିନିଷ୍ଟର ଆବେରେ ଚାର୍ଲସଙ୍କୁ ବିଧିବଦ୍ଧ ଭାବେ ବ୍ରିଟେନର ରାଜା ଭାବେ ଅଭିଷିକ୍ତ କରିଛନ୍ତି । ଏଅବସରରେ ଦେଶର ୧୩ଟି ଜାଗାରୁ ଗନ୍ ସାଲ୍ୟୁଟ ଦିଆଯାଇଛି । ଏଡିନବର୍ଗ, କାର୍ଡିଫ ଏବଂ ବେଲଫାଷ୍ଟରୁ ସ୍ୱତନ୍ତ୍ର ସାଲ୍ୟୁଟ ଦିଆଯିବା ସହ ବ୍ରିଟିଶ ନୌଜାହାଜରୁ ମଧ୍ୟ ତୋପସଲାମୀ ଦିଆଯାଇଛି । ବ୍ରିଟେନ ପ୍ରଧାନମନ୍ତ୍ରୀ ରିଷି ସୁନକ କହିଛନ୍ତି ଯେ, ଏହି ଉତ୍ସବ ବ୍ରିଟେନର ସମୃଦ୍ଧ ଇତିହାସ, ସଂସ୍କୃତି ଓ ପରମ୍ପରାକୁ ବୁଝାଉଛି ।
Kanak News is now on WhatsApp
Join and get latest news updates delivered to you via WhatsApp
ରାଣୀ ଏଲିଜାବେଥ ଦ୍ୱିତୀୟଙ୍କ ମୃତ୍ୟୁ ପରେ ଗତବର୍ଷ ସେପ୍ଟେମ୍ବର ୮ରେ ୭୪ ବର୍ଷୀୟ ଚାର୍ଲସଙ୍କୁ ବ୍ରିଟେନର ରାଜା ଭାବେ ଘୋଷଣା କରାଯାଇଥିଲା । ଏଲିଜାବେଥ ଦ୍ୱିତୀୟଙ୍କ ରାଜ୍ୟାଭିଷେକ ୧୯୫୩ରେ ଧୁମଧାମରେ ହୋଇଥିଲା । ଏହାର ୭୦ ବର୍ଷ ପରେ ବ୍ରିଟେନ ରାଜ ପରିବାରରେ ଏପରି ଉତ୍ସବ ଅନୁଷ୍ଠିତ ହେଉଛି ।
କିଙ୍ଗ ଚାର୍ଲସଙ୍କ ତୃତୀୟଙ୍କ ସିଂହାସନ ଆରୋହଣ ସମାରୋହରେ ରାଜପରିବାରର ସବୁ ସଦସ୍ୟ ଯୋଗଦେଇଥିଲେ । ତେବେ କେବଳ ଜଣେ ପ୍ରମୁଖ ସଦସ୍ୟ ଚାଲର୍ସଙ୍କ ସାନ ବୋହୂ ମେଘାନ ଯୋଗ ଦେଇନଥିଲେ । ବରଂ ସାନ ପୁଅ ପ୍ରିନ୍ସ ହ୍ୟାରୀ ଏକାକୀ ଚାର୍ଲସଙ୍କ ସମାରୋହରେ ଯୋଗ ଦେଇଥିଲେ । ପ୍ରିନ୍ସ ହ୍ୟାରୀ ଓ ମେଘାନଙ୍କର ଏବେ ରାଜ ପରିବାର ସହ ବିବାଦ ଚାଲିଛି ଓ ଉଭୟ ଏବେ ଆମେରିକାରେ ରହୁଛନ୍ତି ।
ଚାଲର୍ସଙ୍କ ରାଜ୍ୟାଭିଷେକ ପାଇଁ ବିଶ୍ୱର ବହୁ ନାମୀଦାମୀ ବ୍ୟକ୍ତି ବ୍ରିଟେନରେ ପହଂଚିଥିଲେ । ଭାରତର ଉପରାଷ୍ଟ୍ରପତି ଜଗଦୀପ ଧନଖଡ଼ ମଧ୍ୟ ନିମନ୍ତ୍ରଣ ପାଇଁ ଏବେ ସମାରୋହରେ ସାମିଲ ହୋଇଥିଲେ । ରାଜ୍ୟାଭିଷେକ ପାଇଁ ବ୍ରିଟେନ ଓ ଲଣ୍ଡନରେ ୩ ଦିନିଆ ଉତ୍ସବ ପାଳିତ ହେବ ।