କନକ ବ୍ୟୁରୋ: ବ୍ରିଟେନର ମହାରାଣୀ ଏଲିଜାବେଥ ଦ୍ୱିତୀୟଙ୍କ ମୃତ୍ୟୁ ପରେ କୋହିନୂର ହୀରାକୁ ଏବେ ଧାରଣ କରିବେ ରାଜା ଚାର୍ଲସ ତୃତୀୟଙ୍କ ପତ୍ନୀ କାମିଲା । ରାଣୀଙ୍କ ମୁକୁଟରେ ଶୋଭା ପାଇବ ବିଶ୍ୱପ୍ରସିଦ୍ଧ କୋହିନୂର ହୀରା । ତେବେ ଏ ହେଉଛି ସେହି କୋହିନୂର ହୀରା ଯାହାକୁ ନେଇ ସାରା ବିଶ୍ୱରେ ଚର୍ଚ୍ଚା ହୋଇଥାଏ । ତେବେ ମହାରାଣୀଙ୍କ ମୃତ୍ୟୁ ପରେ କୋହିନୂର ହୀରା ଭାରତ ଫେରିବ କି ନାହିଁ ସେନେଇ ପୁଣିଥରେ ଉଠିଛି ପ୍ରଶ୍ନ । ବହୁମୂଲ୍ୟ କୋହିନୂର ହୀରାକୁ ଶ୍ରୀମନ୍ଦିରକୁ ଦାନ କରିଥିଲେ ରାଜା ରଣଜୀତ୍ ସିଂହ ।
Kanak News is now on WhatsApp
Join and get latest news updates delivered to you via WhatsApp
ଏହି କୋହିନୂର ହୀରାର ଚମକ ଏତେ ଆକର୍ଷଣୀୟ ଥିଲା ଯେ ଏହାକୁ ହାସଲ କରିବା ପାଇଁ ରାଜାମାନଙ୍କ ମଧ୍ୟରେ ପ୍ରତିଯୋଗିତା ହୋଇଥିଲା । ୧୩୨୩ରେ ମହମ୍ମଦ ବିନ୍ ତୋଗଲକ ଏହି ହୀରାକୁ ପାଖରେ ରଖିଥିଲେ । ୧୫୨୬ ମସିହାରେ ମୋଗଲ ସମ୍ରାଟଙ୍କ ପାଖରେ ପହଁଚିଥିଲା କୋହିନୂର ହୀରା । ୧୭୩୯ ମସିହାରେ ନାଦୀର ଶାହା ମୟୂର ସିଂହାସନ ଓ କୋହିନୂର ହୀରାକୁ ଆଫଗାନିସ୍ତାନ ନେଇ ଯାଇଥିଲେ । ଏହାକୁ ପୁଣିଥରେ ଭାରତ ଆଣିଥିଲେ ଶିଖ ବୀର ରାଜା ରଣଜିତ ସିଂହ ।
କୋହିନୂର ହୀରା ସହ ଅପବାଦ ମଧ୍ୟ ଯୋଡ଼ି ହୋଇ ରହିଥିଲା । ଏହାକୁ ଯିଏ ଧାରଣ କରୁଥିଲା, ତାର ସର୍ବନାଶ ହେଉଥିବା ନେଇ ଏକ ବିଶ୍ୱାସ ସୃଷ୍ଟି ହୋଇଥିଲା । ଏହାର ଇତିହାସ ଜାଣିବା ପରେ ୧୮୩୦ ମସିହାରେ ରାଜା ରଣଜିତ ସିଂହ ଶ୍ରୀମନ୍ଦିରକୁ ଆସି ବଟବୃକ୍ଷ ମୂଳେ ଶ୍ରୀଜଗନ୍ନାଥଙ୍କୁ ଦାନ କରିବା ପାଇଁ ସଂକଳ୍ପ କରିଥିଲେ । କୋହିନୂର ଦାନ କରିବା ନେଇ ଏକ ଉଇଲ୍ ମଧ୍ୟ କରିଥିଲେ ରାଜା ରଣଜିତ ସିଂହ ।
ରାଜା ରଣଜିତ୍ ସିଂହ ଉଇଲ୍ କରିବାର ୯ ବର୍ଷ ପରେ ତାଙ୍କର ମୃତ୍ୟୁ ହୋଇଥିଲା । ଏହାପରେ ରାଜନୈତିକ ଅସ୍ଥିରତା ଲାଗିରହିଲା । ଆଙ୍ଗଲୋ-ଶିଖ୍ ଯୁଦ୍ଧ ପରେ ଇଷ୍ଟ ଇଣ୍ଡିଆ କମ୍ପାନୀ ହାତକୁ ଗଲା କୋହିନୂର ହୀରା । ଇଷ୍ଟ ଇଣ୍ଡିଆ କମ୍ପାନୀର ୨୫୦ ବର୍ଷ ପୂର୍ତ୍ତି ଅବସରରେ ବ୍ରିଟେନ୍ ରାଜପରିବାରକୁ ଏହା ହସ୍ତାନ୍ତର କରାଗଲା । ସେବେଠାରୁ ବ୍ରିଟେନ ରାଜପରିବାର ମହିଳାମାନେ ଏହି ହୀରା ଧାରଣ କରୁଛନ୍ତି । ୧୯୧୧ ମସିହାରେ କୁଇନ୍ସ ମ୍ୟାରୀଙ୍କ ମୁକୁଟରେ ସ୍ଥାନ ପାଇଥିଲା କୋହିନୂର । କାଳକ୍ରମେ ଏହି ପ୍ରଥା ଚାଲିଆସିଛି । ବ୍ରିଟେନର ରାଣୀଙ୍କ ମୁକୁଟରେ ଶୋଭା ପାଉଛି କୋହିନୂର ହୀରା ।
ଏପଟେ ମହାପ୍ରଭୁ ଜଗନ୍ନାଥଙ୍କୁ କୋହିନୂର ହୀରା ଦାନ କରାଯାଇଥିବାରୁ ୨୦୧୬ରେ ହୀରାକୁ ଫେରାଇ ଆଣିବା ପାଇଁ ରାଣୀ ଏଲିଜାବେଥ୍ ଦ୍ୱିତୀୟଙ୍କୁ ଚିଠି ଲେଖିଥିଲେ ଶ୍ରୀଜଗନ୍ନାଥ ସେନାର ଆବାହକ ପ୍ରିୟଦର୍ଶନ ପଟ୍ଟନାୟକ । ଜବାବରେ ହୀରା ଫେରାଇ ହେବନି ବୋଲି ବକିଂହମ୍ ପ୍ୟାଲେସ୍ ଠାରୁ ଚିଠି ଆସିଥିଲା । ଏବେ ରାଣୀଙ୍କ ମୃତ୍ୟୁ ପରେ ହୀରା ପୁଣିଥରେ ପୁରୀ ଶ୍ରୀମନ୍ଦିରକୁ ଫେରି ଆସିବ କି ନାହିଁ ସେନେଇ ଉଠିଛି ପ୍ରଶ୍ନ ।
ତେବେ ‘କୋହ-ଇ-ନୂର’ ପାର୍ସି ଭାଷାରେ ଯାହାର ଅର୍ଥ ହେଉଛି ‘ଆଲୋକର ପାହାଡ଼’ । ଭାରତର କୋଲୁର ଖଣିରୁ ମିଳିଥିଲା ଏହି ହୀରା । ୧୦୫.୬ କ୍ୟାରେଟ୍ ଏହି ହୀରାର ଓଜନ ୨୧.୧୨ ଗ୍ରାମ । ଏହାର ଲମ୍ବ-୩.୪ ସେଣ୍ଟିମିଟର, ପ୍ରସ୍ଥ-୩.୨ ସେଣ୍ଟିମିଟର ଏବଂ ମୋଟେଇ-୧.୩ ସେଣ୍ଟିମିଟର । ଅଣ୍ଡାକାର ଆକୃତି ଏବଂ ଏହାର ୬୬ଟି ପାର୍ଶ୍ୱ ରହିଛି । ଏହାକୁ ନେଇ ୮ଶହ ବର୍ଷ ଧରି ବିବାଦ ରହିଛି ।