୨୪ ଘଂଟାରେ ଦେଶରେ ୧୫ ପ୍ରତିଶତ କରୋନା ମାମଲା ବୃଦ୍ଧି: ଆଗାମୀ ୩-୪ ସପ୍ତାହ ଗୁରୁତ୍ୱପୂର୍ଣ୍ଣ କହିଲା ଓଡ଼ିଶା ସ୍ୱାସ୍ଥ୍ୟ ବିଭାଗ
କନକ ବ୍ୟୁରୋ: ପୁଣିଥରେ ଦେଶରେ କାୟା ମେଲାଉଛି କରୋନା ସଂକ୍ରମଣ । ପ୍ରତିଦିନ ନୂଆ ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି । ଯଦିଓ ଡାକ୍ତରଖାନାରେ ରୋଗୀଙ୍କ ସଂଖ୍ୟା ବୃଦ୍ଧି ପାଉନାହିଁ, ତେବେ ତୃତୀୟ ଲହର ଶେଷ ହେବା ପରେ ତଳମୁହାଁ ହୋଇଥିବା ସଂକ୍ରମଣ ହଠାତ୍ ଉପର ମୁହାଁ ହେବା ଚିନ୍ତାର କାରଣ ପାଲଟିଛି ।
Kanak News is now on WhatsApp
Join and get latest news updates delivered to you via WhatsApp
ଦେଶର କରୋନା ମିଟର
ତାରିଖ ସଂକ୍ରମଣ
ଏପ୍ରିଲ ୨୧ ୨,୩୮୦
ଏପ୍ରିଲ ୨୦ ୨,୦୬୭
ଏପ୍ରିଲ ୧୯ ୧,୨୪୭
ଏପ୍ରିଲ ୧୮ ୨୧୮୩
ଏପ୍ରିଲ ୧୭ ୧୧୫୦
ଏପ୍ରିଲ ୨୦ ତାରିଖରେ ୨ ହଜାର ୬୭ ନୂଆ ଆକ୍ରାନ୍ତ ଚିହ୍ନଟ ହୋଇଥିବା ବେଳେ ୨୧ ତାରିଖରେ ଏହା ୧୫ ପ୍ରତିଶତ ବୃଦ୍ଧି ପାଇଁ ୨ ହଜାର ୩୮୦ରେ ପହଁଚିଛି । ଗତ ୫ ଦିନରେ ୩ ଥର ୨ ହଜାର ଉପରେ ନୂଆ ମାମଲା ଆସିଛି । ଏପ୍ରିଲ ୧୭ ତାରିଖରେ ଦେଶରେ ୧୧୫୦ କରୋନା ସଂକ୍ରମିତ ଚିହ୍ନଟ ହୋଇଥିବା ବେଳେ ୫ ଦିନ ମଧ୍ୟରେ ଦୁଇ ଗୁଣ ହୋଇଯାଇଛି ଦୈନିକ ସଂକ୍ରମଣ । ସବୁଠୁ ଚିନ୍ତା ବଢ଼ାଇଛି ଆର-ଭାଲ୍ୟୁ । ନଜର ପକାନ୍ତୁ ୪ ସପ୍ତାହ ମଧ୍ୟରେ କିପରି ଆର୍-ଭାଲ୍ୟୁ ବୃଦ୍ଧି ପାଇଛି ।
ଦେଶର ଆର୍-ଭାଲ୍ୟୁ
ଏପ୍ରିଲ ୨୧ ୧.୧୬
୧ ସପ୍ତାହ ପୂର୍ବରୁ ୦.୯୬
୨ ସପ୍ତାହ ପୂର୍ବରୁ ୦.୮୫
୪ ସପ୍ତାହ ପୂର୍ବରୁ ୦.୭୭
୩ ମାସ ପରେ ପୁଣିଥରେ ଆର-ଭାଲ୍ୟୁ ୧ ଟପିଛି । ଏପ୍ରିଲ ୨୧ ତାରିଖରେ ଏହା ୧.୧୬ ରହିଛି । ଗୋଟିଏ ସପ୍ତାହ ପୂର୍ବରୁ ୦.୯୬ ଥିଲା, ୨ ସପ୍ତାହ ତଳେ ଏହା ଥିଲା ୦.୮୫ । ଏବଂ ୪ ସପ୍ତାହ ପୂର୍ବରୁ ୦.୭୭ ରହିଥିଲା ଆର୍ ଭାଲ୍ୟୁ । ଆର-ଭାଲ୍ୟୁରୁ ଜଣା ପଡ଼େ ଜଣେ ସଂକ୍ରମିତ କେତେ ଜଣଙ୍କୁ ସଂକ୍ରମିତ କରୁଛି ।
ଦିଲ୍ଲୀ, ହରିୟାଣା, ୟୁପି, କେରଳ ଓ କର୍ଣ୍ଣାଟକରେ କରୋନା ବଢ଼ିବାରେ ଲାଗିଛି । ଓଡ଼ିଶାରେ ସ୍ଥିତି ସଂପୂର୍ଣ୍ଣ ନିୟନ୍ତ୍ରଣରେ ଥିଲେ ବି ଦିଲ୍ଲୀରେ ସଂକ୍ରମଣ ବଢ଼ିବାର ମାସକ ଭିତରେ ରାଜ୍ୟରେ ସଂକ୍ରମଣ ବଢ଼ିଥାଏ । ତେଣୁ ଆଗାମୀ ୩-୪ ସପ୍ତାହ ଗୁରୁତ୍ୱପୂର୍ଣ୍ଣ କହିଛନ୍ତି ସ୍ୱାସ୍ଥ୍ୟ ନିର୍ଦ୍ଦେଶକ ଡାକ୍ତର ବିଜୟ ମହାପାତ୍ର ।
ଦେଶର କିଛି ରାଜ୍ୟରେ କରୋନା ବୃଦ୍ଧି ପାଉଥିବାରୁ ଜିଲ୍ଲାପାଳମାନଙ୍କୁ ସତର୍କ ରହିବାକୁ କହିଛି ରାଜ୍ୟ ସ୍ୱାସ୍ଥ୍ୟ ବିଭାଗ । ବୁଷ୍ଟର ଡୋଜ୍ ଓ ଟିକା ନେଇନଥିବା ବ୍ୟକ୍ତିଙ୍କୁ ତୁରନ୍ତ ଟିକା ନେବା ପାଇଁ ପରାମର୍ଶ ଦିଆଯାଇଛି ।