ଜମୁଛି କର୍ଣ୍ଣାଟକ ନିର୍ବାଚନ ପ୍ରଚାର । ବେଙ୍ଗାଲୁରରେ ମୋଦୀଙ୍କ ମାରାଥନ ରାଲି, ନିର୍ବାଚନୀ ଇସ୍ତାହାରକୁ ନେଇ ମୁହାଁମୁହିଁ ବିଜେପି ଓ କଂଗ୍ରେସ
କନକ ବ୍ୟୁରୋ : ନିର୍ବାଚନ ଯେତିକି ପାଖେଇ ଆସୁଛି କର୍ଣ୍ଣାଟକ ପ୍ରଚାର ମଇଦାନରେ ସେତିକି ଭିଡ ଦେଖିବାକୁ ମିଳୁଛି । ଭୋଟରଙ୍କୁ ଆକୃଷ୍ଟ କରିବାକୁ ଜୋରଦାର କ୍ୟାମ୍ପେନ କରିବା ସହ ପରଷ୍ପରକୁ ଟାର୍ଗେଟ କରିବାରେ ଅବହେଳା କରୁନାହାଁନ୍ତିି ଦୁଇ ପ୍ରମୁଖ ଦଳ ବିଜେପି ଓ କଂଗ୍ରେସ । ଶନିବାର ଦୁଇ ଦିନିଆ କର୍ଣ୍ଣାଟକ ଗସ୍ତରେ ଯାଇ ମେଗା ରୋଡ ସୋ’ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ବେଙ୍ଗାଲୁର ସମେତ ତିନିଟି ସ୍ଥାନରେ ରୋଡ ସୋ’ କରି ସିଧାସଳଖ କଂଗ୍ରେସକୁ ଟାର୍ଗେଟ କରିଛନ୍ତି । ବାଲାସାହେବ ଆମ୍ବେଦକର, ବୀର ସାବରକରଙ୍କ ଭଳି କଂଗ୍ରେସ ତାଙ୍କୁ ମଧ୍ୟ ଗାଳି କରୁଛି, ହେଲେ ସେ ଦେଶ ପାଇଁ କାର୍ଯ୍ୟ ଜାରି ରଖିବେ ବୋଲି କହିଛନ୍ତି ମୋଦୀ । ମେ ୭ ତାରିଖ ମଧ୍ୟରେ ମୋଦୀ କର୍ଣ୍ଣାଟକରେ ୪ ଟି ମେଗା ରୋଡ ସୋ’ ସହ ୧୯ ଟି ରାଲି କରିବାର କାର୍ଯ୍ୟକ୍ରମ ରହିଛି ।
Kanak News is now on WhatsApp
Join and get latest news updates delivered to you via WhatsApp
ନିର୍ବାଚନକୁ ଆଉ ୧୦ ଦିନ ବାକି ଥିବା ବେଳେ ଭୋଟରଙ୍କୁ ନିଜ ଦଳ ସପକ୍ଷରେ ଆଣିବାକୁ ରାଜନେତା ଚେଷ୍ଟା ଜାରି ରଖିଛନ୍ତି । ନିର୍ବାଚନୀ ଇସ୍ତାହାରକୁ ନେଇ ମୁହାଁମୁହିଁ ପରିସ୍ଥିତିକୁ ଆସିଛନ୍ତି କଂଗ୍ରେସ ଓ ବିଜେପି । ପ୍ରତି ପଂଚାୟତକୁ ୧ କୋଟି ଟଙ୍କା, ୫୦ ହଜାର ସରକାରୀ ଚାକିରି, ପରିବାର ମହିଳା ମୁଖ୍ୟଙ୍କୁ ୨ ହଜାର ଲେଖାଏଁ ଟଙ୍କା, ୨୦୦ ୟୁନିଟ୍ ମାଗଣା ବିଦ୍ୟୁତ୍, ପରିବାରର ମୁଣ୍ଡ ପିଛା ମାସିକ ୧୦ କିଲୋ ଚାଉଳ ଭଳି ଲୋଭନୀୟ ଅଫର ଦେଇଛି କଂଗ୍ରେସ । ଆଉ ବିଜେପି ଡବଲ ଇଞ୍ଜନ ସରକାରର ନାରା ଦେଇ ନିର୍ବାଚନୀ ଡଙ୍ଗା ପାରହେବାକୁ ବସିଛି । ତେବେ କଂଗ୍ରେସ ଦେଇଥିବା ଅଫର କେବେ ସମ୍ଭବ ନୁହେଁ ବୋଲି କହିଛନ୍ତି ମୋଦୀ । ଯେଉଁ ସରକାର ୪୦ ପ୍ରତିଶତ କମିଶନ ନେଉଥିବ ସେମାନେ ଏଭଳି ଅଫର ଦେଇପାରିବେ ବୋଲି ତାତ୍ସଲ୍ୟ କରିଛନ୍ତି ପ୍ରଧାନମନ୍ତ୍ରୀ । ଏହାର ଯବାବରେ ରାହୁଲ ଗାନ୍ଧୀ କହିଛନ୍ତି କଂଗ୍ରେସ ଭଳି ଅଫର ଦେବା ବିଜେପି ପକ୍ଷେ ସମ୍ଭବ ନୁହେଁ । ଏପଟେ ସରକାର ଗଢିବା ନେଇ ଦୃଢୋକ୍ତି ପ୍ରକାଶ କରିଛନ୍ତି ଏଆଇଆଇସିସି ସଭାପତି ମଲ୍ଲିକାର୍ଜୁନ ଖଡଗେ ।
୨୨୪ ଆସନ ବିଶିଷ୍ଟ କର୍ଣ୍ଣାଟକ ବିଧାନସଭା ନିର୍ବାଚନ ଆସନ୍ତା ମେ ୧୦ ତାରିଖରେ ହେବ ଏବଂ ମେ ୧୩ ତାରିଖରେ ଫଳାଫଳ ପ୍ରକାଶ ପାଇବ । ୨୦୨୪ ସାଧାରଣ ନିର୍ବାଚନ ପୂର୍ବରୁ କର୍ଣ୍ଣାଟକରେ ସରକାରକୁ ଫେରି ପୁଣି ଟ୍ରାକକୁ ଆସିବାକୁ କଂଗ୍ରେସ ନିଶ୍ଚିତ ଚେଷ୍ଟା କରିବ । ଆଉ ବିଜେପି କଂଗ୍ରେସର ଦଳୀୟ କନ୍ଦଳକୁ ଅସ୍ତ୍ର କରି ଶାସନ ବଜାୟ ରଖିପାରେ ବୋଲି କୁହାଯାଉଛି ।