କନକ ବ୍ୟୁରୋ : ପୁଣି ଘନେଇଲା ରାଜ୍ୟ କଂଗ୍ରେସ କନ୍ଦଳ । ପ୍ରସାଦ ହରିଚନ୍ଦନଙ୍କ ସହ କଂଗ୍ରେସର ଚାରି ଜଣ ବିଧାୟକ ଆଜି କଂଗ୍ରେସ ଉପାଧ୍ୟକ୍ଷ ରାହୁଲ ଗାନ୍ଧିଙ୍କୁ ଭେଟିଛନ୍ତି । ସୂତ୍ରରୁ ପ୍ରକାଶ, ନୂଆ ଦିଲ୍ଲୀରେ ରାହୁଲ ଗାନ୍ଧିଙ୍କ ସହ ବିଧାୟକ ଜାକବ ପ୍ରଧାନ, ଭୁଜବଳ ମାଝି, କୃଷ୍ଣ ସଗରିଆ, କୈଳାଶ କୁଲେସିକା ଆଲୋଚନା କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କେଉଁ କାରଣରୁ ଏପରି ତରବରିଆ ଭାବେ କଂଗ୍ରେସ ବିଧାୟକଙ୍କୁ ନେଇ ପିସିସି ସଭାପତି, ରାହୁଲ ଗାନ୍ଧିଙ୍କୁ ଭେଟିଛନ୍ତି, ତାହା ସ୍ପଷ୍ଟ ହୋଇନି । ତେବେ ଗୋଟେ କଥା ବୁଝାପଡୁଛି, କଂଗ୍ରେସ ବିଧାୟକ ଦଳ ଦି’ଭାଗ ହୋଇ ଯାଇଛି ।
ବିରୋଧୀ ଦଳର ନେତା ନରସିଂହ ମିଶ୍ରଙ୍କ ନେତୃତ୍ୱରେ କଂଗ୍ରେସ ବିଧାୟକ ଦଳ ଏକାଠି ହୋଇ ପୂର୍ବରୁ ରାହୁଲ ଗାନ୍ଧିଙ୍କୁ ଦେଖା କରିଥିଲେ । ପିସିସି ସଭାପତିଙ୍କ ବିରୋଧରେ ସେମାନଙ୍କ ଅସନ୍ତୋଷ ଜଣାଇଥିଲେ । ନେତୃତ୍ୱ ପରିବର୍ତନ ପାଇଁ ଅଡି ବସିଥିଲେ ବୋଲି ଆଲୋଚନା ହେଉଥିଲା, ସେଥିରେ ବାଧା ପହଁଚିଛି ।
ପୂର୍ବରୁ ପ୍ରସାଦ ହରିଚନ୍ଦନ, ଜିଲ୍ଲା ସଭାପତିମାନଙ୍କୁ ନେଇ ରାହୁଲଙ୍କୁ ଭେଟାଇଥିଲେ । ଦୁଇ ଗୋଷ୍ଠୀ ମଧ୍ୟରେ ବେଶ ଛକାପଂଝା ଦେଖିବାକୁ ମିଳିଥିଲା । ଏବେ ପରିବର୍ତିତ ପରିସ୍ଥିତିରୁ ଏହା ସ୍ପଷ୍ଟ ହେଉଛି ଯେ ୪ ବିଧାୟକଙ୍କୁ ପ୍ରସାଦ ନିଜ ପକ୍ଷକୁ ନେବାରେ ସଫଳ ହୋଇଛନ୍ତି ।
ଏମାନେ ରାହୁଲଙ୍କ ଆଗରେ ପ୍ରସାଦଙ୍କ ନେତୃତ୍ୱ ପ୍ରତି ସମର୍ଥନ ଜଣାଇଥିବା ଅନୁମାନ କରାଯାଉଛି । ମାତ୍ର ଏହା କଂଗ୍ରେସ କନ୍ଦଳକୁ ଆହୁରି ବଢାଇବ ବୋଲି ଚର୍ଚ୍ଚା ହେଉଛି ।