ଆଜି ଦିଲ୍ଲୀରେ ସମସ୍ତ ସାଂସଦଙ୍କୁ ନେଇ ବୈଠକ କରିବ କଂଗ୍ରେସ : ପୁଲିସ ଘେରାବନ୍ଦୀରେ କଂଗ୍ରେସ ଅଫିସ ସମେତ ସୋନିଆ ଗାନ୍ଧୀଙ୍କ ବାସଭବନ
ଗତକାଲି ନ୍ୟାଶନାଲ ହେରାଲ୍ଡ ଅଫିସ ସିଲ୍ କରିଥିଲା ଇଡି ; କଂଗ୍ରେସ କହିଲା ପ୍ରତିଶୋଧମୂଳକ ରାଜନୀତି
କନକ ବ୍ୟୁରୋ : ନ୍ୟାସନାଲ ହେରାଲ୍ଡ ଦୁର୍ନୀତି ମାମଲାରେ ଇଡି ଦିଲ୍ଲୀରେ ଥିବା ୟଙ୍ଗ୍ ଇଣ୍ଡିଆ କାର୍ଯ୍ୟାଳୟକୁ ସିଲ୍ କରିଛି । ଏହାପରେ ସୋନିଆ ଗାନ୍ଧୀ ଏବଂ କଂଗ୍ରେସ ମୁଖ୍ୟାଳୟ ବାହାରେ ପୋଲିସ କର୍ମୀଙ୍କୁ ଅଧିକରୁ ଅଧିକ ମୁତୟନ କରାଯାଇଛି । ଆଜି କଂଗ୍ରେସର ଏକ ବୈଠକ ଡାକିଛି । ସକାଳ ୯ଟା ୪୫ ମିନିଟରେ ଏହି ବୈଠକ ବସିବ । ଏଥିରେ କଂଗ୍ରେସର ସମସ୍ତ ସାଂସଦ ଉପସ୍ଥିତ ରହିବେ । ଦଳର ଆଗାମୀ ରଣନୀତି କଣ ହେବ ଏବଂ ଇଡିର କାର୍ଯ୍ୟାନୁଷ୍ଠାନ ବାବଦରେ ଆଲୋଚନା ହେବ ବୋଲି ସୂଚନା ରହିଛି ।
Kanak News is now on WhatsApp
Join and get latest news updates delivered to you via WhatsApp
ଗତକାଲି ରାତିରେ କଂଗ୍ରେସର ବରିଷ୍ଠ ନେତା ପି. ଚିଦାମ୍ବରମ, ସଲମାନ ଖୁର୍ସିଦ, ମଲ୍ଲିକାର୍ଜନୁ ଖାଡଗେ ଆଦି ନେତା ଏକାଠି ହୋଇ ବୈଠକ କରିଥିଲେ । ଏହାପରେ ଆଜି ସାଂସଦଙ୍କୁ ନେଇ ଦଳ ବୈଠକ କରିବ ବୋଲି ସୂଚନା ମିଳିଥିଲା । ଅନ୍ୟପଟେ ରାହୁଲ ଗାନ୍ଧୀ କର୍ଣ୍ଣାଟକ ଗସ୍ତ ଶେଷ କରି ବିଳମ୍ବିତ ରାତିରେ ଦିଲ୍ଲୀ ପହଞ୍ଚିଛନ୍ତି । ସେପଟେ ଦିଲ୍ଲୀ କଂଗ୍ରେସ ମୁଖ୍ୟାଳୟ ଏବଂ ସୋନିଆ ଗାନ୍ଧୀ ଓ ରାହୁଲ ଗାନ୍ଧୀଙ୍କ ଘର ବାହାରେ ପୋଲିସ୍ ମୁତୟନ କରାଯାଇଛି । ଯାହାକୁ ନେଇ କଂଗ୍ରେସ ପ୍ରତିକ୍ରିୟାଶୀଳ ହୋଇଛି ।
ପାର୍ଟି ଅଫିସକୁ ଘେରାବନ୍ଦୀ କରି ରଖିବା ଭଳି ରଖାଯାଉଛି । କେନ୍ଦ୍ରର ନାଲି ଆଖି ଆଗରେ କଂଗ୍ରେସ ମୁଣ୍ଡ ନୁଆଁଇବ ନାହିଁ ବୋଲି କହିଛି । ଇଡି ରେଡ୍ କରୁଥିବାରୁ ଉତେଜନା ମୂଳକ ପରିସ୍ଥିତି ସୃଷ୍ଟି ହୋଇପାରେ । ତେଣୁ ପୋଲିସ ମୁତୟନ ହୋଇଥିବା ସୂଚନା ରହିଛି । ନ୍ୟାସନାଲ ହେରାଲ୍ଡ ଖବରକାଗଜ ସହ ଜଡ଼ିତ ଅର୍ଥ ହେରଫେର ମାମଲାରେ ଇଡି କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧି ଓ ରାହୁଲ ଗାନ୍ଧୀଙ୍କୁ ପଚରାଉଚରା କରିବାର କିଛି ଦିନ ପରେ ଏହି ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି ।