କନକ ବ୍ୟୁରୋ : ବିଜେପି ଉପରେ ଏବେ ଏହି ବଡ ଅଭିଯୋଗ ଆଣିଛି ଆମ ଆଦମୀ ପାର୍ଟି । ଦିଲ୍ଲୀ ମୁଖ୍ୟମନ୍ତ୍ରୀ ତଥା ଆମ ଆଦମୀ ପାର୍ଟି ମୁଖ୍ୟ ଅରବିନ୍ଦ କେଜ୍ରିୱାଲଙ୍କୁ ଜୀବନରୁ ମାରିଦେବା ପାଇଁ ବିଜେପି ଷଡଯନ୍ତ୍ର କରୁଥିବା ଅଭିଯୋଗ ଆଣିଛି ଦଳ । ସାମ୍ବାଦିକ ସମ୍ମିଳନୀ କରି ଦିଲ୍ଲୀ ଉପମୁଖ୍ୟମନ୍ତ୍ରୀ ମନିଷ ସିସୋଦିଆ ସିଧାସଳଖ ବିଜେପିକୁ ଦାୟୀ କରିଛନ୍ତି । ଗୁଜରାଟ ଓ ଏମସିଡି ନିର୍ବାଚନରେ ପରାଜୟ ଭୟରେ ବିଜେପି କେଜ୍ରିୱାଲଙ୍କ ହତ୍ୟା କରିବାକୁ ଷଡଯନ୍ତ୍ର କରୁଥିବା ଆପ୍ କହିଛି । ବିଜେପି ସାଂସଦ ମନୋଜ ତିୱାରୀ ଖୋଲାଖୋଲି କେଜ୍ରିୱାଲଙ୍କ ଉପରେ ଆକ୍ରମଣ ପାଇଁ କର୍ମୀଙ୍କୁ ପ୍ରବର୍ତାଉଛନ୍ତି ଓ ଏହା ପାଇଁ ପୂରା ଯୋଜନା ସରିଛି । ବିଜେପି ଏହି ଗୁଣ୍ଡାଗର୍ଦ୍ଦିର ଜବାବ ଜନତା ଦେବେ ବୋଲି ମନିଷ ସିସୋଦିଆ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ନିକଟରେ ବିଜେପି ନେତା ମନୋଜ ତିୱାରୀ ଏକ ଟୁଇଟ କରିଥିଲେ ଆଉ ଲେଖିଥିଲେ ଯେ ସେ ଅରବିନ୍ଦ କେଜ୍ରିୱାଲଙ୍କ ସୁରକ୍ଷାକୁ ନେଇ ବେଶ୍ ଚିନ୍ତାରେ ଅଛନ୍ତି । କାରଣ ଆପ ଓ ଏହାର ନେତାମାନେ ଯେଉଁ ଦୁର୍ନିତୀ କରୁଛନ୍ତି, ତାକୁ ନେଇ ଜନତା ଅସନ୍ତୁଷ୍ଟ ଅଛନ୍ତି । ନିକଟରେ ଦଳର ଜଣେ ନେତାଙ୍କୁ ମଧ୍ୟ ମାଡ଼ ମରାଯାଇଛି । ଆଗକୁ ମୁଖ୍ୟମନ୍ତ୍ରୀଙ୍କ ସହ ଏଭଳି କିଛି ଘଟିବା ଆଶଙ୍କା ରହିଛି । ଦୋଷୀଙ୍କୁ କେବଳ ଆଇନ ହିଁ ଦଣ୍ଡ ଦେଉ ବୋଲି ମନୋଜ ଟୁଇଟ କରିଥିଲେ । ଏହି ଟୁଇଟକୁ ଆଧାର କରି ବିଜେପି ଉପରେ ହତ୍ୟା ଷଡଯନ୍ତ୍ରର ଅଭିଯୋଗ ଆଣିଛି ଆପ୍ । ସେପଟେ ମନିଷ ସିସୋଦିଆଙ୍କ ଅଭିଯୋଗର ପାଲଟା ଜବାବ ରଖିଛନ୍ତି ମନୋଜ ତିୱାରୀ ।
ଆଗକୁ ଗୁଜରାଟ ଓ ଦିଲ୍ଲୀ ଏମସିଡି ନିର୍ବାଚନ । ଏହା ପୂର୍ବରୁ ବିଜେପି ଓ ଆମ ଆଦମୀ ପାର୍ଟି ମଧ୍ୟରେ ତେଜୁଛି ବିବାଦ । ଆପ ମନ୍ତ୍ରୀ ଓ ନେତାଙ୍କ ବିରୋଧରେ କେବେ ବିଜେପି ସଂଗୀନ ଅଭିଯୋଗ ଆଣୁଛି ପୁଣି କେବେ ବିଜେପି ବିରୋଧରେ ଗୋଟେ ପଟେ ଅଭିଯୋଗ ଆଣୁଛି ଆପ୍ । ଦୁଇ ଦଳ ମଧ୍ୟରେ ରାଜନୈତିକ ଟକ୍କର ଦିନକୁ ଦିନ ବଢିବାରେ ଲାଗିଛି ।