ଲୋକସଭାରେ ଗୃହମନ୍ତ୍ରୀ ଆଣିଲେ ଆଇନ ପରିବର୍ତ୍ତନ ନେଇ ୩ଟି ବିଲ୍ । ଜାଣନ୍ତୁ ଆଇପିସି ଓ ସିଆରପିସି ଧାରାରେ କଣ ହେବ ପରିବର୍ତ୍ତନ ?
କନକ ବ୍ୟୁରୋ : ଲୋକସଭାରେ ସଂସଦୀୟ ସ୍ଥାୟୀ କମିଟିକୁ ୩ଟି ବିଧେୟକ ପଠାଯାଇଛି । ଯାହାର ଉଦ୍ଦେଶ୍ୟ ରହିଛି ଅପରାଧିକ ନ୍ୟାୟ ବ୍ୟବସ୍ଥାକୁ ସମ୍ପୂର୍ଣ୍ଣ ରୂପେ ପୁନରୁଦ୍ଧାର କରିବା । ଏହି ଉଦ୍ଦେଶ୍ୟରେ ଗୃହମନ୍ତ୍ରୀ ଅମିତ୍ ଶାହା ଭାରତୀୟ ନ୍ୟାୟ ସଂହିତା, ୨୦୨୩ର ଉପସ୍ଥାପନ କରିଥିଲେ । ଭାରତୀୟ ନାଗରିକ ସୁରକ୍ଷା ସଂହିତା ୨୦୨୩ ଏବଂ ଭାରତୀୟ ସାକ୍ଷ୍ୟ ବିଲ ୨୦୨୩ । ସୁପ୍ରିମକୋର୍ଟ ଓ ହାଇକୋର୍ଟ ବିଚାରପତି, ଆଇନ ବିଶ୍ୱବିଦ୍ୟାଳୟ, ମୁଖ୍ୟମନ୍ତ୍ରୀ, ରାଜ୍ୟପାଳଙ୍କ ସମେତ ବିଭିନ୍ନ ଅଂଶୀଦାରଙ୍କ ସହ ବ୍ୟାପକ ଆଲୋଚନା ପରେ ଏହି ବିଲ୍ ପ୍ରସ୍ତୁତ କରାଯାଇଛି । ବିଭିନ୍ନ କମିଟି ସୁପାରିଶରୁ ମଧ୍ୟ ଏହି ବିଲ ଗୁଡିକ କାର୍ଯ୍ୟକାରୀ ହୋଇଥାଏ ବୋଲି ଗୃହମନ୍ତ୍ରୀ ଲୋକସଭାରେ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଭାରତୀୟ ନ୍ୟାୟ ସଂହିତା ଆଇପିସିର ୨୨ଟି ଧାରାକୁ ଉଚ୍ଛେଦ କରି ୧୭୫ଟି ପ୍ରଚଳିତ ବ୍ୟବସ୍ଥାରେ ପରିବର୍ତ୍ତନ ପ୍ରସ୍ତାବ ଦିଆଯାଇଛି ଏବଂ ଏହି ପ୍ରସ୍ତାବରେ ୯ଟି ନୂଆ ଧାରା ପ୍ରଣୟନ ନେଇ ପ୍ରସ୍ତାବ ଦିଆଯାଇଛି । ଏଥିରେ ସମୁଦାୟ ୩୫୬ଟି ଧାରା ରହିଛି ।
ଗୃହମନ୍ତ୍ରୀ ଅମିତ୍ ଶାହା ତାଙ୍କ ଭାଷଣରେ କହିଛନ୍ତି ଯେ ଏହି ବିଲ୍ ଦେଶଦ୍ରୋହ ଅପରାଧକୁ ସମ୍ପୂର୍ଣ୍ଣ ରୂପେ ଉଚ୍ଛେଦ କରାଯାଇଛି । ହେଲେ ଏହି ବିଲରେ ରାଜ୍ୟ ବିରୋଧରେ ଅପରାଧ ପାଇଁ ଦଣ୍ଡବିଧାନର ବ୍ୟବସ୍ଥା ରହିଛି । ଏହି ବିଲର ଧାରା ୧୫୦ରେ ଭାରତର ସାର୍ବଭୌମତ୍ୱ ଏକତା ଓ ଅଖଣ୍ଡତା ପ୍ରତି ବିପଦ ସୃଷ୍ଟି କରୁଥିବା କାର୍ଯ୍ୟ ସଂପର୍କରେ ଉଲ୍ଲେଖ ରହିଛି । ସେ ଆହୁରି କହିଛନ୍ତି ଯେ ଏହି ବିଲରେ ଭିଡ ହତ୍ୟା ଅପରାଧୀକୁ ଦଣ୍ଡିତ କରିବାର ବ୍ୟବସ୍ଥା ରହିଛି । ଏନେଇ ୭ବର୍ଷ କିମ୍ବା ଆଜୀବନ କାରାଦଣ୍ଡ ଅଥବା ମୃତ୍ୟୁଦଣ୍ଡରେ ଦଣ୍ଡିତ କରିବାର ବ୍ୟବସ୍ଥା ରହିଛି ।
ଏହି ବିଲରେ ସରକାର ଭାରତୀୟ ନାଗରିକ ସୁରକ୍ଷା ସଂହିତା ସିଆରପିସିର ୯ଟି ବ୍ୟବସ୍ଥାକୁ ଉଚ୍ଛେଦ କରି ଏହାର ୧୦୭ଟି ଧାରାର ପରିବର୍ତ୍ତନ ପ୍ରସ୍ତାବ ଦିଆଯାଇଛି । ଏବଂ ୯ଟି ନୂଆ ବ୍ୟବସ୍ଥା ପ୍ରଣୟନ କରାଯାଇଛି । ଏହି ବିଲରେ ମୋଟ ୫୩୩ଟି ଧାରା ରହିଛି ।
ଭାରତୀୟ ସାକ୍ଷ୍ୟ ବିଲରେ ପ୍ରମାଣ ଆଇନର ୫ଟି ପ୍ରଚଳିତ ବ୍ୟବସ୍ଥାକୁ ଉଚ୍ଛେଦ, ୨୩ଟି ଧାରାର ପରିବର୍ତ୍ତନ ପ୍ରସ୍ତାବ ଏବଂ ଗୋଟିଏ ନୂଆ ଧାରା ପ୍ରଣୟନ କରାଯାଇଛି । ଏଥିରେ ସମୁଦାୟ ୧୭୦ଟି ବିଭାଗ ରହିଛି ।
- ଧାରା ୧୧୦ : କ୍ଷୁଦ୍ର ସଂଗଠିତ ଅବରାଧ ବା ସଂଗଠିତ ସାଧାରଣ ଅପରାଧ
- ଧାରା -୧୧୧ : ଆତଙ୍କବାଦୀ କାର୍ଯ୍ୟର ଅପରାଧ ଧାରା
- ଧାରା ୧୫୦ : ଭାରତର ସାର୍ବଭୌମତ୍ୱ, ଏକତା ଏବଂ ଅଖଣ୍ଡତା ପ୍ରତି ବିପଦ ସୃଷ୍ଟି କରୁଥିବା କାର୍ଯ୍ୟ
- ଧାରା-୩୦୨ : ସ୍ନାଚିଂ
- ଭିଡ ହତ୍ୟା ବା ମବ୍ ଲିଚିଂ ପାଇଁ ପୃଥକ ବ୍ୟବସ୍ଥା, ୭ବର୍ଷ କିମ୍ବା ଆଜୀବନ କାରାଦଣ୍ଡ କିମ୍ବା ମୃତ୍ୟୁଦଣ୍ଡ-ପଳାତକଙ୍କ ବିରୋଧରେ ଏକତରଫା ଶୁଣାଣି ଓ ଦୋଷୀ ସାବ୍ୟସ୍ତ
- ଜିରୋଏଫଆଇଆର ପାଇଁ ଆନୁଷ୍ଠାନିକ ବ୍ୟବସ୍ଥା – ଏହାଦ୍ୱାରା ନାଗରିକମାନେ ନିଜ ଅଧିକାର ନିର୍ବିଶେଷରେ ଯେକୌଣସି ଥାନାରେ ଏଫଆଇଆର ଦାଖଲ କରିପାରିବେ ।
ପଞ୍ଜୀକରଣ ହେବାର ୧୫ ଦିନ ମଧ୍ୟରେ ଜିରୋ ଏଫଆଇଆର ସଂପୃକ୍ତ ଥାନାକୁ ପଠାଯିବ - ୧୨୦ ଦିନ ମଧ୍ୟରେ ଜବାବ ଦେବାରେ ବିଫଳ ହେଲେ ଅପରାଧିକ ଅପରାଧରେ ଅଭିଯୁକ୍ତ ସରକାରୀ କର୍ମଚାରୀ ଓ ପୋଲିସ ଅଧିକାରୀଙ୍କ ବିରୋଧରେ ମାମଲା ରୁଜୁ କରିବାକୁ “ଡିମ୍ଡ ମଞ୍ଜୁରୀ”
- ଏତଲା ରୁଜୁଠାରୁ ଆରମ୍ଭ କରି କେସ୍ ଡାଏରୀ ରକ୍ଷଣାବେକ୍ଷଣ ଓ ଚାର୍ଜସିଟ ଦାଖଲ ଏବଂ ରାୟ ପ୍ରଦାନ ପର୍ଯ୍ୟନ୍ତ ସମ୍ପୂର୍ଣ୍ଣ ପ୍ରକ୍ରିୟା ଡିଜିଟାଲାଇଜେସନ
- ଭିଡିଓ କନଫରେନସିଂ ମାଧ୍ୟମରେ କ୍ରସ୍ ପରୀକ୍ଷା, ଅପିଲ ସମେତ ସମସ୍ତ ଶୁଣାଣି କରାଯିବ ।
- ଯୌନ ଅପରାଧ ପୀଡିତାଙ୍କ ବୟାନ ରେକର୍ଡ କରିବା ସମୟରେ ଭିଡିଓଗ୍ରାଫି ବାଧ୍ୟତାମୂଳକ
- ସମସ୍ତ ପ୍ରକାର ଗଣଦୁଷ୍କର୍ମ ପାଇଁ ଦଣ୍ଡ- ୨୦ ବର୍ଷ କିମ୍ବା ଆଜୀବନ କାରାଦଣ୍ଡ
- ନାବାଳିକା ଦୁଷ୍କର୍ମ ମାମଲାରେ ଫାଶୀ ଦଣ୍ଡାଦେଶ
- ଏତଲାର ୯୦ ଦିନ ମଧ୍ୟରେ ଚାର୍ଜସିଟ୍ ଦାଖଲ କରିବା ବାଧ୍ୟତାମୂଳକ, ଅଦାଲତ ଏହି ସମୟକୁ ଆହୁରି ୯୦ଦିନ ପର୍ଯ୍ୟନ୍ତ ବୃଦ୍ଧି କରିପାରନ୍ତି । ଯାହାଦ୍ୱାରା ତଦନ୍ତ ଶେଷ କରିବା ପାଇଁ ସମୁଦାୟ ସର୍ବାଧିକ ଅବଧି ୧୮୦ ଦିନକୁ ବୃଦ୍ଧି କରାଯାଇପାରେ ।
- ଚାର୍ଜସିଟ୍ ପାଇବାର ୬୦ଦିନ ମଧ୍ୟରେ ଚାର୍ଜସିଟ ଦାଖଲ ଶେଷ କରିବେ ଅଦାଲତ
- ଶୁଣାଣି ଶେଷ ହେବାର ୩୦ଦିନ ମଧ୍ୟରେ ବାଧ୍ୟତାମୂଳକ ଭାବେ ରାୟ ଶୁଣାଇବେ କୋର୍ଟ
- ରାୟ ପ୍ରକାଶ ପାଇବାର ୭ଦିନ ମଧ୍ୟରେ ଅନଲାଇନରେ ବାଧ୍ୟତାମୂଳକ ଭାବେ ଉପଲବ୍ଧ ହେବ ରାୟ
- ସର୍ଚ୍ଚ ଆଣ୍ଡ ସିଜର ସମୟରେ ଭିଡିଓଗ୍ରାଫି ବାଧ୍ୟତାମୂଳକ
- ୭ବର୍ଷରୁ ଅଧିକ ଦଣ୍ଡ ଭୋଗୁଥିବା ଅପରାଧ ପାଇଁ ଅପରାଧ ସ୍ଥଳକୁ ବାଧ୍ୟତାମୂଳକ ଭାବେ ପରିଦର୍ଶନ କରିବେ ଫେରେନସିକ୍ ଟିମ୍
ଜିଲ୍ଲା ସ୍ତରରେ ମୋବାଇଲ ଏଫ ଏସ ଏଲ ମୁତୟନ - ପୀଡିତାଙ୍କୁ ଶୁଣାଣିର ସୁଯୋଗ ନଦେଇ ୭ବର୍ଷ କିମ୍ବା ତା ଠାରୁ ଅଧିକ ଦଣ୍ଡନୀୟ କୌଣସି ମାମଲା ପ୍ରତ୍ୟାହାର ହୋଇପାରିବ ନାହିଁ
- ଟ୍ରାଏଲର ପରିସରକୁ ୩ବର୍ଷ ପର୍ଯ୍ୟନ୍ତ ଦଣ୍ଡନୀୟ ଅପରାଧରେ ବିସ୍ତାରିତ କରାଯାଇଛି (ସେନନ୍ସ କୋର୍ଟରେ ୪୦ ପ୍ରତିଶତ ମାମଲା ହ୍ରାସ ପାଇବ)
- ସଂଗଠିତ ଅପରାଧ ପାଇଁ ଅଲଗା ଓ କଠୋର ଦଣ୍ଡ
- ବିବାହ, ଚାକିରି ଇତ୍ୟାଦି ମିଥ୍ୟା ପ୍ରଲୋଭନ ଦେଖାଇ ମହିଳାଙ୍କୁ ଦୁଷ୍କର୍ମ କରିବା ଅପରାଧ ପାଇଁ ପୃଥକ ଦଣ୍ଡ ବ୍ୟବସ୍ଥା
- ଚେନ୍/ମୋବାଇଲ ଲୁଟ ଏବଂ ଅନୁରୂପ ଦୁବୃର୍ତ୍ତ କାର୍ଯ୍ୟକଳାପ ପାଇଁ ପୃଥକ ବ୍ୟବସ୍ଥା
- ଶିଶୁଙ୍କ ବିରୋଧରେ ଅପରାଧ ପାଇଁ ଦଣ୍ଡ ଅବଧୀର ପରିବର୍ତ୍ତନ । ୭ ବର୍ଷ ସ୍ଥାନରେ ମିଳିବ ୧୦ ବର୍ଷ ଜେଲଦଣ୍ଡ
- ମୃତ୍ୟୁଦଣ୍ଡକୁ ସର୍ବାଧିକ ଆଜୀବନ କାରାଦଣ୍ଡରେ ପରିଣତ କରାଯାଇପାରିବ, ଆଜୀବନ କାରାଦଣ୍ଡକୁ ସର୍ବାଧିକ ୭ବର୍ଷ ଏବଂ ୭ ବର୍ଷର ଦଣ୍ଡକୁ ୩ବର୍ଷ କାରାଦଣ୍ଡରେ ପରିଣତ କରାଯାଇପାରିବ ।
- ଯେକୌଣସି ଅପରାଧରେ ସଂପୃକ୍ତ ଥିବା ଅଭିଯୋଗରେ ଜବତ ହୋଇଥିବା ଗାଡିଗୁଡିକର ଭିଡିଓଗ୍ରାଫି ବାଧ୍ୟତାମୂଳକ ହେବା ପରେ ବିଚାରଧୀନ ଥିବା ସମୟରେ ଜବତ ଗାଡିର ଯାଂଚ ପାଇଁ ଏକ ପ୍ରମାଣିତ କପି କୋର୍ଟରେ ଦାଖଲ କରାଯିବ ।