କ୍ୟାମେରା ଦେଖିଲା ମର୍ଡର: ସାମ୍ନାକୁ ଆସିଲା ତିଗିରିଆରେ ଦୁଇ ଭାଇଙ୍କୁ ନୃଂଶସ ହତ୍ୟାର ସିସିଟିଭି ଫୁଟେଜ
କନକ ବ୍ୟୁରୋ: ଆଠଗଡ ତିଗିରିଆରେ ଦୁଇ ଭାଇଙ୍କୁ କିଭଳି ନୃଶଂସ ଭାବେ ହତ୍ୟା କରାଯାଇଥିଲା ସାମନାକୁ ଆସିଛି ତାର ସିସିଟିଭି ଫୁଟେଜ୍ । ଆଉ ଭିଡିଓରେ ସ୍ପଷ୍ଟ ଦେଖା ଯାଉଛି ଦୁବୃର୍ତମାନେ ଦୁଇ ଭାଇଙ୍କୁ ମାରଣାସ୍ତ୍ରରେ ହାଣି ପକାଇବା ପରେ କେମିତି ହତ୍ୟାକାଣ୍ଡକୁ ଦୁର୍ଘଟଣାର ରୂପ ଦେବା ପାଇଁ ଟ୍ରକ ଚଢ଼ାଇ ଦେଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ସିସିଟିଭିରେ କଏଦ ହୋଇଥିବା ଦୃଶ୍ୟ ହିଁ ବୟାନ କରୁଛି, ଶତ୍ରୁତା କେତେ ଭୟଙ୍କର ହୋଇପାରେ, କ୍ରୋଧ କେମିତି ଜଣଙ୍କୁ ଅତି ନୃଶଂସ ବନାଇ ଦେଇପାରେ । ଏ ହେଉଛି କଟକ ଆଠଗଡ଼ ତିଗିରିଆ ଥାନା ଭିରୁଡ଼ାରେ ୨ ଭାଇଙ୍କୁ ହତ୍ୟା କରାଯିବା ସମୟର ଦୃଶ୍ୟ । ଭିଡିଓରୁ ସ୍ପଷ୍ଟ ଜଣାପଡୁଛି, ଦୁଇ ଭାଇଙ୍କୁ ଦୁବୃର୍ତମାନେ ଅତି ନୃଶଂସ ଭାବେ ମାରଣାସ୍ତ୍ରରେ ଆକ୍ରମଣ କରୁଛନ୍ତି । ଆଉ ଆକ୍ରମଣର ଶିକାର ହୋଇ ଦୁଇ ଭାଇ ତଳେ ପଡିଯିବା ପରେ ପ୍ରମାଣ ନଷ୍ଟ କରିବା ପାଇଁ ଟ୍ରକ ଚଢ଼ାଇ ମାରି ଦେଉଛନ୍ତି ।
ଦୁଇ ଭାଇ ଶରତ ଦେହୁରୀ ଓ ଲକ୍ଷ୍ମଣ ଦେହୁରୀଙ୍କ ଉପରେ ଆକ୍ରମଣ କରିଥିଲେ ଦୁବୃର୍ତ । ସେମାନେ କିଛି ବୁଝିବା ପୂର୍ବରୁ ଅତର୍କିତ ଭାବେ ହାଣି ଚାଲିଥିଲେ । ତାପରେ ଏହାକୁ ଏକ ଦୁର୍ଘଟଣାର ରୂପ ଦେବା ପାଇଁ ସେମାନଙ୍କ ଉପରେ ଏକ ଟ୍ରକ ଚଢ଼ାଇ ଦେଇଥିଲେ । ଏବେ ସିସିଟିଭି ଫୁଟେଜ ମିଳିବା ପରେ ଏହାକୁ ଆଧାର କରି ତଦନ୍ତ ଚଳାଇଛି ପୋଲିସ । ଅନ୍ୟପଟେ ଏହି ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ଜୀବନାନନ୍ଦ ମଲ୍ଲିକ ଓରଫ ଶୁକୁଟା ଆତ୍ମସମର୍ପଣ କରିଛି ।
ହେଲେ ସେ କହିଛି, ତାକୁ ଓ ତା ଭାଇକୁ ଆକ୍ରମଣ କରିବାରୁ ସେମାନେ ପ୍ରତିଆକ୍ରମଣ କରିଥିଲେ । ଅଭିଯୁକ୍ତର ବୟାନ ଓ ସିସିଟିଭି ଫୁଟେଜକୁ ଆଧାର କରି ଟ୍ରକଟିକୁ ଜବତ କରି ତଦନ୍ତ ଜାରି ରଖିଛି ପୋଲିସ । ଆଉ ପୂର୍ବଶତ୍ରୁତାରୁ ଏହି ହତ୍ୟାକାଣ୍ଡ ଘଟିଥିବା କୁହାଯାଉଛି ।