୬ ବର୍ଷ ପରେ କୋଲକତା ନାଇଟ୍ ରାଇଡର୍ସକୁ ଫେରିଲେ ଗୌତମ ଗମ୍ଭୀର । ଜାଣନ୍ତୁ ଟିମର କେଉଁ ପଦ ସମ୍ଭାଳିବେ ଏହି ପୂର୍ବତନ ଖେଳାଳୀ
କନକ ବ୍ୟୁରୋ : ୨୦୨୪ ଆଇପିଏଲ ପୂର୍ବରୁ ବଡ ପରିବର୍ତ୍ତନ ହୋଇଛି । ଗୌତମ ଗମ୍ଭୀର ୬ ବର୍ଷ ପରେ କୋଲକତା ନାଇଟ ରାଇଡର୍ସକୁ ଫେରୁଛନ୍ତି । ଗୌତମ ଗମ୍ଭୀର ଏବେ ଲକ୍ଷ୍ନୌ ସୁପର ଜ୍ୟାଣ୍ଟସ ସହ ଯୋଡି ହୋଇ ରହିଛନ୍ତି । ସେ ୨୦୨୨-୨୦୨୩ ଆଇପିଏଲରେ ଲକ୍ଷ୍ନୌ ସୁପର ଜ୍ୟାଣ୍ଟସ ଟିମର ମେଣ୍ଟର ଭାବେ କାର୍ଯ୍ୟ କରିଛନ୍ତି । ଗମ୍ଭୀର କୋଲକତା ନାଇଟ୍ ରାଇଡର୍ସର ଅଧିନାୟକ ଥିବା ବେଳେ ୨୦୧୨ ଓ ୨୦୧୪ ଆଇପିଏଲରେ ଦଳକୁ ବିଜୟୀ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ଗୌତମ ଗମ୍ଭୀର ୨୦୧୧ ରୁ ୨୦୧୭ ପର୍ଯ୍ୟନ୍ତ କୋଲକତା ନାଇଟ ରାଇଡର୍ସର ଅଧିନାୟକ ପଦ ସମ୍ଭାଳିଥିଲେ । ୨୦୧୭ ପରେ କୋଲକତା ନାଇଟ୍ ରାଇଡର୍ସରୁ ସମସ୍ତ ସଂପର୍କ ତୁଟାଇ ଦେଇଥିଲେ ଏହି ପୂର୍ବତନ ଖେଳାଳୀ । ହେଲେ ଏବେ ୬ ବର୍ଷ ପରେ ଗମ୍ଭୀର ପୁଣିଥରେ କୋଲକତା ନାଇଟ ରାଇଡର୍ସ ଟିମ୍ ସହ ଯୋଡି ହେବାକୁ ଯାଉଛନ୍ତି । ତାଙ୍କୁ ୨୦୨୪ ଆଇପିଏଲ ପାଇଁ କୋଲକତା ନାଇଟ୍ ରାଇଡର୍ସ ଟିମର ମେଣ୍ଟର ଭାବେ ନିଯୁକ୍ତ କରାଯାଇଛି ।
ଏନେଇ ଗୌତମ ଗମ୍ଭୀର ବୁଧବାର ଦିନ ସୋସିଆଲ ମିଡିଆ ଟ୍ୱିଟର (ଏକ୍ସ) ରେ ଏକ ପୋଷ୍ଟ ସେୟାର କରିଛନ୍ତି । ଏଥିରେ ସେ କୋଲକତା ନାଇଟ ରାଇଡର୍ସକୁ ଫେରୁଥିବା ନେଇ ସ୍ପଷ୍ଟ କରିଛନ୍ତି । ସେ ତାଙ୍କ ପୋଷ୍ଟରେ ଉଲ୍ଲେଖ କରିଛନ୍ତି କି ଲକ୍ଷ୍ନୌ ସୁପର ଜ୍ୟାଣ୍ଟସ ସହ ତାଙ୍କର ସଂପର୍କ ଶେଷ ହୋଇଛି । ଏନେଇ ସେ ଲକ୍ଷ୍ନୌ ସୁପର ଜ୍ୟାଣ୍ଟସ ଟିମ୍ ଓ କାର୍ଯ୍ୟକର୍ତ୍ତାଙ୍କୁ କୃତଜ୍ଞତା ଜଣାଇଛନ୍ତି ।