ପିଛା ଛାଡ଼ୁନି ଟ୍ରେନ୍ ଦୁର୍ଘଟଣା । ନୂଆପଡ଼ା ଖରିଆର ରୋଡରେ ପୁରୀ-ଦୂର୍ଗ ଇଣ୍ଟରସିଟି ଏକ୍ସପ୍ରେସରେ ନିଆଁ । ପ୍ରାଣ ବିକଳରେ ଟ୍ରେନରୁ ଓହ୍ଲାଇ ପଡ଼ିଲେ ଯାତ୍ରୀ
କନକ ବ୍ୟୁରୋ: ପିଛା ଛାଡ଼ୁନି ଟ୍ରେନ୍ ଦୁର୍ଘଟଣା । ଦିନକ ବ୍ୟବଧାନ ପରେ ପୁଣି ଟ୍ରେନରେ ଅଘଟଣ । ଦୁର୍ଗ-ପୁରୀ ଇଣ୍ଟରସିଟି ଏକ୍ସପ୍ରେସରେ ଅଗ୍ନିକାଣ୍ଡ ଘଟିଛି । ନୂଆପଡ଼ା ଜିଲ୍ଲା ଖରିଆର ରୋଡ୍ ରେଲୱେ ଷ୍ଟେସନରେ ଏହି ନିଆଁ ଲାଗିଥିଲା । ଖରିଆର ରୋଡ୍ ଅଗ୍ନିଶମ ବିଭାଗ କର୍ମଚାରୀ ଘଟଣା ସ୍ଥଳରେ ପହଞ୍ଚିି ତୁରନ୍ତ ନିଆଁକୁ ଆୟତ କରିଥିଲେ । ନିଆଁ ଲାଗିବା ପରେ ଷ୍ଟେସନରେ ଆତଙ୍କ ଖେଳିଯାଇଥିଲା । ଯାତ୍ରୀମାନେ ଟ୍ରେନରୁ ଓହ୍ଲାଇ ଦୌଡ଼ିବାରେ ଲାଗିଥିଲେ । ବ୍ରେକ୍ ସୁ’ ଘଷି ହୋଇ ନିଆଁ ଲାଗିଥିବା ସୂଚନା ମିଳିଛି । ତେବେ ଏଥିରେ କାହାର କୌଣସି କ୍ଷତି ହୋଇନଥିବା ଜଣାପଡ଼ିଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ, ଗୁରୁବାର ରାତି ପ୍ରାୟ ୧୦ଟା ବେଳେ ଛତିଶଗଡ଼ର ମହାସମୁନ୍ଦ ଜିଲ୍ଲା କୋମାଖାନା ନିକଟରେ ଟ୍ରେନରେ ନିଅାଁ ଲାଗିଥିବା ନେଇ ଯାତ୍ରୀମାନେ ରେଲୱେ କର୍ତ୍ତୃପକ୍ଷଙ୍କୁ ଜଣାଇଥିଲେ । କୋମଖାନା ଷ୍ଟେସନରେ ବିଶେଷ ସୁବିଧା ନଥିବାରୁ ରେଲୱେ କର୍ତୃପକ୍ଷ ସୁରକ୍ଷା ଦୃଷ୍ଟିରୁ ଟ୍ରେନକୁ ଖରିଆରରୋଡ୍ ଷ୍ଟେସନକୁ ଆଣିଥିଲେ । ଟ୍ରେନର ଏକ ଏସି ବଗି ଚକର ବ୍ରେକ ବାଇଣ୍ଡିଂରେ ଘଷି ହୋଇ ନିଆଁ ଲାଗିଥିଲେ । ଫଳରେ ସେଠାରୁ ପ୍ରବଳ ଧୂଆଁ ବାହାରୁ ଯାତ୍ରୀମାନେ ଭୟଭୀତ ହୋଇ ଟ୍ରେନରୁ ଓହ୍ଲାଇ ପଡ଼ିଥିଲେ । ସବୁ ଯାତ୍ରୀ ସୁରକ୍ଷିତ ଥିବା ବେଳେ ଘଂଟା ପରେ ରାତି ପ୍ରାୟ ୧୧ଟା ବେଳେ ଟ୍ରେନଟି ଖରିଆରରୋଡ୍ ଛାଡ଼ିଥିଲା । ସପ୍ତାହକ ମଧ୍ୟରେ ଓଡ଼ିଶାରେ ତୃତୀୟଥର ପାଇଁ ଏଭଳି ଟ୍ରେନ୍ ଦୁର୍ଘଟଣା ଘଟିଛି । ଗତ ୨ ତାରିଖରେ ବାଲେଶ୍ୱର ବାହାନଗାରେ ଭୟଙ୍କର ଟ୍ରେନ୍ ଦୁର୍ଘଟଣାରେ ୨୮୮ ଯାତ୍ରୀ ପ୍ରାଣ ହରାଇଥିଲେ । ଏହାର ୫ ଦିନ ପରେ ଅର୍ଥାତ୍ ୭ ତାରିଖରେ ଯାଜପୁର ରୋଡରେ ଇଞ୍ଜିନବିହୀନ ମାଲଗାଡ଼ିରେ ୬ଜଣ ଶ୍ରମିକ କଟିଯାଇଥିଲେ । ବାରମ୍ବାର ଏଭଳି ଦୁର୍ଘଟଣା ଘଟିବା ରେଳୱେ ବିଭାଗ ପାଇଁ ସମସ୍ୟା ଛିଡ଼ା କରିଛି ।