ମୁଣ୍ଡୁଳିରେ ପହଁଞ୍ଚିବ ହୀରାକୁଦ ଡ୍ୟାମ ଛାଡିଥିବା ପାଣି । ପ୍ରବାହିତ ହେବ ୫ଲକ୍ଷ କ୍ୟୁସେକ୍ ବନ୍ୟାଜଳ । ତଳିଆ ଅଂଚଳବାସୀଙ୍କ ଭିତରେ ଛନକା
ଅନୁଗୁଳ, କେନ୍ଦ୍ରାପଡ଼ା ଓ କଟକରେ ସ୍ଥିତି ସାଂଘାତିକ୍ ; ପାଣି ଘେରରେ ବୁଡି ରହିଛି ଗାଁ
କନକ ବ୍ୟୁରୋ: ଆଜି ମୁଣ୍ଡୁଳିରେ ପହଁଞ୍ଚିବ ହୀରାକୁଦ ଡ୍ୟାମ ଛାଡିଥିବା ବନ୍ୟା ପାଣି । ଜଳ ସମ୍ପଦ ବିଭାଗର ସୂଚନା ଅନୁଯାୟୀ ମୁଣୁଳି ନିକଟରେ ପାୟ ୫ଲକ୍ଷ କ୍ୟୁସେକ୍ ଜଳ ପ୍ରବାହିତ ହେବ । ହୀରାକୁଦ ଡ୍ୟାମରୁ ୨୦ଟି ଗେଟ୍ ଦେଇ ଗତକାଲି ଛଡାଯାଇଥିବା ପାଣି ଆଜି ସନ୍ଧ୍ୟାବେଳକୁ ମୁଣ୍ଡୁଳିରେ ପହଁଞ୍ଚିବ । ତେଣୁ ମହାନଦୀ ଆହୁରି ଫୁଲିବା ସମ୍ଭାବନା ରହିଛି । ଫଳରେ ତଳିଆ ଅଂଚଳ ପାଇଁ ବନ୍ୟା ଆଶଙ୍କା ସୃଷ୍ଟି ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ଉପରମୁଣ୍ଡରେ ପ୍ରବଳ ବର୍ଷା ଯୋଗୁଁ ହୀରାକୁଦ ଜଳଭଣ୍ଡାରର ଜଳସ୍ତର ୬୨୦ ଦଶମିକ୍ ଆଠ ସାତ ଫୁଟ ରହିଛି । ଏବଂ ଜଳଭଣ୍ଡାରକୁ ପ୍ରତି ସେକେଣ୍ଡରେ ୧ଲକ୍ଷ ୫୧ ହଜାର ୫୫୦ କ୍ୟୁସେକ ଜଳ ପ୍ରବେଶ କରୁଥିବାବେଳେ ନିଷ୍କାସିତ ହେଉଛି ୩ଲକ୍ଷ ୧୫ହଜାର କ୍ୟୁସେକ୍ ଜଳ । ଏବେ ମୋଟ ୨୦ଟି ଗେଟ୍ ଦେଇ ଜଳଭଣ୍ଡାରରୁ ବନ୍ୟାଜଳ ନିଷ୍କାସିତ ହେଉଛି । ଯଦି ଆଉ ଗେଟ୍ ଖୋଲାଯାଏ ତେବେ ସ୍ଥିତି ବିଗିଡିବାର ସମ୍ଭାବନା ରହିଛି ।
ସେପଟେ, ମହନଦୀ ଫୁଲିବା ଯୋଗୁଁ ଉପକୂଳ ଓଡ଼ିଶାରେ ସୃଷ୍ଟି ହୋଇଛି ବନ୍ୟା ସ୍ଥିତି । ବିଶେଷ କରି ଲଗାଣବର୍ଷା ଯୋଗୁଁ ମହାନଦୀ କୂଳରେ ଥିବା ଅନେକ ଗାଁରେ ଏବେ ବନ୍ୟା ସ୍ଥିତି ଦେଖାଦେଇଛି । ବିଶେଷ କରି ଅନୁଗୁଳ, କେନ୍ଦ୍ରାପଡ଼ା ଏବଂ କଟକ ଜିଲ୍ଲାର ବିଭିନ୍ନ ସ୍ଥାନରେ ବନ୍ୟାସ୍ଥିତି ଉପୁଜିଛି । ଆଉ ଆଗକୁ ପୁଣି ମାଡ଼ି ଆସୁଛି ହୀରାକୁଦ ବନ୍ଧର ବନ୍ୟାଜଳ । ସେହିଭଳି ମହାନଦୀରେ ବନ୍ୟା ଜଳ ଆସିବାରୁ ବାଙ୍କୀରେ ସ୍ଥିତି ଗମ୍ଭୀର ହୋଇଛି । ବାଙ୍କିର ବିଭିନ୍ନ ଗାଁରେ ବନ୍ୟା ପାଣି ପ୍ରବେଶ କରିଛି । ପ୍ରାୟ ୨୦ଟି ପଂଚାୟତ ପାଣି ଘେରରେ ରହିଛି । ଆଜି ପାଣି ଆହୁରି ବଢ଼ିବାର ସମ୍ଭାବନା ଥିବାରୁ ଏହା ଆହୁରି ସଂଗିନ ସ୍ଥିତି ସୃଷ୍ଟି କରିବାର ଆଶଙ୍କା କରି ଲୋକମାନେ ଛାନିଆ ହୋଇପଡିଛନ୍ତି । କୁସପଙ୍ଗି-ବାଙ୍କୀ ଆପ୍ରୋଚ ରୋଡ ଧୋଇଯାଇଛି । ସେହିପରି ରାସ୍ତା ଉପରେ ବନ୍ୟା ଜଳ ପ୍ରଭାବିତ ହେଉଥିବାରୁ ବୈଦେଶ୍ୱର-ବାଙ୍କୀ ଯୋଗାଯୋଗ ବିଚ୍ଛିନ୍ନ ହୋଇଛି । ପ୍ରଶାସନ ତରଫରୁ ୨୦ ହଜାର ଲୋକଙ୍କୁ ବାତ୍ୟା ଆଶ୍ରୟସ୍ଥଳୀକୁ ସ୍ଥାନାନ୍ତର କରାଯାଇଛି । ସମସ୍ତଙ୍କୁ ସେଠାରେ ରନ୍ଧାଖାଦ୍ୟ ଯୋଗାଇ ଦିଆଯାଉଥିବା ସୂଚନା ମିଳିଛି ।