ରାହୁଲଙ୍କ ମନ୍ତବ୍ୟକୁ ନେଇ କାଶ୍ମୀର ପ୍ରସଙ୍ଗରେ ଜାତିସଂଘକୁ ଚିଠି ଲେଖିଲା ପାକିସ୍ତାନ । ରାହୁଲ କହିଲେ, କାଶ୍ମୀର ଭାରତର ଆଭ୍ୟନ୍ତରୀଣ ମାମଲା, ଦଖଲ ଦେବାର ଅଧିକାର କାହାର ନାହିଁ ।
କନକ ବ୍ୟୁରୋ : ପାକିସ୍ତାନ ଖେଳିଲା ରାହୁଲ କାର୍ଡ । ଜାମ୍ମୁକାଶ୍ମୀର ଉପରେ ମିଳିତ ଜାତିସଂଘକୁ ପାକିସ୍ତାନ ଲେଖିଥିବା ଏକ ଚିଠିରେ ରାହୁଲ ଗାନ୍ଧିଙ୍କ କଥା ଉଲ୍ଲେଖ କରାଯାଇଛି । ଏହି ଚିଠିରେ କୁହାଯାଇଛି, ଭାରତର ଏକ ପ୍ରମୁଖ ରାଜନୈତିକ ଦଳର ନେତା ରାହୁଲ ଗାନ୍ଧି କହିଛନ୍ତି, କାଶ୍ମୀର ଅଶାନ୍ତ ରହିଛି ଓ ଏଠାରେ ଲୋକ ପ୍ରାଣ ହରାଉଛନ୍ତି । ଏହି ଘଟଣା ପରେ ଆଜି ରାହୁଲ ଗାନ୍ଧି ଟ୍ୱିଟ୍ କରି କହିଛନ୍ତି, କାଶ୍ମୀର ଭାରତର ଆଭ୍ୟନ୍ତରୀଣ ବ୍ୟାପାର, ଏଥିରେ ପାକିସ୍ତାନ କିମ୍ବା ଅନ୍ୟ ଦେଶ ମୁଣ୍ଡ ଖେଳାଇବା ଉଚିତ ନୁହେଁ । ସେପଟେ ବିଜେପି କହିଛି, ରାହୁଲଙ୍କ ମନ୍ତବ୍ୟ, ପାକିସ୍ତାନ ପାଇଁ ସହାୟକ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଜାମ୍ମୁକାଶ୍ମୀର ପ୍ରସଙ୍ଗରେ କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧି ଟ୍ୱିଟ୍ କରି ଲେଖିଛନ୍ତି, ସରକାରଙ୍କ କେତେକ ନିଷ୍ପତିକୁ ନେଇ ତାଙ୍କର ଅସହମତି ରହିଛି । କିନ୍ତୁ ଜମ୍ମୁକାଶ୍ମୀର ଭାରତର ଆଭ୍ୟନ୍ତରୀଣ ମାମଲା, ଏବଂ ଏହି ପ୍ରସଙ୍ଗରେ ପାକିସ୍ତାନ ସମେତ ଅନ୍ୟ ରାଷ୍ଟ୍ରର ଦଖଲ ଦେବାର କୌଣସି ଅଧିକାର ନାହିଁ । ଦଖଲ ଦେଲେ ଏହାକୁ ବରଦାସ୍ତ କରାଯିବନି । ଆଉ ଏକ ଟ୍ୱିଟ କରି ରାହୁଲ ଲେଖିଛନ୍ତି ଆତଙ୍କବାଦୀଙ୍କୁ ପାକିସ୍ତାନ ପ୍ରୋତ୍ସାହନ ଦେଉଥିବାରୁ ଜମ୍ମୁକାଶ୍ମୀରରେ ହିଂସା ଲାଗି ରହିଛି । ବିଶ୍ୱରେ ପାକିସ୍ତାନ ଆତଙ୍କବାଦୀଙ୍କ ମୂଳ ପ୍ରୋତ୍ସାହନକାରୀ ।
ପାକିସ୍ତାନର ଚିଠି ପରେ ରାହୁଲ ଗାନ୍ଧିଙ୍କ ଟ୍ୱିଟ । ରାହୁଲଙ୍କ ନାଁ ନେଇ ମିଳିତ ଜାତିସଂଘକୁ ଚିଠି ଲେଖିଥିଲା ପାକିସ୍ତାନ । ଜାମ୍ମୁକାଶ୍ମୀରରୁ ଧାରା ୩୭୦ ଉଚ୍ଛେଦ ହେବା ପରେ ଏହାକୁ ନେଇ ରାହୁଲ ଏକ ଟ୍ୱିଟ କରି ଲେଖିଥିଲେ, କାଶ୍ମୀରରେ ହିଂସାକାଣ୍ଡ ଚାଲିଛି ଓ ଲୋକ ମରୁଛନ୍ତି । ରାହୁଲଙ୍କ ଏହି ଟ୍ୱିଟକୁ ଆଧାର କରି ପାକିସ୍ତାନ ମିଳିତ ଜାତିସଂଘକୁ ଚିଠି ଲେଖିଛି । ଯେଉଁ ଚିଠିରେ ରାହୁଲଙ୍କ ଏହି ବୟାନର ଉଲ୍ଲେଖ କରାଯାଇଥିବା ପାକିସ୍ତାନର ମନ୍ତ୍ରୀ ଟ୍ୱିଟ କରିଛନ୍ତି ।
ଏବେ ଏହି ସବୁ ପ୍ରସଙ୍ଗରେ ରାହୁଲଙ୍କ ବୟାନକୁ ନେଇ ମୁହାଁମୁହିଁ ହୋଇଛନ୍ତି ଶାସକ ଓ ବିରୋଧୀ । ପାକିସ୍ତାନ ରାହୁଲଙ୍କ ବୟାନର ଅପବ୍ୟବହାର କରିଛି ବୋଲି ପକ୍ଷ ରଖିଛି କଂଗ୍ରେସ । ସେପଟେ ବିଜେପି ଏହି ଘଟଣାରେ ରାହୁଲଙ୍କୁ ଘେରିବା ସହ ହୃଦୟରୁ ନୁହେଁ ଚାପରେ ପଡି ରାହୁଲ ବୟାନ ବଦଳାଇଛନ୍ତି ବୋଲି କହିଛି ।
ଜାମ୍ମୁକାଶ୍ମୀରରୁ ଧାରା ୩୭୦ ଉଚ୍ଛେଦ ହେବା ପରେ ଏହି ପ୍ରସଙ୍ଗରେ ବାରମ୍ବାର ବିଶ୍ୱ ସମୁଦାୟକୁ ଗୁହାରୀ କରୁଛି ପାକିସ୍ତାନ । ଯେତେବେଳେ କେନ୍ଦ୍ର ସରକାର ସ୍ପଷ୍ଟ କରିସାରିଛନ୍ତି ଯେ ଏହା ଭାରତର ଅଭ୍ୟନ୍ତରୀଣ ପ୍ରସଙ୍ଗ । ଏପରିକି ମିଳିତ ଜାତିସଂଘର ଏକ ଅନୌପଚାରିକ ବୈଠକରେ ବି କାଶ୍ମୀର ଭାରତର ଅନ୍ତରୀଣ ପ୍ରସଙ୍ଗ ବୋଲି କୁହାଯାଇଥିଲା । ଏବେ ପୁଣି ଏହାକୁ ନେଇ ମିଳିତ ଜାତିସଂଘକୁ ଚିଠି ଲେଖିଛି ପାକିସ୍ତାନ ।