ଅକ୍ଷୟ ପରିଜାଙ୍କ ବିରୋଧରେ କାଷ୍ଟିଂ କାଉଚ୍ ଅଭିଯୋଗ ନେଇ ବଢୁଛି ରହସ୍ୟ । ଅଭିଯୋଗ ଆଣିଥିବା ଯୁବତୀ ନୀରବ, ଆଗଉନି ପୋଲିସର ତଦନ୍ତ ।
କନକ ବ୍ୟୁରୋ: କାଷ୍ଟିଂ କାଉଚ୍ ବା ଅଭିନୟ ପାଇଁ ପ୍ରଲୋଭନ ଦେଖାଇ, ଓଡିଆ ଫିଲ୍ମରେ ଯୁବତୀଙ୍କୁ ଯୌନ ଶୋଷଣ କରିବା ବିବାଦରେ ପୁଣି ଛନ୍ଦି ହୋଇଛି ଓଡିଆ ଇଣ୍ଡଷ୍ଟ୍ରୀ । ପ୍ରତିଷ୍ଠିତ ପ୍ରଯୋଜକ ଅକ୍ଷୟ ପରିଜାଙ୍କ ବିରୋଧରେ ଯୌନ ଅଭିଯୋଗ ଆଣିଥିବା ଯୁବତୀ ସାମନାକୁ ନଆସି ନୀରବ ରହିଛନ୍ତି । ତେବେ ଯୁବତୀ ଜଣଙ୍କ କାହିଁକି ସାମନାକୁ ଆସୁନାହାଁନ୍ତି, ତାହାକୁ ନେଇ ସନ୍ଦେହ ବଢିବାରେ ଲାଗିଛି । ସେପଟେ ଅକ୍ଷୟ ପରିଜା ପାଲଟା ଅଭିଯୋଗ କରିଥିଲେ ବି ପୋଲିସର ତଦନ୍ତ ବିଶେଷ ଆଗଉ ନଥିବା ଜଣାପଡିଛି ।
Kanak News is now on WhatsApp
Join and get latest news updates delivered to you via WhatsApp
ଅସ୍ତିତ୍ୱ ଜାହିର ପାଇଁ ଓଲିଉଡ୍ ସଂଘର୍ଷ କରୁଥିବା ବେଳେ ଅକ୍ଷୟ ପରିଜାଙ୍କ ଭଳି ପ୍ରତିଷ୍ଠିତ ପ୍ରଯୋଜକଙ୍କ ବିରୋଧରେ କାଷ୍ଟିଂ କାଉଚ ଅଭିଯୋଗ, ଅନେକ ପ୍ରଶ୍ନ ସୃଷ୍ଟି କରିଛି । ଅନ୍ତରଙ୍ଗ ମୁହୂର୍ତ୍ତର ଗୋଟିଏ ପରେ ଗୋଟିଏ ଫଟୋ ଭାଇରାଲ୍ ହେବାରେ ଲାଗିଛି । କିଏ ଏହି ଫଟୋ ଭାଇରାଲ କରୁଛି, ତାହା ଜଣା ପଡିନାହିଁ । ଗୋଟିଏ ପଟେ ଅକ୍ଷୟ ପରିଜାଙ୍କ ବିରୋଧରେ ଯୌନ ଶୋଷଣ ଆଣିଥିବା ଯୁବତୀ ଜଣଙ୍କ ସାମନାକୁ ନଆସି ନୀରବ ରହିଛନ୍ତି । ଅନ୍ୟପଟେ ଅକ୍ଷୟ ପରିଜା ତାଙ୍କୁ ବ୍ଲାକମେଲିଂ କରାଯାଉଥିବା ନେଇ ପାଲଟା ଅଭିଯୋଗ କରିଥିଲେ ବି ପୋଲିସର ତଦନ୍ତ ବିଶେଷ ଅଗ୍ରଗତି କରିନଥିବା ସୂଚନା ମିଳିଛି । ଏପଟେ ସିନେ ସମୀକ୍ଷକ ଦିଲ୍ଲୀପ ହାଲି କହିଛନ୍ତି, ଓଡ଼ିଆ ଫିଲ୍ମରେ କାଷ୍ଟିଂ କାଉଚ୍ କିଛି ନୂଆ କଥା ନୁହେଁ । ତେବେ ଅନେକ ସମୟରେ ବଡ଼ ପଣ୍ଡାମାନେ ଏଥିରୁ ଖସି ଯାଆନ୍ତି ।
କାଷ୍ଟିଂ କାଉଚ୍, ଏହାର ଅର୍ଥ ହେଉଛି ଅଭିନୟ ପାଇଁ ପ୍ରଲୋଭନ ଦେଖାଇ ଯୌନ ଶୋଷଣ । ହଲିଉଡ୍ ଠାରୁ ବଲିଉଡ୍ ପର୍ଯ୍ୟନ୍ତ ଅନେକ ସମୟରେ ଏପରି ଅଭିଯୋଗ ହୋଇ ଆସୁଛି । ତେବେ ଅକ୍ଷୟ ପରିଜାଙ୍କ ବିରୋଧରେ କାଷ୍ଟିଂ କାଉଚ୍ ଅଭିଯୋଗ, ଓଲିଉଡ୍ରେ ହଲଚଲ୍ ସୃଷ୍ଟି କରିଛି । ପ୍ରଶ୍ନ, ଏହା କାଷ୍ଟିଂ କାଉଚ ନା ପ୍ରଯୋଜକଙ୍କୁ ବ୍ଲାକ ମେଲିଂ । ଅଭିନେତ୍ରୀ ବିଦୁସ୍ମିତା କହିଛନ୍ତି, ଉଚ୍ଚାଭିଳାଷ ରଖି ଯେଉଁମାନେ ସିନେମା ଇଣ୍ଡଷ୍ଟ୍ରୀକୁ ଆସିଥାନ୍ତି, ସେମାନେ ସହଜରେ କାଷ୍ଟିଂ କାଉଚରେ ଟ୍ରାପ୍ ହୋଇଯାଆନ୍ତି ।
- ଓଲିଉଡରେ ଚାଲିଛି କି କାଷ୍ଟିଂ କାଉଚ୍?
- ଅଭିନୟ ପାଇଁ ପ୍ରତିଶ୍ରୁତି ଦେଇ ହେଉଛି କି ଯୌନଶୋଷଣ?
- ସତ ପଦାକୁ ଆସିବ ନା ମାମଲାକୁ ଚାପି ଦିଆଯିବ?
ପୂର୍ବରୁ ଏପରି ଅନେକ ଅଭିଯୋଗର ସତ ସାମନାକୁ ଆସି ପାରିନାହିଁ । କେତେବେଳେ ପରଦା ଆଢୁଆଳରେ ବୁଝାମଣା ହୋଇ ଯାଇଛି ତ କେତେବେଳେ ଅଭିଯୋଗ ଆଣୁଥିବା ଅଭିନେତ୍ରୀଙ୍କ ପାଟି ଚୁପ୍ କରିବାରେ ସଫଳ ହୋଇଥାଆନ୍ତି ପ୍ରଭାବଶାଳୀ । ଏବେ ପ୍ରଶ୍ନ ଉଠୁଛି, ଅକ୍ଷୟ ପରିଜାଙ୍କ ବିରୋଧରେ ହୋଇଥିବା କାଷ୍ଟିଂ କାଉଚ୍ ଅଭିଯୋଗର ସତ ସାମନାକୁ ଆସିବ ନା କେବଳ ଏହା ଅଭିଯୋଗ ହୋଇ ରହିଯିବ ।