ଦକ୍ଷିଣ-ପୂର୍ବ ବଙ୍ଗୋପସାଗରରେ ସୃଷ୍ଟି ହେଲା ଘୂର୍ଣ୍ଣିବଳୟ । ସୋମବାର ସକାଳ ସୁଦ୍ଧା ଲଘୁଚାପ ସୃଷ୍ଟି ହେବା ଆଶଙ୍କା । ୯ ତାରିଖ ବେଳକୁ ନେଇପାରେ ଅବପାତର ରୂପ
କନକ ବ୍ୟୁରୋ: ଦକ୍ଷିଣ-ବଙ୍ଗୋପସାଗରରେ ସୃଷ୍ଟି ହୋଇଛି ଘୂର୍ଣ୍ଣିବଳୟ । ଏହାର ପ୍ରଭାବରେ ୮ ତାରିଖ ସକାଳ ସୁଦ୍ଧା ଏକ ଲଘୁଚାପ କ୍ଷେତ୍ର ସୃଷ୍ଟି ହେବାର ଆଶଙ୍କା ରହିଛି । ୯ତାରିଖ ବେଳକୁ ଲଘୁଚାପଟି ଅଧିକ ଘନୀଭୂତ ହୋଇ ଅବପାତର ରୂପ ନେଇପାରେ । ପରବର୍ତ୍ତୀ ସମୟରେ ଏହା ଅଧିକ ଘନୀଭୂତ ହୋଇ ସାମୁଦ୍ରିକ ଝଡ ବା ବାତ୍ୟା ରୂପ ନେଇପାରେ ବୋଲି ପୂର୍ବାନୁମାନ କରିଛି ଆଇଏମଡି । ତେବେ ଲଘୁଚାପ କ୍ଷେତ୍ର ସୃଷ୍ଟି ହେବା ପରେ ବାତ୍ୟାର ଗତିପଥ ଓ ତୀବ୍ରତା ନେଇ ସ୍ପଷ୍ଟ ଚିତ୍ର ଆସିବ ବୋଲି ଭାରତୀୟ ପାଣିପାଗ ବିଭାଗ ଆକଳନ କରିଛି ।
Kanak News is now on WhatsApp
Join and get latest news updates delivered to you via WhatsApp
- ବଙ୍ଗୋପସାଗରରେ ସୃଷ୍ଟି ହେଲା ଘୂର୍ଣ୍ଣିବଳୟ
- ୮ ତାରିଖ ସକାଳ ସୁଦ୍ଧା ଲଘୁଚାପ ଆଶଙ୍କା
- ୯ ତାରିଖରେ ଅବପାତ, ପରେ ନେଇପାରେ ବାତ୍ୟାର ରୂପ
ଭାରତୀୟ ପାଣିପାଗ ବିଭାଗ ଯେଉଁ ଆକଳନ କରୁଥିଲା, ସେହି ଅନୁସାରେ ଦକ୍ଷିଣ-ପୂର୍ବ ବଙ୍ଗୋପସାଗରରେ ସୃଷ୍ଟି ହୋଇଛି ଘୂର୍ଣ୍ଣିବଳୟ । ତେଣୁ ବାତ୍ୟା ନେଇ ଯେଉଁ ଆଶଙ୍କା ରହିଥିଲା, ସମୁଦ୍ର ଭିତରର ସ୍ଥିତି ଅନୁକୂଳ ଥିବାରୁ ତା’ର ସମ୍ଭାବନା ବଢ଼ିଯାଇଛି । ୮ତାରିଖ ସକାଳ ସୁଦ୍ଧା ଏହା ଲଘୁଚାପ କ୍ଷେତ୍ରରେ ପରିଣତ ହୋଇପାରେ । ୯ତାରିଖ ବେଳକୁ ଅଧିକ ଘନୀଭୂତ ହୋଇ ଏହା ଅବପାତର ରୂପ ନେଇପାରେ । ପରବର୍ତ୍ତୀ ସମୟରେ ଏହା ଅଧିକ ଘନୀଭୂତ ହେବା ସହ ଉତ୍ତର ଦିଗକୁ ଗତି କରି କେନ୍ଦ୍ରୀୟ ବଙ୍ଗୋପସାଗରରେ ସାମୁଦ୍ରିକ ଝଡ ବା ବାତ୍ୟା ରୂପ ନେଇପାରେ ବୋଲି ପୂର୍ବାନୁମାନ କରିଛି ଆଇଏମଡି ।
- ଲଘୁଚାପ ହେବା ପରେ ଜଣାପଡ଼ିବ ବାତ୍ୟାର ଗତିପଥ
- ବାତ୍ୟାର ତୀବ୍ରତା ଓ ପ୍ରଭାବ ନେଇ ସ୍ପଷ୍ଟ ହେବ ଚିତ୍ର
ଯଦିଓ ବିଭିନ୍ନ ମଡେଲ ଆକଳନ କରୁଛି ଯେ, ଏହା ଅତି ଭୀଷଣ ସାମୁଦ୍ରିକ ଝଡ଼ରେ ରୂପ ନେଇପାରେ । କିନ୍ତୁ ଏ ନେଇ କୌଣସି ପୂର୍ବାନୁମାନ କରିନାହିଁ ଭାରତୀୟ ପାଣିପାଗ ବିଭାଗ । ଏହା ଉପରେ ତୀକ୍ଷଣ ନଜର ରଖାଯାଇଛି । ଲଘୁଚାପ କ୍ଷେତ୍ର ସୃଷ୍ଟି ହେବା ପରେ ବାତ୍ୟାର ଗତିପଥ ଓ ତୀବ୍ରତା ସଂପର୍କରେ ସ୍ପଷ୍ଟ ଚିତ୍ର ଆସିବ । ଆଣ୍ଡାମାନ-ନିକୋବର ଅଞ୍ଚଳରେ ମତ୍ସ୍ୟଜୀବୀ ଓ ପର୍ଯ୍ୟଟକଙ୍କୁ ସତର୍କ କରାଯାଇଛି କିନ୍ତୁ ଓଡ଼ିଶା ପାଇଁ ଏଯାଏଁ କୌଣସି ସତର୍କ ସୂଚନା ଜାରି କରିନାହିଁ ପାଣିପାଗ ବିଭାଗ ।
ଓଡ଼ିଶାରେ କ’ଣ ପ୍ରଭାବ ପଡିବ, ଏପର୍ଯ୍ୟନ୍ତ ସ୍ପଷ୍ଟ ହୋଇନଥିବା ବେଳେ ଉପକୂଳବାସୀଙ୍କ ମନରେ କିନ୍ତୁ ଛନକା ପଶିଛି । ସମ୍ଭାବ୍ୟ ବାତ୍ୟାକୁ ନଜରରେ ରଖି ଅଧା ପାଚିଲା ଧାନକୁ ତରତରରେ ଚାଷୀ କାଟି ନେଉଥିବା ଦେଖିବାକୁ ମିଳିଛି । ବାଲେଶ୍ୱର ବସ୍ତା ଅଞ୍ଚଳରେ ଏଥର ଭଲ ଫସଲ ହୋଇଥିଲା । ଅମଳ ପାଇଁ ଉପଯୁକ୍ତ ନହେଲେ ବି ପ୍ରାକୃତିକ ବିପର୍ଯ୍ୟୟ ଆଶଙ୍କାରେ ଭୟଭୀତ ହୋଇପଡ଼ିଛି ଚାଷୀ । ଭଲ ଭାବେ ଧାନ ପାଚିବା ପାଇଁ ଆହୁରି ୧୫ ଦିନ ଲାଗିଥାନ୍ତା । କାଳେ ସମ୍ପୂର୍ଣ୍ଣ କ୍ଷତି ହୋଇଯିବ, ଏହି ଆଶଙ୍କା ଘାରିଛି ଚାଷୀଙ୍କୁ । ଯାହା କିଛି ମିଳିବ, ସେହି ଆଶା ନେଇ କିଏ ମେସିନରେ ତ କିଏ ପରିବାର ଲୋକଙ୍କୁ ଲଗାଇ ଧାନ କାଟି ନେଉଛି ।
ବିଭିନ୍ନ ମଡେଲର ଆକଳନ ଅନୁସାରେ ବାତ୍ୟା ବାଂଲାଦେଶ ଓ ମିଆଁମାର ମୁହାଁ ହୋଇପାରେ । ତେବେ ମେ’ ମାସରେ ସମ୍ଭାବ୍ୟ ବାତ୍ୟାକୁ ନେଇ ଆସୁଥିବା ଖବର ଓଡ଼ିଶା ଉପକୂଳବାସୀଙ୍କ ମନରେ ଭୟସଞ୍ଚାର କରିଛି ।