ଧିମଉଛି ଅର୍ଥନୀତି ! ବିଶ୍ୱରେ ମାନ୍ଦାବସ୍ଥା ଚାଲିଥିବା ବେଳେ ଓଡ଼ିଶାର ଆଇଟି କ୍ଷେତ୍ରରେ ବି ପଡୁଛି ପ୍ରଭାବ, ନିଯୁକ୍ତି କମୁଛି, ବଢ଼ୁଛି ଛଟେଇ ଆଶଙ୍କା ।
କନକ ବ୍ୟୁରୋ : ଅର୍ଥନୈତିକ ମାନ୍ଦାବସ୍ଥାର ପ୍ରଭାବ ଓଡିଶାର ଆଇଟି ସେକ୍ଟର ଉପରେ ପଡିଛି । ଦେଶର ଏକ ପ୍ରମୁଖ ଆଇଟି କମ୍ପାନୀର ଓଡିଶା ଶାଖା ଅଧିକାରୀ କହିଛନ୍ତି, ନୂଆ ନିଯୁକ୍ତି ପାଇଁ ଏବେ ସୁଯୋଗ ନାହିଁ । ନିଯୁକ୍ତି ଏକପ୍ରକାର ବନ୍ଦ ହୋଇଯାଇଛି ବୋଲି ଏହି ଅଧିକାରୀ ଜଣକ କହିଛନ୍ତି । ଏହାଛଡା ଆଇଟି ସେକ୍ଟରରେ ଚାକିରି ବଂଚାଇବାକୁ ହେଲେ ଏବେ କର୍ମଚାରୀଙ୍କୁ କମ୍ପାନୀର ଆବଶ୍ୟକତା ଅନୁସାରେ ବିଭିନ୍ନ କ୍ଷେତ୍ରରେ କାମ କରିବାକୁ ପଡିବ ।
Kanak News is now on WhatsApp
Join and get latest news updates delivered to you via WhatsApp
ସାରା ଦେଶରେ ଆର୍ଥିକ ମାନ୍ଦାବସ୍ଥାକୁ ନେଇ ଚର୍ଚ୍ଚା ଚାଲିଥିବା ବେଳେ, ଓଡିଶାରେ ଆଇଟି ଶିଳ୍ପ ଉପରେ ଏହାର ପ୍ରଭାବ ଦେଖିବାକୁ ମିଳିଛି । ଭାରତର ଏକ ପ୍ରମୁଖ ଆଇଟି କମ୍ପାନୀର ନିଯୁକ୍ତି ବିଭାଗର ଓଡିଶା ମୁଖ୍ୟ ପ୍ରଥମ ଥର ପାଇଁ ଏଭଳି ସ୍ଥିତି ନେଇ ମୁହଁ ଖୋଲିଛନ୍ତି ।
ଆଇଟି କ୍ଷେତ୍ରରେ ନିଯୁକ୍ତି ଏବେ ଏକ ପ୍ରକାର ଅଟକି ଯାଇଛି । ନୂଆ ନିଯୁକ୍ତିର ସମ୍ଭାବନା ଉପରେ ପ୍ରାୟ ପୂର୍ଣ୍ଣଛେଦ ଲାଗିଯାଇଛି । ଆଉ ଏକ ନୂଆ ଟ୍ରେଣ୍ଡ ମଧ୍ୟ ସାମ୍ନାକୁ ଆସିଛି । ଆଇଟି କ୍ଷେତ୍ରରେ କାମ କରୁଥିବା କର୍ମଚାରୀ ମାନଙ୍କୁ ଏବେ ମଲ୍ଟି ସ୍କିଲଡ୍ ହେବାକୁ ପଡିବ । ଅର୍ଥାତ୍ କେବଳ ଗୋଟିଏ କାମ ନୁହେଁ, ଆବଶ୍ୟକତା ଅନୂଯାୟୀ ବିଭିନ୍ନ କ୍ଷେତ୍ରରେ କାମ କରି ଦପ୍ତରର ଚାହିଦା ପୂରଣ କରିବାକୁ ପଡିବ ।
ଭାରତର ଆଇଟି କମ୍ପାନୀ ଗୁଡିକ ମୁଖ୍ୟତ ରପ୍ତାନୀ ସେବା ପ୍ରଦାନ କରିଥାନ୍ତି । ସେଥିପାଇଁ ବିଶ୍ୱ ମାନ୍ଦାବସ୍ଥାର ପ୍ରଭାବ ଆଇଟି କମ୍ପାନୀରେ ସବୁଠାରୁ ଆଗ ଦେଖିବାକୁ ମିଳିଛି । ରାଜ୍ୟ ତଥା ଦେଶର ଅର୍ଥନୀତିକୁ ଆଇଟିର ଅବଦାନ ଧିରେ ଧିରେ ବଢିଚାଲିଛି । ଗତ ୧୦ ବର୍ଷ ମଧ୍ୟରେ ଘରୋଇ ଉତ୍ପାଦକୁ ଏହା ୬ରୁ ୭ ଗୁଣା ବୃଦ୍ଧି ପାଇଛି । ଏବେ ଏହି ଶିଳ୍ପରେ ମାନ୍ଦାବସ୍ଥାର ସ୍ଥିତି କଣ ପ୍ରଭାବ ପକାଇବ ତାହା ଉପରେ ସମସ୍ତଙ୍କ ନଜର ରହିଛି ।