ଦୁଇବର୍ଷ ପରେ ପାଳିତ ହେବାକୁ ଯାଉଛି କଳାହାଣ୍ଡିର ପ୍ରସିଦ୍ଧ ଛତର ଯାତ୍ରା । ସଚେତନତା ପରେ ମଧ୍ୟ ମା’ଙ୍କ ପାଖରେ ପଡ଼ିବ ବଳି ।
କନକ ବ୍ୟୁରୋ: ଆସନ୍ତାକାଲିଠାରୁ ଧୁମଧାମର ପାଳିତ ହେବାକୁ ଯାଉଛି ପ୍ରସିଦ୍ଧ ଛତର ଯାତ୍ରା । କରୋନା କଟକଣା କମିଥିବାରୁ ଏଥର ୩୦ହଜାରରୁ ଅଧିକ ଭକ୍ତ ସମାଗମ ହେବାର ସମ୍ଭାବନା ରହିଛି । ସେଥିପାଇଁ ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି ମଧ୍ୟ କରାଯାଇଛି । ସହରର ଟ୍ରାଫିକ ବ୍ୟବସ୍ଥାଠାରୁ ଆରମ୍ଭ କରି ଆଇନ ଶୃଙ୍ଖଳା ପାଇଁ ବ୍ୟାପକ ପୋଲିସ ମୁତୟନ କରାଯାଇଛି । କରୋନା ଯୋଗୁଁ ଦୁଇବର୍ଷ ଧରି ବନ୍ଦ ରହିଥିବା ବଳି ପ୍ରଥା ପୁଣି ଆରମ୍ଭ ହେବ । ବଳି ପ୍ରଥାକୁ ବନ୍ଦ ପାଇଁ ପ୍ରଶାସନ ପକ୍ଷରୁ ପୋଷ୍ଟର ମରାଯାଇ ସଚେତନ କରାଯାଉଛି । ହେଲେ ଭକ୍ତଙ୍କ ମନସ୍କାମନା ପାଇଁ ସଚେତନତାକୁ ଫୁ’ କରାଯାଇଥିବା ଦେଖିବାକୁ ମିଳିଛି । ଛତର ଯାତ୍ରାକୁ ସୁରୁଖୁରୁରେ କରିବା ପାଇଁ ଖୋଦ୍ ଜିଲ୍ଲାପାଳ ଦାୟିତ୍ୱ ବହନ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ମୂଳାଷ୍ଟମୀଠୁ ଆରମ୍ଭ ହୋଇଥିବା ଏହି ପୂଜାରେ ରବିବାର ରାତିରେ ମହାବଳି ପୋଢ଼ ବଳି ଦେବା ପରେ ନିଶାର୍ଦ୍ଧ ରାତିରେ ମା’ ଛତର ପ୍ରତିମା ୨ କିଲୋମିଟର ଦୂର ଜେନାଖାଲକୁ ଯିବ । ସୋମବାର ପାହାନ୍ତରେ ପୁଣି ଗୁପ୍ତ ବଳି ପରେ ମା’ଙ୍କ ଛତର ପ୍ରତିମା ବାଜା, ଘୁମୁରାର ତାଳେତାଳେ ମନ୍ଦିର ଅଭିମୁଖେ ଯିବେ । ଗୋଟିଏ ପଟେ ମନସ୍କାମନା ପୂରଣ ପାଇଁ ମା’ଙ୍କ ପାଖରେ ବୋଦା, ଛାଗ, କୁକୁଡା ଆଦି ବଳି ଦିଆଯାଉଥିବା ବେଳେ ସେପଟେ ମା’ଙ୍କ ଛତ୍ର ଉପରେ କପୋତ ଉଡ଼ାଇ ବିଶ୍ୱ ଶାନ୍ତିର ବାର୍ତା ଦିଆଯିବାର ପରମ୍ପରା ମଧ୍ୟ ରହିଛି ।