କନକ ବ୍ୟୁରୋ: ଓଡିଶାରେ ବାତ୍ୟା ଅସାନିର ପ୍ରଭାବ କେତେ ପଡିବ, ତାହା ସମ୍ପୂର୍ଣ୍ଣ ଆକଳନ ହୋଇନଥିଲେ ବି ରାଜ୍ୟର ବିଭିନ୍ନ ସ୍ଥାନରେ ପ୍ରବଳ ବର୍ଷା ହେବା ଏକ ପ୍ରକାର ନିଶ୍ଚିତ । ଏ ନେଇ ପାଣିପାଗ ବିଭାଗ ଓ ପ୍ରଶାସନ ପକ୍ଷରୁ ସତର୍କ କରାଯିବା ପରେ ଆତଙ୍କିତ ହୋଇପଡିଛନ୍ତି ଚାଷୀ ।
Kanak News is now on WhatsApp
Join and get latest news updates delivered to you via WhatsApp
ଫନି, ଫାଇଲିନ୍, ଭଳି ଏକାଧିକ ବାତ୍ୟାର କ୍ଷତିଗ୍ରସ୍ତ ହୋଇଥିବା ଚାଷୀ ଆଉ ଏକ ବାତ୍ୟା ନାଁ ଶୁଣି ଚମକି ପଡିଛନ୍ତି । ବାତ୍ୟା ଅସାନି ଓଡିଶା ଉପକୂଳରେ ମାଡ ହେବ କି ନାହିଁ ସ୍ପଷ୍ଟ ହୋଇନଥିଲେ ବି ଏହାର ପ୍ରଭାବରେ ପ୍ରବଳ ବର୍ଷା ହେବା ସମ୍ଭାବନା ଥିବାରୁ ଚାଷୀ ମନରେ ଛନକା ପଶିଛି । ଆଉ ଏଭଳି ସ୍ଥିତିରେ ଚାଷ ଜମିରେ ଯେଉଁ ଫସଲ ଅଛି ତାକୁ ଅମଳ କରିବାରେ ଲାଗି ପଡିଛନ୍ତି । ପିପିଲିରେ ଜମିରେ ଥିବା ପନିପରିବା ଫସଲକୁ ବାତ୍ୟାରେ ନଷ୍ଟ ହେବା ପୂର୍ବରୁ ତୋଳି ଆଣିଛନ୍ତି ଚାଷୀ ପରିବାର । ସମ୍ପୂର୍ଣ୍ଣ ଉଜୁଡିଯିବା ପୂର୍ବରୁ ପାକଳ ହୋଇନଥିଲେ ବି ଧାନକୁ କାଟି ନେଇଛନ୍ତି ।
ତେବେ କେବଳ ଚାଷୀ ନୁହଁନ୍ତି ଭଲ ଦିପଇସା ରୋଜଗାର କରିବା ଆଶାରେ ଶୁଖୁଆ ବ୍ୟବସାୟ ଆରମ୍ଭ କରିଥିବା ବାଲେଶ୍ୱର ଜିଲ୍ଳା ବାହାନଗା ଅଞ୍ଚଳର ସ୍ୱୟଂ ସହାୟିକା ଗୋଷ୍ଠିର ମହିଳାମାନେ ଚିନ୍ତାରେ ପଡିଛନ୍ତି । ବର୍ଷା ହେଲେ ଅଧା ଶୁଖିଥିବା ଶୁଖୁଆ ନଷ୍ଟ ହୋଇଯିବା ଆଶଙ୍କାରେ କମ୍ ଦାମରେ ବିକ୍ରି କରିବାକୁ ବାଧ୍ୟ ହୋଇଛନ୍ତି । ତେବେ ଜିରୋ କାଜୁଆଲଟି ଲକ୍ଷ୍ୟ ନେଇ ପ୍ରସ୍ତୁତି ଆରମ୍ଭ କରିଛି ଅଗ୍ନିଶମ ବାହିନୀ । ବାତ୍ୟା ଦ୍ୱାରା ଅଧିକ ପ୍ରଭାବିତ ହେବାର ଆଶଙ୍କା ଥିବାରୁ ଗୋପ ଓ କୋଣାର୍କ ଅଞ୍ଚଳରେ ଅଗ୍ନିଶମ ବାହିନୀ ପକ୍ଷରୁ ବାତ୍ୟା ଆଶ୍ରୟସ୍ଥଳ ଗୁଡିକର ଯାଞ୍ଚ କରାଯାଇଛି । ଏଥିସହ ଲୋକଙ୍କୁ କିପରି ସୁରକ୍ଷିତ ଉଦ୍ଧାର କରାଯାଇପାରିବ, ସେ ନେଇ ଗ୍ରାମବାସୀଙ୍କ ସହ ଆଲୋଚନା କରିଛନ୍ତି ଅଗ୍ନିଶମ କର୍ମଚାରୀ ।
ସେପଟେ ଅସ୍ତରଙ୍ଗରେ ମଧ୍ୟ ବାତ୍ୟା ମୁକାବିଲା ପାଇଁ ପ୍ରସ୍ତୁତି ଆରମ୍ଭ ହୋଇଛି । ବାତ୍ୟା ଆଶ୍ରୟସ୍ଥଳୀର ସ୍ଥିତି ପରଖିବା ସହ କଟର ମେସିନ୍, ଜେନେରେଟର, ଆସ୍କା ଲାଇଟ୍, ଲାଇଫ ଜ୍ୟାକେଟ୍ର ଯାଞ୍ଚ କରିଛନ୍ତି ଅଗ୍ନିଶମ ବାହିନୀର କର୍ମଚାରୀ ।