ଅସହାୟ ଅବସ୍ଥାରେ ମା-ଝିଅ: ମାଟିରେ ମିଶିଲାଣି ଚାଳ ଛପର ଘର, ଶୀତ ରାତିରେ ଖୋଲା ଆକାଶ ତଳେ ବିତୁଛି ଜୀବନ
କନକ ବ୍ୟୁରୋ: ଆଖିରେ ଆଖିଏ ଲୁହ, ମନରେ ଅସରନ୍ତି କୋହ । ଦୁଃଖ ଶୁଣିବାକୁ କେହି ନାହିଁ । କାନ୍ଦି କାନ୍ଦି ମନର କଥା କହିବାବେଳକୁ କୋହ ସମ୍ଭାଳି ପାରୁନାହାନ୍ତି । ବୋଝ ଉପରେ ଲଳିତା ବିଡା ପରି ଦାରିଦ୍ର୍ୟ ସହ ରୋଗ ସେମାନଙ୍କୁ ଯମ ପରି ଜଗିଛି । ମୁଣ୍ଡ ଗୁଞ୍ଜିଥିବା ଚାଳଛପର ଘରଟି ଭାଙ୍ଗି ମାଟିରେ ମିଶିଯିବା ପରେ ବାସହାର ହୋଇ ଶୀତ କାକରରେ ବିତୁଛି ବୁଢି ମା’ ଆଉ ରୋଗିଣା ଝିଅର ଜୀବନ । ରୋଷେଇ ବାସଠାରୁ ଆରମ୍ଭକରି ଘରର ସମସ୍ତ ଆସବାବପତ୍ର ବିକ୍ଷିପ୍ତ ହୋଇ ପଡିଛି । ନା ଘର ସଜାଡିବାକୁ ସାମର୍ଥ୍ୟ ଅଛି ନା ରୋଗ ଭଲ କରିବାକୁ ଅଛି ସମ୍ବଳ ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ରାପଡା ଜିଲ୍ଲା କଳାଗଡ ଗ୍ରାମରେ ରୁହନ୍ତି ୮୫ ବର୍ଷିୟା ବୃଦ୍ଧା ସତୀ ମଲ୍ଲିକ ଏବଂ ତାଙ୍କର ଝିଅ ନର୍ମଦା ମଲ୍ଲିକ । ସ୍ୱାମୀ ଧନେଶ୍ୱୟ ମଲ୍ଲିକ ଆରପାରିକୁ ଚାଲିଯିବା ପରେ ବେସାହାରା ହୋଇପଡିଛନ୍ତି ବୃଦ୍ଧା ନିର୍ମଳା ତାଙ୍କର ଝିଅ । ମୁଣ୍ଡ ଗୁଞ୍ଜିଥିବା ଚାଳିଆ ଘରଟି ଭାଙ୍ଗି ମାଟିରେ ମିଶିଯିବା ପରେ ବାସହାରା ହୋଇ ଖୋଲା ଆକାଶ ତଳେ ଶୀତ କାରରେ ବିତୁଛି ଜୀବନ । ରୋଷେଇବାସଠାରୁ ଆରମ୍ଭ କରି ଖାଇବା ପିଇବା ପର୍ଯ୍ୟନ୍ତ ସବୁ ସେଇ ଭଙ୍ଗା ଘରେ ହିଁ ହେଉଛି ।
ବୃଦ୍ଧା ନିର୍ମଳା ବୟସର ଅପରାହ୍ନରେ ବିଭିନ୍ନ ରୋଗ ଗ୍ରସ୍ତ ହୋଇ ନିଜର ଶ୍ରବଣ ଶକ୍ତି ଏବଂ ଦୃଷ୍ଟି ଶକ୍ତି ହରେଇ ବସିଥିବା ବେଳେ ଝିଅର ପେଟରେ ହୋଇଛି ଟ୍ୟୁମର୍ । ଅର୍ଥାଭାବରୁ ଝିଅର ଚିକିତ୍ସା ହୋଇପାରୁ ନଥିବା ପ୍ରକାଶ କରିଛନ୍ତି ସତୀ ଏବଂ ନିଜେ ଝିଅ ନର୍ମଦା । ଏ ଶୀତ ଦିନରେ ଯନ୍ତ୍ରଣା ଦ୍ୱିଗୁଣ ହୋଇଯାଉଛି । ଛପର ନଥିବାରୁ କାକରରେ ଖୋଲା ଆକାଶ ତଳେ ଜୀବନ ବିତାଉଛନ୍ତି ମା-ଝିଅ ।
ଅସହାୟ ବୃଦ୍ଧା ସତୀଙ୍କର ଚାଳ ଛପର ଘରଟି ଦୀର୍ଘଦିନ ହେବା ଭାଙ୍ଗି ମାଟିରେ ମିଶିଯାଇଛି । ଅର୍ଥାଭାବରୁ ଘରକୁ ମରାମତି କରିପାରି ନାହାନ୍ତି । ଟଙ୍କାଟିଏ ରୋଜଗାର ନଥିବାରୁ କେବଳ ଭତା ଆଉ ୧୦ କିଲୋ ରାସନ ଚାଉଳରେ ଚାଲୁଛି ସଂସାର । ଦୁଇ ପ୍ରାଣୀ କୁଟୁମ୍ବକୁ ୧୦ କିଲୋ ଚାଉଳ ୧୦ ଦିନରେ ସରିଯାଉଛି ଆଉ ଅନ୍ୟ ଦିନରେ ପରର ହାତ ଟେକାକୁ ଅନେଇ ବସନ୍ତି । ଯେଉଁଠି ଦୁଇଓଳା ଦୁଇ ମୁଠା ଖାଇବା ପାଇଁ ମା ଝିଅଙ୍କୁ ପ୍ରତିଦିନ ସଂଘର୍ଷ କରିବାକୁ ପଡୁଛି ସେଠି ରୋଗର ଚିକିତ୍ସା ଏବଂ ଘର ମରାମତି କଥା କିଏ ପଚାରେ । ପକ୍କା ଘର ଖଣ୍ଡିଏ ପାଇଁ ସ୍ଥାନୀୟ ଜନପ୍ରତିନିଧୀ ଏବଂ ଜିଲ୍ଲା ପ୍ରଶାସନକୁ ବାରମ୍ବାର ଜଣାଇଲେ ମଧ୍ୟ ଆଜି ପର୍ଯ୍ୟନ୍ତ ସରକାରୀ ଘର ଖଣ୍ଡିଏ ପାଇବାର ସ୍ୱପ୍ନ ସ୍ୱପ୍ନରେ ରହିଯାଇଛି । ଘର ନଥିବାରୁ ଜିବନକୁ ପାଣି ଛଡାଇ କିଛିଦିନ ବାହାରେ ମା ଝିଅ ଶୋଇଥିବା ମଧ୍ୟ କରିଥିବାର ପ୍ରକାଶ କରିଛନ୍ତି । ଭଙ୍ଗା ଚାଳ ଛପର ଘର ଭାଙ୍ଗିଯିବା ପରେ ଏବେ ମା ଆଉ ଝିଅ ଅନ୍ୟ ଘରେ ଆଶ୍ରୟ ନେଇଛନ୍ତି ।
ଅସହାୟ ଅବସ୍ଥାରେ ଜୀବନ ଯାପନ କରୁଥିବା ବୃ୍ଦ୍ଧା ସତୀ ଏବଂ ତାଙ୍କର ଝିଅଙ୍କ ଉପରେ କାହାରି ନଜର ପଡୁନି । ସେମାନଙ୍କ ଦୁଃଖ ଦେଖିଲା ପରେ ଆପଣ ବି ବୁଝିପାରିବେ ସେମାନେ ସତରେ ସାହାଯ୍ୟ ର ହକଦାର । ତେଣୁ ଜିଲ୍ଲା ପ୍ରଶାସନ ସେମାନଙ୍କୁ ସାହାଯ୍ୟ କରିବାକୁ ଗ୍ରାମବାସୀମାନେ ଦାବି କରିଛନ୍ତି ।