ଟିଏମସି ସାଂସଦ ମହୁଆ ମୋଇତ୍ରଙ୍କ ବଢିଲା ଅଡୁଆ । ଟଙ୍କା ନେଇ ପ୍ରଶ୍ନ ପଚାରିବା ମାମଲାରେ ଯାଂଚ କରିବ ସିବିଆଇ

କନକ ବ୍ୟୁରୋ : ଟିଏମସି ସାଂସଦ ମହୁଆ ମୋଇତ୍ରଙ୍କ ପାଇଁ ବଢିଲା ଅଡୁଆ । ଟଙ୍କା ନେଇ ସଂସଦରେ ପ୍ରଶ୍ନ ପଚାରିବା ମାମଲାରେ ଯାଂଚ କରିବ ସିବିଆଇ । ମହୁଆ ମୋଇତ୍ରଙ୍କ ବିରୋଧରେ ଆସିଥିବା ଦୁର୍ନୀତି ଅଭିଯୋଗର ତଦନ୍ତ କରିବାକୁ ଲୋକପାଳ ସିବିଆଇକୁ ନିର୍ଦ୍ଦେଶ ଦେଇଛନ୍ତି । ବିଜେପି ସାଂସଦ ନିଶିକାନ୍ତ ଦୁବେ ଏନେଇ ନିଜ ସୋସିଆଲ ମିଡିଆ ଏକ୍ସରେ ସୂଚନା ଦେଇଛନ୍ତି । ବ୍ୟବସାୟୀ ଦର୍ଶନ ହୀରାନନ୍ଦରନୀଙ୍କ ଠାରୁ ଟଙ୍କା ନେଇ ମହୁଆ ସଂସଦରେ ଆଦାନି ପ୍ରସଙ୍ଗରେ ପ୍ରଶ୍ନ ପଚାରିଥିବା ଅଭିଯୋଗ ଆଣିଥିଲେ ନିଶିକାନ୍ତ । ଏନେଇ ସଂସଦର ଏଥିକ୍ସ କମିଟି ମହୁଆଙ୍କୁ ଜେରା କରିବା ପରେ ଏବେ ମାମଲାରେ ଉଚ୍ଚସ୍ତରୀୟ ତଦନ୍ତ କରିବାକୁ ଲୋକପାଳ ସିବିଆଇକୁ ନିର୍ଦ୍ଦେଶ ଦେଇଛନ୍ତି । ଲୋକସଭା ସଂସଦୀୟ ଲଗଇନ ସେୟାର କରି ମହୁଆ ଜାତୀୟ ନିରାପତା ସହ ବୁଝମଣା କରିଛନ୍ତି । ଲୋକପାଳ ମାମଲାକୁ ଗମ୍ଭୀରତାର ସହ ନେଇ ସିବିଆଇ ଯାଂଚ ନିର୍ଦ୍ଦେଶ ଦେଇଥିବା ବେଳେ ମହୁଆଙ୍କୁ ତୁରନ୍ତ ସଂସଦରୁ ନିଳମ୍ବନ କରିବାକୁ ନିଶିକାନ୍ତ ଦାବି କରିଛନ୍ତି । ଏହା ପୂର୍ବରୁ ମହୁଆ ସଂସଦର ଏଥିକ୍ସ କମିଟି ନିକଟରେ ହାଜର ହୋଇଥିଲେ ମଧ୍ୟ ଅଶାଳୀନ ପ୍ରଶ୍ନ ପଚାରାଯିବା ଅଭିଯୋଗ ଆଣି ଅଧାରୁ ଉଠି ଆସିଥିଲେ ।