ହାତୀକୁ ହତ୍ୟା କରି ପୋଡି଼ ଦେବା ଘଟଣା: ବହିଷ୍କୃତ କର୍ମଚାରୀଙ୍କ ନାଁରେ ହୋଇନି ମାମଲା।
କନକ ବ୍ୟୁରୋ: ଶିମିଳିପାଳ ଅଭୟାରଣ୍ୟରେ ଦନ୍ତାହାତୀକୁ ହତ୍ୟା କରି ପୋଡିଦେବା ମାମଲାରେ ଶୁଣାଣି କରିଛନ୍ତି ହାଇକୋର୍ଟ । ହାତୀମୃତ୍ୟୁକୁ ରୋକିବାରେ ବିଫଳ ହୋଇଥିବାରୁ ପିସିସିଏଫ ଓ ଜେଟିଏଫଙ୍କୁ କୋର୍ଟ ଭର୍ସନା କରିଛନ୍ତି । ଏପରିକି ଶିମିଳିପାଳ ହାତୀ ଶିକାର ଘଟଣାରେ ନିଲମ୍ବିତ କର୍ମଚାରୀଙ୍କ ବିରୋଧରେ କାହିଁକି ଆଜିଯାଏଁ ଏତଲା ହୋଇନାହିଁ ବୋଲି କୋର୍ଟ ପ୍ରଶ୍ନ କରିଥିଲେ । ଆଗାମୀ ୨୨ ତାରିଖରେ ମାମଲାର ପରବର୍ତୀ ଶୁଣାଣି ହେବ, ଏବଂ ସେତେବେଳକୁ ଏହି କର୍ମଚାରୀଙ୍କ ବିରୋଧରେ କି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ଜଣାଇବା ପାଇଁ କୋର୍ଟ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ବଡକଥା ହେଉଛି ପିସିସିଏଫ କୋର୍ଟରେ ସ୍ୱୀକାର କରିଛନ୍ତି ଯେ, ଶିମିଳିପାଳ ଜାତୀୟ ଅଭୟାରଣ୍ୟରେ ହାତୀ ଶିକାର ପରେ ପ୍ରମାଣ ନଷ୍ଟ କରିବାକୁ ଉଦ୍ୟମ କରିଥିଲେ ବନ କର୍ମଚାରୀ । ଏନେଇ ଉଚ୍ଚସ୍ତରୀୟ ତଦନ୍ତ କରାଯିବାକୁ କହିଛନ୍ତି କ୍ଷେତ୍ର ନିର୍ଦ୍ଦେଶକ ଟି. ଅଶୋକ କୁମାର । ଘଟଣାର ତଦନ୍ତ ପାଇଁ ମୁଖ୍ୟ ବନ୍ୟପ୍ରାଣୀ ସଂରକ୍ଷକ କାର୍ଯ୍ୟାଳୟ ଭୁବନେଶ୍ୱରରୁ ଏକ ସ୍ୱତନ୍ତ୍ର ଟିମ୍ ମୟୁରଭଂଜ ଯିବେ । ପ୍ରମାଣ ନଷ୍ଟ କରିବାକୁ ଉଦ୍ୟମ କରିଥିବା ୩ ବନ କର୍ମଚାରୀଙ୍କୁ ନିଲମ୍ବିତ କରାଯାଇଛି ।
ଗତ ୭ତାରିଖରେ ଶିମିଳିପାଳ ଅଭୟାରଣ୍ୟର ଜେନାବିଲ ରେଞ୍ଜରେ ଏକ ବିରାଟ ଦନ୍ତାହାତୀକୁ ମାରି ଦାନ୍ତ କାଟି ନେଇଥିଲେ ଶିକାରୀ । ଆଉ ଅଭିଯୁକ୍ତଙ୍କୁ ଧରିବା ବଦଳରେ ଘଟଣାକୁ ଚାପିଦେବାକୁ ଉଦ୍ୟମ କରିଥିଲେ ବନ କର୍ମଚାରୀ । ମୃତହାତୀକୁ ପୋଡି ତା ଶରୀରକୁ ନଦୀରେ ଭସାଇ ଦେଇଥିଲେ । ଶିମିଳିପାଳ ବନବାସୀ ଏସଂପର୍କରେ ଅଭିଯୋଗ କରିବା ପରେ ଏହି ସାଂଘାତିକ ଘଟଣା ସାମ୍ନାକୁ ଆସିଥିଲା ।