କାମ ଦେବନି ବୁଷ୍ଟର ଡୋଜ୍, ସମସ୍ତେ ହେବେ ଓମିକ୍ରନ ସଂକ୍ରମିତ । ଚର୍ଚ୍ଚା ବଢ଼ାଇଲା ଆଇସିଏମଆରର ବରିଷ୍ଠ ଚିକିତ୍ସକଙ୍କ ମତ ।
କନକ ବ୍ୟୁରୋ : ଦେଶରେ ବୁଷ୍ଟର ଡୋଜ ଦେବା ଆରମ୍ଭ ହୋଇଛି । ଏହାରି ଭିତରେ ଆଇସିଏମଆରର ବରିଷ୍ଠ ଚିକିତ୍ସକଙ୍କ ମତକୁ ନେଇ ଚର୍ଚ୍ଚା ଆରମ୍ଭ ହୋଇଛି । ଡାକ୍ତର ଜୟପ୍ରକାଶ ମୁଲିୟଲ କହିଛନ୍ତି, ବୁଷ୍ଟର ଡୋଜ୍ କୌଣସି ବଡ଼ ଧରଣର ପରିବର୍ତନ ଆଣିପାରିବ ନାହିଁ । ସଂକ୍ରମଣ ହେବ ହିଁ ହେବ । ସେ ଆହୁରି ମଧ୍ୟ କହିଛନ୍ତି, କୋଭିଡ ଆଉ ଏବେ ଏକ ଭୟଙ୍କର ରୋଗ ହୋଇ ରହିନାହିଁ ।
Kanak News is now on WhatsApp
Join and get latest news updates delivered to you via WhatsApp
ଦେଶରେ ବୁଷ୍ଟର ଡୋଜ୍ ଦେବା ଆରମ୍ଭ ହୋଇଯାଇଥିବା ବେଳେ ଭାରତୀୟ ଭେଷଜ ଗବେଷଣା ପରିଷଦ, ଆଇସିଏମଆରର ବରିଷ୍ଠ ଚିକିତ୍ସକ ଡାକ୍ତର ଜୟପ୍ରକାଶ ମୁଲିୟଲ ଯେଉଁ ମତ ପ୍ରକାଶ କରଛନ୍ତି ତାହା ଏବେ ଚର୍ଚ୍ଚା ସୃଷ୍ଟି କରିଛି । ଡାକ୍ତର ଜୟପ୍ରକାଶଙ୍କ କହିବା କଥା ହେଲା, “ବୁଷ୍ଟର ଡୋଜ୍ କୌଣସି ବଡ଼ ଧରଣର ପରିବର୍ତନ ଆଣିପାରିବ ନାହିଁ । ସଂକ୍ରମଣ ହେବ ହିଁ ହେବ । ବୁଷ୍ଟର ଡୋଜ୍ ସତ୍ୱେ ସାରା ବିଶ୍ୱରେ ସଂକ୍ରମଣ ହୋଇଛି । ଆମ ମଧ୍ୟରୁ ଅଧିକାଂଶଙ୍କୁ ଜଣାପଡ଼ିବନି ଯେ, ସଂକ୍ରମିତ ହୋଇସାରିଲେଣି । ଏହା ୮୦ ପ୍ରତିଶତଙ୍କ କ୍ଷେତ୍ରରେ ଘଟିପାରେ । ଆମେ ଡେଲଟା ଭୂତାଣୁ ଠାରୁ ଅନ୍ୟ ଏକ ଭାରିଆଣ୍ଟ ସହ ମୁକାବିଲା କରୁଛେ । ଏହାକୁ ରୋକିବା ଅସମ୍ଭବ ।’
ତେବେ କୋଭିଡକୁ ନେଇ ଆଶ୍ୱସ୍ତ କଲା ଭଳି ମତ ମଧ୍ୟ ସେ ରଖିଛନ୍ତି । କହିଛନ୍ତି, “କୋଭିଡ ଆଉ ଏବେ ଏକ ଭୟଙ୍କର ରୋଗ ହୋଇ ରହି ନାହିଁ । ନୂଆ ଭାରିଆଣ୍ଟ ଓମିକ୍ରନ କମ୍ କ୍ଷତିକାରକ । ଏଥିରେ ଆକ୍ରାନ୍ତ ହେବା ପରେ କମ୍ ଲୋକ ହସ୍ପିଟାଲରେ ଭର୍ତ୍ତି ହେଉଛନ୍ତି । ସଂକ୍ରମଣରୁ ସୁସ୍ଥ ହେବା ପରେ ସୃଷ୍ଟି ହେଉଥିବା ପ୍ରାକୃତିକ ପ୍ରତିଷେଧକ ଶକ୍ତି ସାରା ଜୀବନ ରହିଥାଏ, ଆଉ ଏହି କାରଣରୁ ଭାରତ ଏଥର ସେତେଟା ପ୍ରଭାବିତ ହୋଇନାହିଁ ।
୮ଟି ରାଜ୍ୟର ସଂକ୍ରମଣ ବଢ଼ାଉଛି ଚିନ୍ତା । ୩ଶହ ଜିଲ୍ଲାରେ ସାପ୍ତାହିକ ସଂକ୍ରମଣ ହାର ୫%ରୁ ଅଧିକ । ଦେଶର ୮ଟି ରାଜ୍ୟରେ ବଢ଼ୁଥିବା ସଂକ୍ରମଣ ଏବେ ଚିନ୍ତା ବଢ଼ାଇଛି । ଏହି ସବୁ ରାଜ୍ୟ ହେଲା ମହାରାଷ୍ଟ୍ର, ପଶ୍ଚିମବଙ୍ଗ, ତାମିଲନାଡୁ, କର୍ଣ୍ଣାଟକ, ଉତ୍ତରପ୍ରଦେଶ, ଦିଲ୍ଲୀ, କେରଳ ଓ ଗୁଜରାଟ । ଦେଶର ୩ଶହ ଜିଲ୍ଲାରେ ସାପ୍ତାହିକ ସଂକ୍ରମଣ ହାର ୫ ପ୍ରତିଶତରୁ ଅଧିକ । ଦେଶରେ ଆକ୍ଟିଭ୍ କେସ୍ ସଂଖ୍ୟା ୯ ଲକ୍ଷ ୩୩ ହଜାର ଟପିସାରିଛି । କେରଳରେ ଗୋଟିଏ ଦିନରେ ସର୍ବାଧିକ ୭୬ ଓମିକ୍ରନ ଆକ୍ରାନ୍ତ ଚିହ୍ନଟ ହୋଇଛନ୍ତି । ମହାରାଷ୍ଟ, ରାଜସ୍ଥାନ, ଦିଲ୍ଲୀ ଓ କର୍ଣ୍ଣାଟକ ପରେ କେରଳରେ ସବୁଠୁ ଅଧିକ ଓମିକ୍ରନ ଆକ୍ରାନ୍ତ ଚିହ୍ନଟ ହୋଇଛନ୍ତି । କେରଳରେ ଏଯାଏଁ ମୋଟ୍ ୪୨୧ ଜଣ ଓମିକ୍ରନ ଆକ୍ରାନ୍ତଙ୍କୁ ଠାବ କରାଯାଇ ସାରିଛି । ଏସବୁ ଭିତରେ ଇଂଲଣ୍ଡର ବ୍ରିଷ୍ଟଲ ୟୁନିଭର୍ସିଟିର ଗବେଷଣା ଭଲ ଖବର ଆଣିଛି । ଭୂତାଣୁ ବାୟୁ ମାଧ୍ୟମରେ ସଂକ୍ରମଣ କ୍ଷମତା ପ୍ରାୟ ୯୦ ପ୍ରତିଶତ ହରାଇସାରିଛି । ଅର୍ଥାତ୍ ବାୟୁ ମଧ୍ୟରେ ପ୍ରବେଶ କରିବାର ୨୦ ମିନିଟ ମଧ୍ୟରେ ପୂର୍ବରୁ ଏହା ଯେପରି ସଂକ୍ରମିତ କରୁଥିଲା, ତାର ୯୦ ପ୍ରତିଶତ କ୍ଷମତା ହରାଇ ବସୁଛି ।