ହିମାଚଳର ମୁଖ୍ୟମନ୍ତ୍ରୀ ଭାବେ ଶପଥ ନେଲେ ସୁଖବିନ୍ଦରସିଂ ସୁଖୁ, ରାହୁଲ ଗାନ୍ଧୀ ଓ ପ୍ରିୟଙ୍କା ସମେତ ଅନ୍ୟ ନେତା ବି ହେଲେ ସାମିଲ
କନକ ବ୍ୟୁରୋ : ହିମାଚଳ ପ୍ରଦେଶର ମୁଖ୍ୟମନ୍ତ୍ରୀ ଭାବେ ସୁଖବିନ୍ଦରସିଂ ସୁଖୁ ଶପଥ ନେଇଛନ୍ତି । ତାଙ୍କ ସହ ଉପ ମୁଖ୍ୟମନ୍ତ୍ରୀ ଭାବେ ମୁକେଶ ଅଗ୍ନିହୋତ୍ରୀ ବି ଶପଥ ନେଇଛନ୍ତି । ଏହି ଶପଥ ଗ୍ରହଣ ଉତ୍ସବରେ ରାଜ୍ୟପାଳ ତାଙ୍କ ପଦ ଓ ଗୋପନୀୟତାର ଶପଥ ପାଠ କରାଯାଇଛି । ଏହି ଅବସରରେ କଂଗ୍ରେସ ନେତା ରାହୁଲ ଗାନନ୍ଧୀ ଓ ପ୍ରିୟଙ୍କା ଗାନ୍ଧୀ ବି ଉପସ୍ଥିତ ଥିଲେ । ଶିମଲାର ରିଜ ମୈଦାନରେ ଏହି ଶପଥପାଠ ଉତ୍ସବ ଅନୁଷ୍ଠିତ ହୋଇଛି । ସେପଟେ ଏହି କାର୍ଯ୍ୟକ୍ରମରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ , ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ ଓ ଛତିଶଗଡ ମୁଖ୍ୟମନ୍ତ୍ରୀ ଭୂପେଶ ବଘେଲ ବି ଉପସ୍ଥିତ ଥିଲେ ।
Kanak News is now on WhatsApp
Join and get latest news updates delivered to you via WhatsApp
ଶପଥ ଗ୍ରହଣ ପୂର୍ବରୁ ସୁଖବିନ୍ଦରସିଂ ସୁଖୁ ଏକ ନିମନ୍ତ୍ରଣ ପତ୍ର ନେଇ ରାଜ୍ୟ କଂଗ୍ରେସର ଅଧ୍ୟକ୍ଷ ପ୍ରତିଭା ସିଂଙ୍କ ବାସଭବନକୁ ଯାଇଥିଲେ । ଏହାପରେ ସୁଖବିନ୍ଦର ସିଂ କହିଥିଲେ କି ରାଜ୍ୟ କଂଗ୍ରେସର ମୁଖ୍ୟ ହେଉଛନ୍ତି ପ୍ରତିଭା ସିଂ । ତେଣୁ ରାଜ୍ୟର ଦଳ ତାଙ୍କରି ମାର୍ଗଦର୍ଶନରେ କାମ କରିବ ।
ସେପଟେ ସୁଖବିନ୍ଦରଙ୍କ ମା ଏହି ସମାରୋହରେ ଉପସ୍ଥିତ ରହି ଭାବବିହ୍ୱଳ ହୋଇପଡିଥିଲେ । ସେ କହିଥିଲେ ମୋ ପୁଅ ଜଣେ ସେବାମନୋବୃତ୍ତିର ବ୍ୟକ୍ତି, ସେ ପୂର୍ବରୁ ଲୋକଙ୍କ ସେବା କରୁଥିଲେ ଓ ଏବେ ସେହି ସେବାକୁ ତ୍ୱରାନ୍ୱିତ କରିବେ ।
ସୂଚନା ଥାଉକି ଚଳିତ ବିଧାନସଭା ନିର୍ବାଚନରେ ଶାସନରେ ଥିବା ବିଜେପିକୁ ପରାଜିତ କରି କଂଗ୍ରେସ ହିମାଚଳରେ କ୍ଷମତା ଦଖଲ କରିଛି । ରାଜ୍ୟର ମୋଟ ୬୮ ଟି ଆସନ ମଧ୍ୟରୁ କଂଗ୍ରେସ ୪୦ ଟି ଆସନରେ ବିଜୟୀ ହୋଇଥିବା ବେଳେ ବିଜେପି ୨୫ ଟି ଆସନରେ ବିଜୟୀ ହୋଇଥିଲା । ପରାଜୟ ପରେ ମୁଖ୍ୟମନ୍ତ୍ରୀ ଜୟରାମ ଠାକୁର ନିଜ ପଦରୁ ଇସ୍ତଫା ଦେଇଥିଲେ ।